Navukoŭcy Zachadu takuju teoryju asprečvajuć.
Suśvietnaja arhanizacyja achovy zdaroŭja praviaraje, ci nasamreč mahčyma zarazicca na karanavirus praz zamarožanyja pradukty. Takuju teoryju sprabuje raspaŭsiudzić Kitaj, a ZŠA i krainy ES vystupajuć suprać dadatkovych pravierak svaich tavaraŭ, paviedamlaje amierykanskaje vydańnie The Wall Street Journal.
Piekin źviazvaje niadaŭnija ŭspyški kavidu z zamarožanymi praduktami. Mienavita tamu kraina ŭviała abaviazkovyja testy i dezynfiekcyju zamiežnych tavaraŭ. Kitaj śćviardžaje, što ślady virusa znajšli na ŭpakoŭkach amierykanskaj śvininy, saudaŭskich krevietak i brazilskaj jałavičyny. U toj ža čas ZŠA i krainy ES asprečvajuć dokazy, pradastaŭlenyja navukoŭcami ź Piekina. Urady hetych krain rychtujuć sumiesny list Piekinu, dzie pierakonvajuć, što takija abmiežavańni niematyvavanyja i niama ryzyki raspaŭsiudžvańnia kavidu praz chałodny łancuh.
Kitaj užo patrabavaŭ u zamiežnych pastaŭščykoŭ dazvoł na videazdymku ich abjektaŭ. Niekatoryja partyi tavaraŭ sapsavalisia, pakul prachodzili testy na mytni i dezynfiekcyju. Častka kampanij admoviłasia ad ekspartu ŭ Kitaj, bo ličyć takija patrabavańni nieefiektyŭnymi.
Z krasavika 2020 hoda pandemiju ŭ Kitai ŭdałosia ŭziać pad kantrol, ale ŭ apošnija tydni pačali źjaŭlacca sotni novych vypadkaŭ zachvorvańnia. Urad Kitaja abvinavačvaje ŭ hetym hałoŭnym čynam impartnyja pradukty i ludziej, jakija viartajucca z-za miažy.
Fen Czycziań, namieśnik kiraŭnika Kitajskaha centra pa kantroli i prafiłaktycy zachvorvańniaŭ, u sieradu zajaviŭ, što žyvy virus znajšli na ŭpakoŭkach praduktaŭ chałodnaha łancuha, a taksama na niekatorych nieastudžanych praduktach. «Heta dakazvaje, što čałaviek moža zarazicca praz žyvyja virusy na pavierchni», — śćviardžaje jon.
Na veb-sajcie SAAZ havorycca, što virus moža vyžyvać na takich pavierchniach, jak kardon, płastyk i mietał. Ale dezynfiekcyja ŭpakovačnych materyjałaŭ paznačajecca jak niepatrebnaja, bo na siońnia niama dokazaŭ, što virusam, jaki apynuŭsia na ŭpakoŭcy i pravioŭ tam doŭhi čas, možna zarazicca. Pradstaŭniki SAAZ zrabili zapyt na źviestki, atrymanyja ŭ Kitai nakont karanavirusa na zamarožanych praduktach, ale adkaz pakul nie atrymali.
Niekatoryja ekśpierty śćviardžajuć, što adroźnieńni ŭ traktoŭcy dokazaŭ adlustroŭvajuć supraćlehłyja padychody da pandemii pamiž Kitajem i krainami Zachadu. Inšyja ekśpierty pierakananyja, što sprečku vyklikali palityčnyja i ekanamičnyja matyvy.
Doktar Baler paviedamlaje, što kamanda z Oksfardskaha ŭniviersiteta aceńvała prykładna 60 daśledavańniaŭ na temu zaražeńnia karanavirusam praz pavierchni i nie znajšła nivodnaha dokazu tamu, što možna zarazicca takim čynam.
Adnak kitajskija navukoŭcy śćviardžajuć, što virus raspaŭsiudžvajecca praz chałodny łancuh z momantu ŭspyški ŭ červieni, źviazanaj ź impartam łasosia.
Tym nie mienš urad Kitaja abnarodavaŭ tolki adzin vypadak, kali žyvy virus znajšli na zamarožanych tavarach. Heta była partyja impartnaj traski, jakaja, pa słovach urada, vyklikała ŭspyšku ŭ horadzie Cyndaa ŭ kastryčniku.
Va ŭsich astatnich vypadkach kitajskija daśledčyki znajšli tolki ślady hienietyčnaha materyjału virusa z dapamohaj palimieraznaj łancuhovaj reakcyi, praź jakuju niemahčyma vyjavić, ci zarazny taki virus.
Navukoŭcy ź inšych krain, jakija vyvučajuć vierahodnaść zaražeńnia praz pavierchniu, śćviardžajuć, što praz zamarožanyja pradukty pieradača virusa małavierahodnaja. Kolkaść žyćciazdolnaha virusa źmianšajecca ŭ 10 razoŭ paśla zamarožvańnia i razmarožvańnia, paviedamlaje Vinsent Miunster, virusny ekołah z Nacyjanalnaha instytuta alerhii i infiekcyjnych zachvorvańniaŭ ZŠA.
Ciapier čytajuć
Koŭł Łukašenku: Tabie treba być bolš aściarožnym, za stałom kiepskich pacanoŭ zastaŭsia adzin ty17
Kamientary