Ministr abarony Ukrainy papiaredziŭ, što rychtujecca pravakacyja. Rasijanie mohuć abstralać Biełaruś
Ministr abarony Ukrainy Alaksiej Reźnikaŭ źviarnuŭsia da biełarusaŭ i zajaviŭ, što rychtujecca pravakacyja: rasijanie mohuć abstralać biełaruskija nasielenyja punkty, kab apraŭdać uvod biełaruskich vajskoŭcaŭ va Ukrainu.
«Pavodle infarmacyi, u jakoj my całkam upeŭnienyja i jakuju paćvierdzili, u ciapierašni momant kamandavańnie rasijskich akupacyjnych vojskaŭ rychtuje sieryju kryvavych pravakacyj», — napisaŭ Reźnikaŭ.
Zhodna ź im, rasijskaja avijacyja rychtujecca nanieści ŭdar pa šerahu nasielenych punktaŭ na terytoryi Respubliki Biełaruś, jakija znachodziacca pablizu ad ukrainska-biełaruskaj miažy. U pryvatnaści, udaru źbirajucca padvierhnuć n. p. Kapani Stolinskaha rajona Bresckaj vobłaści.
«Dla maskiroŭki złačynstva Rasija maje namier ažyćciavić ataku z pavietranaj prastory Ukrainy. Meta pravakacyi — prymusić dziejučaje kiraŭnictva Biełarusi da vajny suprać Ukrainy. Maskva sprabuje paviazać vas kryvioju», — napisaŭ Reźnikaŭ.
«Ukrainskaje vojska nie płanavała, nie płanuje i nie budzie płanavać nijakich ahresiŭnych dziejańniaŭ suprać Biełarusi», — dadaŭ jon.
Reźnikaŭ źviarnuŭsia da biełarusaŭ z zaklikam nie dazvolić uciahnuć svaju krainu ŭ hetuju vajnu. «Zachavajcie žyćcio svaich blizkich! Nie dajcie Kramlu źniščyć budučyniu Biełarusi!» — napisaŭ jon.
Siońnia Alaksandr Łukašenka sustrakajecca z Uładzimiram Pucinym. Ci abmiarkoŭvajecca pytańnie ŭdziełu biełarusaŭ u vajnie z Ukrainaj, nie paviedamlajecca.
Ciapier čytajuć
Staŭ hierojem Mahiloŭskaha ŭniviera, źbiraŭ falkłor, pracavaŭ na biełarusizacyju sadkoŭ — raskazvajem pra Jaŭhiena Bojku, asudžanaha za salidarnaść z palitviaźniami66
Kamientary