Palitźniavolenaja Natalla Chierše: Stres tut paŭsiul, pačynajučy z padjomu

Natalla Chierše ŭžo prajšła abaviazkovy karancin, a ciapier pačała pracu.

Brat Chierše Hienadź raspavioŭ spring96.org, što spačatku Natalla pracavała «na mašynie», potym jaje pieraviali abrazalnicaj nitak. Jana prasiła dazvolić joj pracavać u krasoŭkach, bo tam heta zabaroniena. Na pracu nie skardzicca, choć «na mašynie» joj było bolš pryjemna pracavać. Akramia taho, jana prymała tabletki paśla vychadu z haładoŭki, ciapier užo skončyła. Stan zdaroŭja ciarpimy.

Natalla čakaje, kali jaje zmoža naviedać u kałonii šviejcarski ambasadar. Adnosiny z boku načalstva kałonii narmalnyja. Haładać jana bolš nia maje namieru.

U novym liście palitźniavolenaja piša bratu, što «sustrakać viasnu ŭ kałonii — heta jak minimum žorstka!», ale jana imkniecca «zastavacca na pazityvie». Akramia taho, Natalla Chierše apisvaje svaje ŭmovy pracy ŭ kałonii.

«Siońnia niadziela — adzin vychodny na 14 dzion. Na fabrycy praca doŭžycca 6 hadzin plus kala hadziny na pachod u stałovuju».

Natalla skardzicca na toje, što času nastolki mała, što dapisać adzin list joj nie zaŭsiody ŭdajecca adrazu. Jak nie chapaje i času narmalna pajeści, bo ŭ atradzie 100 čałaviek, paśla viartańnia z pracy kožny choča padjeści, u vyniku ŭsie śpiašajucca paśpieć pierad pravierkaj, a paśla jaje adrazu «viektar» — kalektyŭny prahlad videamateryjału, u stałovaj nichto znachodzicca ŭžo nie moža.

Raniej Natalla prasiła ŭ brata dasłać joj spartovyja štany, pakolki płanavała zajmacca sportam, ale ŭ liście za 27 sakavika napisała, što jany ŭžo naŭrad ci spatrebiacca, bo «spartovyja zały tut dla «hałački», a mahčymaści ich naviedvać u ludziej niama».

«Akramia pracy tut jašče kuča roznych dziažurstvaŭ, raznaradak, invientarnych rabot, pracy pa čystcy harodniny — to-bok pracy pa kalektyŭnym samaabsłuhoŭvańni. Za ŭvieś tydzień u mianie nie atrymałasia ni razu vypić harbaty paśla pracy».

Natalla nie viedaje, jak heta nazvać, — pakarańniem za złačynstva, jakoje jana asabista nie ździajśniała, abo ździekam, prynižeńniem čałaviečaj hodnaści. Ciapier jana čakaje Praviłaŭ unutranaha rasparadku, kab, u pryvatnaści, pahladzieć, čamu joj zabaroniena atrymlivać pierapisku z palityčnymi navinami.

Taksama Chierše narakaje, što stres u kałonii «ŭsiudy, pačynajučy z padjomu».

Hramadzianku Šviejcaryi Natallu Chierše, naradženku Oršy, 7 śniežnia 2020 hodu asudzili pa častcy 2 artykuła 363 (Supraciŭ supracoŭniku orhanaŭ unutranych spraŭ — jana sarvała babałkłavu) na 2,5 hoda pazbaŭleńnia voli ŭ papraŭčaj kałonii ahulnaha režymu.

Napisać palitźniavolenaj možna pa adrasie: PK № 4. 246035, h. Homiel, vuł. Antoškina, 3.

• 0
• 0
• 0
• 0
• 0
• 0
• 0
• 0