Biełaruskija kibierpartyzany zajavili pra ŭzłom rasijskaha Raskamnahlada
Hrupoŭka «Kibierpartyzany» zajaviła, što naniesła ŭdar pa Hałoŭnym radyjočastotnym centry Raskamnahlada — struktury, jakaja zajmajecca cenzuraj internetu i, u pryvatnaści, błakuje antyvajennyja resursy.
«Z pačatku vajny heta arhanizacyja sočyć za praciŭnikami pucinskaha režymu ŭ internecie, vyšukvaje niepažadanyja dyktatury resursy, piša danosy ŭ FSB i prakuraturu RF, sprabuje damahčysia błakavańnia servisaŭ, jakija dapamahajuć danosić praŭdzivuju infarmacyju», — napisali ŭ svaim kanale «Kibierpartyzany».
Kibierpartyzany śćviardžajuć, što ŭzłamali ŭnutranuju sietku HRČC, vypampavali dakumienty, pierapiski i poštu supracoŭnikaŭ, sistemy sačeńnia za imi (dva terabajty infarmacyi), zašyfravali pracoŭnyja stancyi, paškodzili damien-kantroler.
«Praca hałoŭnaha kramloŭskaha cenzara parušanaja. U nas taksama vielizarnaja kolkaść materyjałaŭ, jakija dakazvajuć maštabnaje sačeńnie ŭ sietcy i sproby ŭstalavać tatalny kantrol za ŭsimi, chto za apošnija 20 hadoŭ vykazvaŭsia suprać pucinskaha režymu», — paviedamlajuć kibierpartyzany i prykładajuć skryny.
«My ŭsurjoz pakul jašče ničoha nie pačynali», — kpiać kibierpartyzany, vykarystoŭvajučy frazu Uładzimira Pucina, jakoj jon apraŭdvaŭ adstupleńnie rasijskaj armii z poŭnačy i ŭschodu Ukrainy.
«Kibierpartyzany» — hrupoŭka IT-śpiecyjalistaŭ, jakaja ŭźnikła ŭ 2020 hodzie ŭ adkaz na falsifikacyju vybaraŭ u Biełarusi i represii. Paśla pačatku vajny va Ukrainie kibierpartyzany ažyćciavili niekalki akcyj kibiersabatažu, kab uskładnić dziejańni rasijskich vojskaŭ.
Čytajcie taksama: Pradstaŭnica kibierpartyzanaŭ raskazała kolki ich i raskryła detali apieracyj. U tym liku na čyhuncy
Kibierpartyzany na zastaŭcy svajoj infarmacyi vykarystali taksama łahatyp Pałka imia Kastusia Kalinoŭskaha — biełaruskaha dobraachvotnickaha farmiravańnia, jakoje vajuje za niezaležnaść Ukrainy. Chakiery napisali: «Ruski vajenny karabiel, idzi nach… ź Biełarusi i Ukrainy!».
Kamientary