Rasija moža vykarystoŭvać abmiežavańni na ekspart pšanicy ŭ jakaści instrumienta palityčnaha ŭździejańnia. Da takoj vysnovy pryjšoŭ amierykanski časopis The National Interest.
Vydańnie adznačaje, što ciapier Rasija źjaŭlajecca najbujniejšym eksparcioram pšanicy ŭ śviecie, u 2028 hodzie čakajecca, što jana budzie kantralavać 20% hłabalnaha rynku zbožža. Hety ŭpłyŭ moža ŭzmacnicca dziakujučy ŭvodu ŭ abaračeńnie novych sielskahaspadarčych ziamiel.
«Rasija moža zrabić ekspart [pšanicy] palityčnym ryčahom. Jana mahła b vykarystoŭvać jaho dla ŭpłyvu na krainy z charčovaj niestabilnaściu», — piša časopis.
U jakaści prykładu the National Interest padaje kvotu na ekspart pšanicy i inšych vidaŭ zbožžavych kultur u pieryjad pandemii karanavirusa. «Dziejańni Rasii pryviali da taho, što inšyja krainy paśpiašalisia pavialičyć svaje zapasy zbožža, dadaŭšy dadatkovyja vydatki biudžetam», — tłumačyć vydańnie.
Aŭtary publikacyi adznačajuć, što Maskva nie ŭpieršyniu abmiažoŭvaje ekspart pšanicy — heta adbyvałasia ŭ 2010 hodzie praz zasuchi. Tady nastupstvami zabarony stała pavyšeńnie cen na pradukty charčavańnia va ŭsim śviecie. U časopisie adznačyli, što i dziesiać hadoŭ tamu, i ciapier Rasija ŭviała ekspartnyja kvoty niahledziačy na ŭłasnyja značnyja zapasy zbožža.
«Uličvajučy vykarystańnie Rasijaj svajoj resursnaj mocy, jaje rola na suśvietnych rynkach pšanicy vyklikaje zaniepakojenaść», — havorycca ŭ artykule. Jaho aŭtary śćviardžajuć, što Maskva moža vykarystoŭvać charčovuju biaśpieku jak zbroju ŭ «mižnarodnaj hibrydnaj vajnie». I takija pavodziny stvarajuć niebiaśpieku dla inšych krain.
U kancy sakavika Minsielhas RF prapanavaŭ ustalavać časovuju kvotu na vyvaz rasijskaj pšanicy i šerahu inšych zbožžavych kultur za miažu dla strymlivańnia cen ŭnutry krainy. Da 26 krasavika Rasija całkam vybrała hetuju kvotu i spyniła ekspartavać zbožža za vyklučeńniem krain JEAES. Pastaŭki adnavilisia paśla 1 lipienia, adznačaje rbc.ru.
Paśla hetaha Bloomberg paviedamiŭ pra deficyt rasijskaj pšanicy na mižnarodnym rynku. U suviazi z hetym mnohija krainy pasprabavali naraścić abjomy impartu zbožža na fonie pandemii karanavirusa.
Kamientary