Vykładčykaŭ BDU, jakich zatrymali ŭ dzień pryjezdu Łukašenki va ŭniviersitet, asudzili na 14-15 sutak za «niepadparadkavańnie»
29 studzienia Alaksandr Łukašenka pryjazdžaŭ u BDU — razmaŭlać sa studentami. U hety ž dzień stała viadoma ab zatrymańni troch vykładčykaŭ univiersiteta.
Dvaich ź ich — Paŭła Piatrova z fakulteta radyjofiziki i kampjutarnych technałohij i jaho byłuju kalehu Śviatłanu Vołčak — sudzili za niepadparadkavańnie pa artykule 23.4 KaAP. Nastupnyja 14-15 dzion jany praviaduć pad aryštam, piša Tut.by.
Byłuju vykładčycu BDU i ŭdzielnicu strajkama ŭniviersiteta Śviatłanu Vołčak zatrymali ranicaj 29 studzienia. Jana paśpieła napisać, što dźviery jaje kvatery ŭzłomvajuć. Paśla hetaha suviaź ź joj źnikła. U toj ža dzień jaje sudzili ŭ sudzie Frunzienskaha rajona Minska pa artykule 23.4 KaAP (Niepadparadkavańnie zakonnamu rasparadžeńniu ci patrabavańniu słužbovaj asoby pry vykanańni im słužbovych paŭnamoctvaŭ). Jak paviedamlajuć svajaki i vałanciory, eks-vykładčycu BDU pryznali vinavataj i pryznačyli 14 dzion aryštu.
Razam sa Śviatłanaj zatrymali i jaje muža Michaiła Vołčaka. Jaho taksama sudzili pa artykule 23.4. Rašeńnie suda — 15 sutak aryštu.
Pavieł Piatroŭ — adzin sa stvaralnikaŭ biełaruskaha spadarožnika BSU Sat-1 — vykładaŭ na fakultecie radyjofiziki i kampjutarnych technałohij BDU. Jaho taksama zatrymali ranicaj 29 studzienia, a 1 lutaha asudzili pa artykule 23.4.
U pratakole paznačana, što Pavieł Piatroŭ akazaŭ supraciŭ, kali supracoŭniki orhanaŭ vyvodzili jaho z padjezda: jon trymaŭsia za poručni, siadaŭ na ziamlu, upiraŭsia nahami. U svaich tłumačeńniach sudu vykładčyk raspavioŭ, što kala 10-j ranicy 29 studzienia da jaho pryjšli vosiem supracoŭnikaŭ milicyi, jakija ŭ prysutnaści paniatych kanfiskavali ŭ jaho techniku. Paśla jaho pavieźli ŭ RUUS, ciapier jon znachodzicca na Akreścina. Nijakaha supracivu, śćviardžaŭ Pavieł, jon nie akazvaŭ. Sud Frunzienskaha rajona vyrašyŭ, što vina vykładčyka dakazanaja, — i pryznačyŭ jamu 15 sutak aryštu.
Akramia hetaha, uviečary 28 studzienia zatrymali vykładčycu hieahrafičnaha fakulteta BDU Volhu Kavaleŭskuju. Na jaje skłali dva pratakoły — pa artykułach 23.34 i 23.4 KaAP. 29 studzienia jaje spravu razhledzieli ŭ sudzie Frunzienskaha rajona i, pavodle infarmacyi vałancioraŭ, nakiravali na dapracoŭku.
Ciapier čytajuć
«Jana daŭnavata ŭ Biełarusi». Baćka Anžaliki Mielnikavaj pryznaŭsia, što jana žyvaja i zdarovaja100
Kamientary