Baćki prasili adpuścić syna — usich traich zabrali na Akreścina i dali maksimalna mahčymyja sutki
Na Akreścina adpravili cełuju siamju Rudzioŭ — baćku, maci i syna.
Uładzimira, Śviatłanu i ich syna Andreja zatrymali 23 studzienia kala stancyi mietro «Spartyŭnaja».
«Heta było niedzie ŭ 15:30. Jany išli ŭ mietro, kali na darozie spyniŭsia busik i adtul vyskačyli siłaviki. Jany pabiehli za bratam i jašče adnym chłopcam u šapcy Dzieda Maroza. Brata zatrymali ŭ dvarach. Baćki padyšli, prasili adpuścić jaho. Im spačatku kazali syści. A paśla prapanavali prajechać u RUUS i tam usio vyrašyć», — raskazvaje dačka Hanna.
Z adździaleńnia nikoha ŭžo nie vypuścili.
U pratakole siamji napisali, što jany pikietavali na vulicy Bielskaha. Baćku Uładzimiru nakinuli jašče i artykuł za «niepadparadkavańnie» — pabačyli, što raniej jaho ŭžo zatrymlivali (u listapadzie paśla maršu mužčyna adsiedzieŭ 15 sutak). Pa viersii milicyi, jon supraciŭlaŭsia zatrymańniu i sadziŭsia na ziamlu.
U paniadziełak asudzili syna i maci — sudździa Frunzienskaha rajona Julija Čyž dali im pa 15 sutak. Pasiadžeńnie pa baćku adkłali na aŭtorak. Dačka ceły dzień źbirała videa z kamier nazirańnia doma, dzie dobra vidać, što baćka pavodziŭ siabie spakojna. Sud dvojčy rabiŭ pierapynak, kab vyvučyć zapisy.
Što źmianiłasia? Viersija śviedki-milicyjanta: jon raspavioŭ na pasiadžeńni, što Uładzimir sapraŭdy da busa prajšoŭ samastojna, ale ŭžo pierad dźviaryma nibyta pačaŭ upiracca. Sudździa Ała Skuratovič pakarała mužčynu 25 sutkami.
Andreju 20, jon student.
«Studenty — lubimaja katehoryja ŭ sudach, tamu ja razumieła, što biez šancaŭ. Dumaju, brat taksama. Bolš za ŭsio pieražyvała za maci, jakoj 55 hod — čamu b joj nie vypisać chacia b štraf?» — zasmučvajecca dziaŭčyna.
Paśla suda jana jeździła ŭ CIP pieradać leki baćkam — jany sardečniki.
Kamientary