Siamiejnuju paru asudzili za ŭdzieł u maršy pa fota z knihi «Ja vychodžu»
U sudzie Partyzanskaha rajona Minska 6 śniežnia pa «narodnym» artykule 342 Kryminalnaha kodeksa (aktyŭny ŭdzieł u dziejańniach, jakija hruba parušajuć hramadski paradak) asudzili da troch hadoŭ «chatniaj chimii» siamiejnuju paru Darju i Michaiła Sudnikaŭ. Da suda jany ŭtrymlivalisia pad vartaj. Ich abvinavacili ŭ pierakryćci daroh na adnym z maršaŭ u 2020 hodzie. Hałoŭny dokaz pa spravie — fota z płakatam z knihi «Ja vychodžu», piša «Viasna».
Pavodle viersii abvinavačvańnia, Darja i Michaił Sudniki, «dziejničajučy sumiesna hrupaj asob pa papiaredniaj zmovie ź inšymi nieŭstanoŭlenymi asobami, jakija ŭdzielničali ŭ hrupavych dziejańniach, što hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam supracoŭnikaŭ AUS, jakija znachodzilisia pry vykanańni słužbovych paŭnamoctvaŭ, spynić vyšejpakazanyja dziejańni, a taksama paciahnuli parušeńnie pracy transpartu i pradpryjemstvy».
«Publična vykrykvajučy łozunhi, ździajśniajučy hučnyja vopleski i razmachvańnia rukami, ruchalisia ŭ składzie ŭdzielnikaŭ niesankcyjanavanaha masavaha mierapryjemstva, jakija pa prajeznaj častcy išli pa praśpiektach Mašerava, Pieramožcaŭ, Niezaležnaści, čym sumiesna ź inšymi ŭdzielnikami błakavali i pieraharodžvali šlach transpartnym srodkam, u vyniku čaho ich dziejańni paciahnuli parušeńnie pracy transpartu. Taksama ich dziejańni paciahnuli doŭhaje parušeńnie hramadskaha spakoju, abmiežavali pravy dobraprystojnych hramadzian na spakojnuju pracu, adpačynak i svabodnaje pieramiaščeńnie, a taksama błakavali ruch hramadskaha i inšaha transpartu, pieraškadžali narmalnaj pracy KTUP, heta značyć, hruba parušyli hramadski paradak», — havorycca ŭ abvinavačvańni.
Na sudzie Sudniki vinu pryznali całkam. Padčas pracesu jany raspaviali, što śviadoma prymali ŭdzieł u šeści, bo Darja była nie zhodna z vynikami vybaraŭ. U maršy siamiejnaja para brała ŭdzieł dzieści 2-3 hadziny. Darja na akcyju chadziła z płakatam, na joj była błuzka z arnamientam i vianok bieł-čyrvona-biełaha koleru.
Žančyna na pracesie zajaviła, što pratesny nadpis na płakacie abviaščaŭ niazhodu z padlikami hałasoŭ na vybarach, abrany vyhlad adzieńnia byŭ abumoŭleny vyrazam jaje hramadzianskaj pazicyi niazhody z vynikami vybaraŭ.
Siamiejnuju paru vyličyli supracoŭniki HUBAZiKa pa fotazdymku z knihi z płakatami «Ja vychodžu». Jany padrychtavali adpaviedny rapart i list 22 žniŭnia 2022 hoda.
U pratakole ahladu fotazdymka ŭ knizie havorycca:
«Darja i Michaił znachodzilisia na prajeznaj častcy darohi pa praśpiekcie Niezaležnaści ŭ Minsku siarod značnaj kolkaści inšych hramadzian, jakija vykarystoŭvali bieł-čyrvona-biełyja ściahi i inšuju pratesnuju atrybutyku; Sudnik trymała ŭ rukach šyldu z pratesnym nadpisam, apranutaja ŭ błuzku z arnamientam bieł-čyrvona-biełaha koleru, na hałavie — vianok anałahičnaj rasfarboŭki. Sudnik byŭ apranuty ŭ majku karyčnievaha koleru».
U chutkim časie Sudnikaŭ zatrymali. Padčas pieratrusu zabrali majku Michaiła jak dokaz jaho ŭdziełu ŭ akcyi pratestu.
U vyniku sudździa Michaił Makarevič pryznačyŭ Darji i Michaiłu pavodle č. 1 art. 342 KK pa try hady abmiežavańnia voli biez nakiravańnia ŭ papraŭčuju ŭstanovu adkrytaha typu («chatniaj chimii»). Ich vyzvalili ŭ zale suda.
Byłyja aryštanty IČU Akreścina raspaviadajuć pravaabaroncam, što tam šmat zatrymanych pa fotazdymkach z knihi «Ja vychodžu». Kali fotazdymak z vami trapiŭ u hetuju knihu, to vam treba terminova pakłapacicca pra svaju biaśpieku.
Ciapier čytajuć
U kadr znoŭ trapiła, jakim pamieram šryfta dla Łukašenki drukujuć vystupy, kab jon bačyŭ6
Kamientary
nie prajšło j 3-och hod, jak
Niva papiaredžvaje...