Ranicaj 1 sakavika centralnaja płošča Charkava trapiła pad udar rasijskich vojskaŭ. Heta tolki adna z prykmiet taho, jak Maskva z prykraści, što chutkaja pieramoha nie atrymałasia, atakavała žyłyja rajony ŭkrainskich haradoŭ, kab demaralizavać abaroncaŭ krainy.
Uvarvańnie Rasii va Ukrainu, što pačaŭ na minułym tydni Uładzimir Pucin, prachodzić bolš pavolna, čym hetaha čakała bolšaść vajennych analitykaŭ. Pryčyna — mocnaje supraciŭleńnie ŭkraincaŭ i łahistyčnyja prablemy, ź jakimi sutykajecca ruskaja armija, piša Wall Street Journal.
Pucin, jaki ličyć ruskich i ŭkraincaŭ adnym i tym ža narodam, spačatku ŭstrymlivaŭsia ad chaatyčnaha abstrełu žyłych rajonaŭ, padobnaha da tych abstrełaŭ, za dapamohaj jakich ruskija padparadkoŭvali sabie miaciežnuju Čačniu ŭ 1999-2000 hadach. Ale ž novyja masiŭnyja abstreły pakazvajuć, što jon vyrašyŭ źmianić taktyku, bo Maskva robić usio, kab złamać ukrainskaje supraciŭleńnie.
U aŭtorak u roznych častkach Ukrainy praciahnulisia žorstkija bai, pry hetym rasijskija vojski prasunulisia napierad na poŭdni i sprabavali zajści ŭ Kijeŭ. Pa danych amierykanskich čynoŭnikaŭ, vialikaja kałona rasijskich vojskaŭ ruchajecca ŭ napramku ŭkrainskaj stalicy z paŭdniovaha zachadu, heta paćviardžajuć i spadarožnikavyja zdymki.
U paniadziełak na terytoryi Biełarusi prajšoŭ pieršy raŭnd pieramoŭ ab miry pamiž Rasijaj i Ukrainaj, ale jon nie prynios nieadkładnych rezultataŭ. Baki damovilisia znoŭ sustrecca ŭ bližejšyja dni na ŭkrainska-polskaj miažy.
Raście ŭzrovień mižnarodnaj izalacyi Rasii, jaje finansavaja sistema chistajecca pad upłyvam zachodnich sankcyj, uviedzienych za vychodnyja. U paniadziełak rubiel rezka ŭpaŭ, a rasijski Centrabank padniaŭ staŭku refinansavańnia da 20%. ZŠA i ES abviaścili na praciahu vychodnych, što jany nie daduć Centrabanku mahčymaści vykarystoŭvać jaho zamiežnyja reziervy i, akramia inšych mier, adklučać šerah rasijskich bankaŭ ad sistemy SWIFT. Taksama ES zakryŭ svajo nieba dla rasijskich samalotaŭ.
Jak ukrainskija rehijony supraciŭlajucca ahresaru
Charkaŭ, druhi pa vieličyni horad Ukrainy, jaki maje pieravažna ruskamoŭnaje nasielnictva, žorstka supraciŭlaŭsia rasijskaj armii z samaha pačatku ŭvarvańnia. U paniadziełak rasijskija vojski abrynuli na jaho maksimalny ahoń z šmatstvolnych puskavych ustanovak. Padčas abstrełu, pa danym charkaŭskich uład, zahinuli nie mienš za 10 čałaviek, u tym liku troje dziaciej i ich baćki, jakija apynulisia ŭ spalenaj mašynie, kudy trapiła rasijskaja rakieta. Nie mienš za 40 charkaŭčan byli paranienyja.
Ranicaj u aŭtorak brytanskaja raźviedka śćviardžała, što Rasija ŭsio jašče nie zdoleła atrymać kantrol nad ukrainskaj pavietranaj prastoraj. Heta prymusiła rasijskuju armiju ŭ asnoŭnym pravodzić apieracyi ŭ načny čas, kab źnizić straty. Jak kažuć brytancy, vykarystańnie ciažkaj artyleryi ŭ ciesna zasielenych haradskich rajonach vielmi pavialičvaje ryzyku achviar siarod hramadzianskaha nasielnictva.
Usiu ranicu 1 sakavika ŭ Kijevie hučali sireny pavietranaj tryvohi i huk vybuchaŭ. Jak śćviardžaje ŭkrainski prezident, Kijeŭ — hałoŭnaja meta dla rasijskaj armii, jakaja žadaje vyvieści sa stroju hałoŭnuju enierhietyčnuju stancyju horada i pakinuć stalicu biez elektryčnaści.
Zhodna ź miascovymi ŭładami, za noč rasijskija vojski akružyli horad Chierson i ŭstalavali vakoł jaho svaje punkty propusku. Jość videazapisy taho, jak rasijskija patruli zatrymlivajuć u horadzie miascovych žycharoŭ mužčynskaha połu.
Hubiernatar Sumskaj vobłaści Dźmitryj Žyvicki śćviardžaje, što paśla abstrełu vajskovaj častki Hradami zahinuła nie mienš za 70 ukraincaŭ.
U Maryupali, vialikim horadzie na poŭdni krainy, situacyja taksama składanaja. Rasijskija vojski amal što akružyli jaho. Jak śviedčać miascovyja ŭłady, pad rasijski abstreł trapili elektryčnyja padstancyi, tamu ranicaj 1 sakavika bolšaść rajonaŭ horada zastałasia biez aciapleńnia abo elektryčnaści.
28 lutaha z Pucinym hutaryŭ prezident Francyi Emanuel Makron. Zhodna ź im, kiraŭnik Rasii pahadziŭsia padčas razmovy nie atakavać hramadzianskija abjekty i infrastrukturu i nie akružać Kijeŭ. Ale ž u minułych razmovach na praciahu hoda Pucin abiacaŭ Makronu nie napadać na Ukrainu.
Taksama ŭ paniadziełak Zialenski padpisaŭ zajaŭku Ukrainy na ŭstupleńnie ŭ ES. Ale, kali jaje i ŭchvalać, praces ustupleńnia moža zaniać hady i patrabuje šmatlikich reformaŭ.
Vialikaja častka nasielnictva Kijeva, jakoje da pačatku vajny składała try miljony, pakinuła stalicu. Zhodna z danymi AAN, z Ukrainy źjechali bolš za 520 tysiač čałaviek, i ŭ bližejšyja tydni kolkaść biežancaŭ moža dasiahnuć niekalkich miljonaŭ.
Kamientary