U Biełarusi prydumali, jak atrymlivać bolš hrošaj ad IP. Raskazvajem, što chočuć źmianić na hety raz
Hod dla biełaruskich IP pačaŭsia ź niepryjemnych źmienaŭ. Im pavialičyli staŭki adzinaha padatku ŭ 2-4 razy, pa mnohich vidach dziejnaści zabaranili pracavać pa sproščanaj sistemie padatkaabkładańnia. Ale padobna, što na hetym dziaržava vyrašyła nie spyniacca. U pieršym čytańni zakonaprajekta «Ab źmianieńni zakonaŭ pa pytańniach dziaržaŭnaha sacyjalnaha strachavańnia» deputaty ŭchvalili źmieny, jakija ŭ tym liku tyčacca skasavańnia ilhot pa adličeńniach u FSAN. «Naša Niva» raźbirałasia, chto i kolki budzie płacić.
Kaho zakranie admiena ilhot?
Na biahučy momant u Biełarusi isnuje peŭnaja katehoryja IP, jakaja karystajecca ilhotami pa vypłacie ŭnioskaŭ u Fond sacyjalnaj abarony nasielnictva.
Da takich pradprymalnikaŭ adnosiacca:
— asoby, jakija znachodziacca ŭ pracoŭnych, a taksama źviazanych ź imi adnosinach — to-bok, IP, jakija paralelna pracujuć na inšaj pracy (pryčym vieličynia staŭki značeńnia nie maje);
— piensijaniery;
— studenty siarednich śpiecyjalnych navučalnych ustanoŭ i VNU, jakija atrymlivajuć adukacyju ŭ dzionnaj formie navučańnia;
— atrymalniki dapamohi pa dohladzie dziciaci va ŭzroście da 3 hadoŭ;
— ułaśniki majomaści (udzielniki, členy, zasnavalniki) jurydyčnych asob, jakija vykonvajuć funkcyi kiraŭnikoŭ hetych jurydyčnych asob.
Novaja redakcyja zakona praduhledžvaje skasavańnie ilhot u dačynieńni da vyšejpieraličanych asob. Inšymi słovami, kali źmieny nabuduć moc, to adličeńni ŭ FSAN buduć płacić usie indyvidualnyja pradprymalniki.
Kolki treba płacić?
Pamier uznosaŭ u FSAN składaje 35% ad minimalnaj zarabotnaj płaty (29% piensijnaje strachavańnie, 6% — sacyjalnaje). Minimalnaja suma za 2021 hod skłała 1705 rubloŭ.
Pa stanie na krasavik hetaha hoda minimalny zarobak byŭ roŭny 480,96 rubla — adpaviedna, za hety miesiac IP pavinien budzie zapłacić 168,33 rubla. Kančatkovaja suma za hod nieviadomaja, pakolki minimalny zarobak raście, ale navat kali jon zastaniecca na biahučym uzroŭni, to za 2022 hod kožny IP pavinien budzie addać bolš za 2000 rubloŭ u FSAN.
Vypłata ŭznosaŭ ažyćciaŭlajecca na praciahu hoda, ale nie paźniej za 1 sakavika nastupnaha hoda.
Zychodziačy z apublikavanaj infarmacyi, zakonaprajekt nie praduhledžvaje skasavańnia mahčymaści nie apłačvać unioski za toj pieryjad, kali IP nie ažyćciaŭlaŭ dziejnaść. Takaja mahčymaść u ich źjaviłasia tolki ŭ 2018 hodzie. U pieryjad z 2014 pa 2018 hady IP byli abaviazanyja płacić uznosy niezaležna ad taho, ažyćciaŭlajuć jany dziejnaść, ci nie.
Kamientary