Stali viadomyja proźviščy chłopcaŭ na «Teśle», što ŭklučyli «Mury» kala Akreścina i trapili ŭ izalatar
Pravaabaroncam «Viasny» stali viadomyja proźviščy zatrymanych chłopcaŭ, jakich aryštavali za toje, što jany ŭklučyli pieśniu «Mury» ŭ mašynie pad ścienami Akreścina. Za rulom mašyny byŭ 33-hadovy Rusłan Bahdanoŭski, proźvišča druhoha chłopca — Kanavałaŭ.
Jak raspaviadajuć byłyja sukamierniki, chłopcy vyrašyli padtrymać aryštantaŭ, jakija znachodziacca na Akreścina pa palityčnych artykułach, hučna ŭklučyŭšy ŭ Tesla pieśniu «Razbury turmy mury».
Kala 14:30 jany padjechali da CIPa, ale prastajali tam niadoŭha — adrazu padbiehła administracyja i jany vymušanyja byli źjechać. Pa słovach sukamiernikaŭ, praź dźvie hadziny ich užo zatrymali.
Sud pakaraŭ chłopcaŭ 15-sutačnymi aryštami, ale potym na ich znoŭ skłali pratakoły. Nieviadoma, ci vyjšli Bahdanoŭski i Kanavałaŭ na volu.
Rusłana razam ź siabram doŭhi čas trymali ŭ roznych karcarach u niečałaviečych umovach. Dakładna viadoma, što z 15 pa 25 kastryčnika jany znachodzilisia ŭ karcary, ale sukamierniki kažuć, što pa druhich pratakołach ich taksama kinuli tudy. U karcary za hety čas adrazu znachodzilisia vosiem čałaviek, i tolki ŭ adzin dzień ich było čaćviora.
Jak raspaviadaje były aryštant, u karcary pamieram 1,8 na 3,5 mietra, lehčy mohuć tolki šeść čałaviek. Pry hetym zvyčajna tam znachodzilisia adrazu vosiem aryštantaŭ. Padłoha ŭ karcary biatonnaja. Śviatło ŭklučanaje zaŭsiody. Ciopłyja rečy aryštantam zachoŭvać zabaroniena, tamu ich zabiraje administracyja Akreścina. Sa srodkaŭ hihijeny — tolki tualetnaja papiera i myła. Čas ad času ŭ karcary zabaraniałasia siadzieć, tamu niekalki razoŭ aryštantam prychodziłasia stajać uvieś dzień. «Šmon» tam prachodzić trojčy dniom i trojčy nočču.
Adna z žančyn, jakaja siadzieła ŭ hety čas u sumna viadomaj žanočaj kamiery №15, raspaviała, što jany z astatnimi žančynami čuli «Mury» ŭ svajoj kamiery na trecim paviersie CIPa. Jany adrazu kinułsia da akienca z kratami i pačali płakać ad radaści — dumali, što ich vyzvalajuć.
«Paśla zvanka mnie pryśniŭsia čorny pacuk, jaki ŭčapiŭsia ŭ ruku». Ekskursavodka Aksana Mankievič pra svajo zatrymańnie i adsidku ŭ toj samaj kamiery №15
Ciapier čytajuć
Čamu YouTube vydaliŭ kanały BiełTA, STB i ANT? Voś što viadoma4
Kamientary