Dziesiać śviedkaŭ: padletak, na jakoha zaviali kryminalnuju spravu, kidaŭ u milicejskija mašyny nie kamiani, a śniežki
Na 16-hadovaha minskaha liceista zaviali kryminalnuju spravu za toje, što jon niešta kinuŭ u milicejskuju mašynu. Ale što kinuŭ? Siłaviki śćviardžajuć, što kamień, ale jość bolš za dziesiać čałaviek, jakija pierakonvajuć: u aŭto palacieła śniežka.
Padborka ź piaci videa ź miesca padziej:
Incydent adbyŭsia dniom 29 listapada na vulicy Rusijanava ŭ Minsku. Va Uruččy ŭ hety čas prachodziŭ Marš susiedziaŭ. Voś što śviedki paviedamili «Našaj Nivie» praz telehram-bot:
«Hetyja chłopcy chvilin dziesiać kidalisia śniežkami ŭ bok DAI, amal nikoli nie traplali, byvała, navat prylatała pad nohi pratestoŭcam. Starejšyja kazali: chłopčyki, moža, nie treba kidacca? Ale mocna nichto nie spyniaŭ, jano i zrazumieła čamu, bolšaść navat była «za», — piša vidavočca.
«Ja stajaŭ na prypynku hramadskaha transpartu nasuprać univiersama i ŭvažliva naziraŭ za dziejańniami padletkaŭ. Jany prosta kidalisia śniežkami ŭ aŭtazak, jaki stajaŭ, potym u mašyny MUS, što prajazdžali mima. Ja chaču źviarnuć uvahu na toje, što śniehu na ziamli nie było, a tolki na mašynach na parkoŭcy. Ja bačyŭ, jak jany brali śnieh z mašyn, lapili śniežki i kidalisia. Śnieh byŭ mokry, i tamu supracoŭnikam u mašynie mahło zdacca pa huku, što heta kamień», — adznačaje inšy čałaviek.
Momant, kali chłopcu ŭdałosia patrapić u aŭtazak, trapiŭ na videa.
Treci śviedka kaža, što za chvilin 15 da incydentu, chłopcam udałosia trapić śniežkaj u mašynu DAI:
«Jany pierabiahali skryžavańnie na zialonaje śviatło i raptam kinuli śniežku u łabavoje škło mašyny DAI. Inśpiektary nijak nie adreahavali, a prosta dvornikami źmiali śnieh i stajali nieruchoma. Chłopcy schavalisia ŭ dvarach. Praz chvilin 15-20 znoŭ źjavilisia na haryzoncie i za mietraŭ 10 ad mianie lapili śniežki. Padjechała inšaja milicejskaja mašyna, i chłopcy ŭdvaich kinuli śniežki ŭ mašynu i stali ŭciakać. Chłopiec, jakoha zatrymali, nakolki pamiataju, trapiŭ u škło. Druhi chłopiec pramachnuŭsia. Pobač sa mnoj stajaŭ nieznajomy mužčyna, i my adrazu pryjšli da vysnovy, što chłopca pryciahnuć pa kryminałcy, było cikava tolki, jak heta napišuć. Kamień — absalutnaja vydumka, usio było na maich vačach».
«Milicejskaja mašyna stajała na śviatłafory. Adzin chłopiec trapiŭ u bakavoje škło, druhi pramachnuŭsia. Mašyna pahnałasia za imi pa tratuary», — piša čaćviorty čałaviek.
Heta važny momant. Ludzi kažuć, što śniežka prylacieła ŭ bakavoje škło, ale nie paškodziła jaho. Milicyja ž pakazvaje ŭvahnutaść kala levych zadnich dźviarej aŭtamabila. Adkul tudy mohła prylacieć śniežka ci navat kamień? Tolki z supraćlehłaha boku darohi. Ale na milicejskim videa nie vidać, kab chłopcy pierabiahali darohu. Jany stajali na pravym tratuary adnosna mašyny siłavikoŭ.
Na videa čuvać razmovu ŭnutry milicejskaha aŭto. «Chto kinuŭ?» — «Małaletka». Pačynajecca pahonia pa piešachodnych darožkach. Jana praciahnułasia niadoŭha. Mašyna spyniłasia, adzin ź siłavikoŭ kinuŭsia ŭ dvary za chłopcam, na hetym milicejskaje videa skančvajecca. Što ž adbyvałasia paźniej?
«Paśla spynieńnia aŭto adzin milicyjant pabieh z dubinkaj za chłopcam, a druhi vyjšaŭ na vulicu i stajaŭ kala mašyny. Da jaho padyšli čałaviek 15, pačali kryčać «hańba» i toje, što nie treba zatrymlivać chłopca. Na što hety zvyšrozum (milicyjanier) dastaŭ tabielnuju zbroju i pačaŭ joj razmachvać», — piša piaty śviedka.
«Tam byŭ śmiešny momant, kali milicyjanier z pasažyrskaha miesca vylez, paśliznuŭsia i zvaliŭsia, čym vyklikaŭ zachapleńnie ŭ publiki. Pistaletam razmachvaŭ kiroŭca (siaržant, dakładna nie aficer), kali vyjšaŭ z mašyny i pačuŭ na svoj adras usio, što pra jaho dumajuć ludzi. Ščyra kažučy, ździŭleny, što chłapčukoŭ zmahli dahnać. Za imi pahnaŭsia tolki adzin supracoŭnik, i ŭ ich była fora. Padazraju, što niechta ŭ dvarach «dapamoh», — voś mierkavańnie šostaha čałavieka.
«Na padmohu da ich vyskačyła druhaja milicejskaja mašyna prosta z dvara. Chłopca adnaho złavili, pry hetym dobra prykłalisia pa hałavie, pasadzili ŭ mašynu, i abiedźvie mašyny źjechali tak ža pa tratuary», — raskazvaje siomy śviedka.
«Z druhoha boku vulicy (nasuprać univiersama «Pieršamajski») u naš bok puścilisia 2 atrady ŭnutranych vojskaŭ i pačali hojsać pa dvarach, usie raźbiehlisia», — padsumoŭvaje vośmy ŭdzielnik incydentu.
Jašče čatyry čałavieki, nie źviazanyja z papiarednimi vaśmiu, inšymi słovami pisali tyja ž padrabiaznaści historyi.
Milicyja paviedamiła, što ŭ dačynieńni da padletka zaviali spravu pa artykule 342 Kryminalnaha kodeksa.
Što jamu inkryminujecca? «Arhanizacyja hrupavych dziejańniaŭ, jakija hruba parušajuć hramadski paradak i źviazanyja ź jaŭnym niepadparadkavańniem zakonnym patrabavańniam pradstaŭnikoŭ ułady abo jakija paciahnuli parušeńnie raboty transpartu, pradpryjemstvaŭ, ustanoŭ abo arhanizacyj, abo aktyŭny ŭdzieł u takich dziejańniach». Pakarańnie — ad štrafu da 3 hadoŭ źniavoleńnia.
Ciapier čytajuć
Pahladzieli film «Piaščotna da siabie», źniaty pa dzika papularnaj biełaruskaj knizie — pra zaciukanuju žančynu, jakuju chočuć zrabić dla ŭsich zručnaj33
Kamientary