Ukrainskija daradcy byli ŭ šoku, kali ŭ Piersidskim zalivie na adnu cel vypuskali vosiem rakiet Patriot — ahulnym koštam $25 miljonaŭ

Za čatyry hady poŭnamaštabnaj vajny Ukraina stvaryła adnu z samych efiektyŭnych sistem SPA ŭ śviecie. Pavodle ŭkrainskich vajennych, jana źniščyła kala 140 tysiač pavietranych celaŭ — ad rakiet i bombaŭ da samalotaŭ i dronaŭ. Bolš za 44 000 ź ich — drony typu «Šachied», jakija ciapier atakujuć bazy ZŠA na Blizkim Uschodzie.

Adnak, niahledziačy na hety dośvied, palityčnaje kiraŭnictva ZŠA nie śpiašajecca jaho vykarystoŭvać. Donald Tramp publična adchiliŭ prapanovu Kijeva ab dapamozie, zajaviŭšy, što Zialenski — «apošni čałaviek», ad jakoha ZŠA patrebna dapamoha.

Ekśpierty ličać taki padychod niedalnabačnym. Pavodle analitykaŭ, Ukraina stała adnym z suśvietnych lidaraŭ u arhanizacyi sistem kiravańnia i kaardynacyi SPA — asabliva va ŭmovach masavanych atak i źmiašanych pahroz.

Ukrainskaja sistema — adna z samych składanych u śviecie: jana zdoleła intehravać savieckuju spadčynu i sučasnyja technałohii NATA, stvaryŭšy šmatuzroŭnievy padychod, jaki ŭklučaje sučasnyja srodki radyjoelektronnaj baraćby, źniščalniki, viertaloty, zienitna-rakietnyja kompleksy Patriot, drony-pierachopniki i zvyčajnyja kulamioty.

Mienavita ŭkrainski front staŭ palihonam dla vyprabavańnia amierykanskich antydronavych sistem, takich jak Merops. I choć ZŠA zdolnyja samastojna maštabavać vytvorčaść, mienavita ŭkrainski dośvied zrabiŭ hetyja sistemy efiektyŭnymi.

Heta paćviardžajecca tym, što, nasupierak rytorycy Trampa, Centralnaje kamandavańnie ZŠA ŭsio ž zapytała ŭkrainskich śpiecyjalistaŭ. Ciapier kala 200 ukrainskich aficeraŭ-daradcaŭ razhornutyja ŭ Kuviejcie, Katary, AAE i Saudaŭskaj Aravii, kab dapamahčy sajuźnikam vybudavać efiektyŭnuju abaronu.

Pavialičyć

Krainy Piersidskaha zaliva traciać miljardy

Ukrainskija aficery, jakija pracujuć u Piersidskim zalivie, nie chavajuć svajho ździŭleńnia ad taho, jak tam vykarystoŭvajuć zachodniaje ŭzbrajeńnie. U toj čas jak ukrainskija ekipažy vykarystoŭvajuć adnu-dźvie rakiety dla pierachopu składanych balistyčnych celaŭ, u Zalivie fiksavalisia vypadki, kali pa adnoj celi vypuskali da vaśmi rakiet Patriot. Kožnaja takaja rakieta kaštuje bolš za $3 miljony, i marnavać ich na tannyja drony — heta nie prosta marnatraŭstva, a stratehičnaja pamyłka ŭ vajnie na źniasileńnie.

Jašče bolš pakazalny prykład — vykarystańnie rakiety SM-6 koštam kala $6 miljonaŭ dla źniščeńnia drona za $70 tysiač. U vyniku tannyja drony ŭžo nanieśli sajuźnikam ZŠA škodu na miljardy dalaraŭ.

Bolš za toje, niedastatkovaja mabilnaść kaštavała ZŠA kałasalnych strat: radar rańniaha papiaredžańnia koštam miljard dalaraŭ i jak minimum adzin radar dla sistemy supraćrakietnaj abarony vialikaj vyšyni i dalokaści dziejańnia THAAD (Terminal High Altitude Area Defence) koštam kala $300 miljonaŭ byli źniščanyja iranskimi dronami prosta tamu, što dva miesiacy stajali na adnym miescy i byli bačnyja na spadarožnikavych zdymkach.

Ukraincy ž za čas vajny stali majstrami maskiroŭki i chutkaha manieŭru, asabliva kali havorka idzie pra ich sistemy SPA. Jany navučylisia razhortvać i zhortvać batarei Patriot značna chutčej, čym heta praduhledžana amierykanskimi instrukcyjami.

Ukrainskija aficery taksama źviartajuć uvahu na prablemy z kaardynacyjaj. Pieršaha sakavika SPA Kuviejta pamyłkova źbiła try amierykanskija źniščalniki F-15E, jakija pieraśledavali bieśpiłotniki.

Ukrainskija śpiecyjalisty nazyvajuć heta vidavočnaj chałatnaściu. Analiz pakazvaje, što roźnica ŭ padychodach zaklučajecca ŭ čałaviečym faktary: u krainach Zaliva raźliki časta pakidajuć batarei i sychodziać u schoviščy, pakidajučy Patriot u aŭtamatyčnym režymie. Ukraincy ž zaŭsiody zastajucca za pultami, pracujučy ŭ ručnym režymie, što dazvalaje adroźnić siabroŭski samalot ad varožaha BPŁA.

Ukrainski dośvied pakazaŭ, što Patriot moža być nie tolki abarončaj, ale i nastupalnaj zbrojaj. Adzin z pakazalnych epizodaŭ — źniščeńnie rasijskich samalotaŭ nad Branskaj vobłaściu ŭ 2023 hodzie. Ukrainski raźlik Patriot padmanuŭ praciŭnika, chutka razharnuŭ sistemu kala miažy, nanios udar i imhnienna źmianiŭ pazicyju.

Pavialičyć

Akramia taho, ukrainskija zienitniki vypracavali ŭnikalnuju taktyku suprać najnoŭšych balistyčnych rakiet, jakija vykarystoŭvajuć składanyja trajektoryi dla padmanu sistem. U takich vypadkach jany adklučajuć aŭtamatyku i spadziajucca tolki na žaleznyja niervy, vypuskajučy rakietu-pierachopnik u apošnija siekundy pierad udaram. Hety dośvied kalektyŭnaj pracy i adsutnaści vahańniaŭ dazvalaje źbivać pa 12 kryłatych rakiet za dźvie chviliny.

Vysnova ŭkrainskich vajskoŭcaŭ adnaznačnaja: nivodnaja kraina śvietu nie pavinna być samaŭpeŭnienaj u pytańniach SPA. Vajna va Ukrainie — heta kanflikt zusim inšaha typu, anałahi jakoha adsutničajuć u suśvietnaj historyi. Ihnaravańnie ŭrokaŭ hetaj vajny moža kaštavać sajuźnikam nie tolki miljardaŭ dalaraŭ, ale i parazy ŭ budučych sutyknieńniach.

• 31
• 1
• 1
• 2
• 1
• 0
• 1
• 0