Natallu Leaniuk, siastru Vieraniki Capkała, zaprašali ŭ orhany dla dačy pakazańniaŭ śviedak pa spravie Valeryja Capkała — prasili prakamientavać zajavu Capkała «ab iłžeśviedčańni» biznesmena Ihdedžy, paviedamlaje Tut.by.
Ab zatrymańni Natalli Leaniuk Vieranicy Capkała paviedamili supracoŭniki Biełhazprambanka. Tam Leaniuk uznačalvaje adździeł manitorynhu, supravadžeńnia kredytnych apieracyj małoha biznesu.
— Kala banka da mianie padyšli troje ŭ cyvilnym, uručyli pozvu — zaprašeńnie dla dačy pakazańniaŭ. Skazali, «pa spravie Capkały», — raspaviała TUT.BY Natalla Leaniuk paśla taho, jak jaje adpuścili.
Pa słovach siastry, heta byli supracoŭniki ŭpraŭleńnia pa baraćbie z arhanizavanaj złačynnaściu. Ci prachodzić Natalla pa spravie jak śviedka, jana nie viedaje.
— Mianie sa statusam nie aznajomili, prosta skazali, što chacieli b, kab ja patłumačyła aznačanaje ŭ liście. Mnie začytali zvarot Valeryja Viljamaviča (Capkały). Napeŭna, heta była jaho zajava. Ja skazała, što patłumačyć niejkija rečy nie mahu ŭ siłu niaviedańnia, i skarystałasia svaim pravam zhodna z artykułam 27 Kanstytucyi nie śviedčyć suprać blizkich, — raspaviała padrabiaznaści Natalla Leaniuk.
U pačatku lipienia Valeryj Capkała padavaŭ u prakuraturu zajavu na biznesoŭca Siedata Ihdedžy ab «iłžeśviedčańni» ŭ adkaz na inicyjavanuju pavodle zajavy Ihdedžy pravierku ab «supraćpraŭnaj dziejnaści».
Pryčynu vykliku dla dačy pakazańniaŭ pravaachoŭnyja orhany patłumačyli tym, što samoha Valeryja Capkału niama ŭ krainie i ŭdakładnić patrebnuju im infarmacyju ŭ jaho asabista nie mohuć, tamu chočuć apytać svajakoŭ. Paśla nierehistracyi ŭ jakaści kandydata Capkała ź dziećmi pakinuŭ Biełaruś.
Raniej Vieranika Capkała paviedamlała, što jaje siastru ludzi «ŭ cyvilnym» pavieźli ŭ nieviadomym kirunku. «Pa vonkavym apisańni heta byli tyja ž supracoŭniki, jakija ŭručali pozvu i mnie», — adznačała jana.
— Ja tak razumieju, što nam ź joj u adzin čas uručali pozvy, tamu što jany sapraŭdy hetak ža chacieli, kab ja prajechała ź imi. Ale ŭ suviazi z tym, što ja jechała ŭ CVK, ja paprasiła, kab mianie nie zatrymlivali. Mianie adpuścili, — kazała Vieranika Capkała pierad tym, jak adpravicca davać pakazańni.
-
U Bierazinie pračnulisia pčoły. Dziaŭčynka, jakaja ich pabačyła, skaryła tyktok
-
«Biełarusy i ŭ Dubai biełarusy». Jak suajčyńniki arhanizavali dapamohu tym, chto nie moža viarnucca damoŭ praz zakrytaje nieba
-
«Pad kaniec adpačynku daviedalisia, što tut niama schoviščaŭ». Biełarusy, što znachodziacca ŭ AAE, raskazali, jak im tam ciapier
Pahražaŭ vajskoŭcam raskryć, chto ź ich homaseksuał, kab vypytać sakrety i pradać Ukrainie. Voś za što adyjozny funkcyjanier BRSM atrymaŭ 17 hadoŭ kałonii10
Kamientary