«Dzie ty chadziŭ?»: niezvyčajnaja instalacyja ŭ pamiać pra achviar raźni ŭ Srebranicy FOTA
Učora spoŭniłasia 25 hod z momantu raźni ŭ Srebranicy: kali armija baśnijskich sierbaŭ zabiła vosiem tysiač mužčyn i chłopčykaŭ z musulmanskich siemjaŭ. Heta było samaje maštabnaje masavaje zabojstva ŭ Jeŭropie paśla Druhoj suśvietnaj vajny.
Amierykanskaja mastačka baśnijskaha pachodžańnia Aida Šechavič zrabiła niezvyčajnuju instalacyju. Jana vystaviła bolš za 8000 tradycyjnych baśnijskich kavavych filižanak u jakaści miemaryjała ŭ Srebranicy, kab takim čynam adznačyć 25-ju hadavinu raźni.
Farforavyja filižanki źjaŭlajucca častkaj vystavy «Dzie ty chadziŭ?», jakuju mastačka stvaryła ŭ 2006 hodzie i kožny hod demanstravała ŭ roznych krainach, pierš čym viarnuć ich na miesca samaha strašnaha złačynstva Jeŭropy z časoŭ Druhoj suśvietnaj vajny.
Pieršy raz Šechavič adkryła vystavu ŭ Sarajeva ŭ 2006 hodzie, tady ŭ jaje było 923 tradycyjnyja filižanki, atrymanyja ad žančyn Srebranicy, jakija tady stracili blizkich padčas raźni.
Ekspazicyja rasła z kožnym hodam dziakujučy achviaravańniam filižanak ad baśnijskaj dyjaspary abo minakoŭ, jakija dapamahli pavialičyć kalekcyju da bolš za 8000, što adpaviadała viadomaj kolkaści achviar.
Kali ŭ piatnicu vałanciory ŭstaloŭvali mora kieramičnych kubkaŭ na łuzie pobač ź miemaryjalnym centram Srebranicy, zapłakany mužčyna napoŭniŭ šeść filižanak u pamiać ab šaści svajakach, jakich jon straciŭ padčas raźni.
«Heta miesca, dzie im samaje miesca. Jany tut, kab zastacca», — skazała Aida Šechavič. Jana sama biežanka kanfliktu 1992-95 hadoŭ.
Ciapier čytajuć
U milicejskim konkursie pryhažości pieramahła amapaŭka, jakaja ŭ 2020 hodie razhaniała pratesty42
Kamientary