Čechija vyšle 18 rasijskich dypłamataŭ i abviaściła ŭ vyšuk Piatrova i Bašyrava. Padazrajuć ich datyčnaść da vybuchaŭ u 2014-m
MZS Čechii zajaviła pra vysyłku 18 rasijskich dypłamataŭ, paviedamlaje vydańnie Novinky sa spasyłkaj na ministra zamiežnych spraŭ krainy Jana Hamačeka, piša RBK.
Pa jaho słovach, hetyja ludzi byli identyfikavanyja jak supracoŭniki HRU i Słužby źniešniaj raźviedki (SVR). Dypłamatam dali 48 hadzin na toje, kab pakinuć Čechiju.
Pasolstva Rasii ŭ Prazie paviedamiła, što češski bok apaviaściŭ rasijski ab vysyłcy supracoŭnikaŭ dypmisii.
Taksama palicyja Čechii abviaściła ŭ vyšuk mierkavanych supracoŭnikaŭ HU Hienštaba Minabarony (byłoje HRU) Alaksandra Piatrova i Rusłana Bašyrava, havorycca ŭ paviedamleńni viedamstva. Ich ža brytanskaja raźviedka padazravała ŭ datyčnaści da atručvańnia byłoha rasijskaha vyviednika Siarhieja Skrypala i jahonaj dački Julii ŭ Sołśbiery.
Vyšuk abvieščany «ŭ suviazi z rasśledavańniem abstavinaŭ ciažkaha złačynstva».
Paviedamlajecca, što ŭ kastryčniku 2014 hoda i, u pryvatnaści, 16 kastryčnika, jany pryjazdžali ŭ Prahu, zatym — u Źlinski kraj.
16 kastryčnika 2014 hoda ŭ vioscy Vrbiecice Źlinskaha kraja adbyłasia sieryja vybuchaŭ na składach bojeprypasaŭ. U subotu, 17 krasavika, premjer-ministr Čechii Andrej Babiš zajaviŭ, što Praha vyjaviła rasijski śled u arhanizacyi vybuchaŭ.
Kamientary