Prasoŭvańnie rasijskich vojskaŭ u Saladary Danieckaj vobłaści nie harantuje im poŭnaha akružeńnia Bachmuta, dzie ciapier viaducca najbolš krovapralitnyja bai na ŭsim froncie, pišuć u štodzionnaj zvodcy ekśpierty amierykanskaha Instytuta vyvučeńnia vajny (ISW).
Navat kali pryniać na vieru infarmacyju rasijskich «vajenkaraŭ» pra toje, što rasijanie vyjšli z bajami da ŭskrain Razdołaŭki (što za 6 km na paŭnočny zachad ad Saladaru), jany ŭsio roŭna jašče dalokija ad taho, kab uziać Bachmut u apieratyŭnaje akružeńnie, havorycca ŭ zvodcy.
Taksama analityki ISW pišuć, što ŭ hetaj vajnie Rasija praciahvaje vykarystoŭvać u jakaści zbroi temu relihii. Tak, rasijskija vajskovyja błohiery ŭ subotu, 7 studzienia, aktyŭna raspaŭsiudžvali kadry kaladnaj słužby ŭ Kijeva-Piačerskaj łaŭry, dzie prysutničali šmatlikija supracoŭniki ŭkrainskich siłavych struktur. Rasijskija prychilniki vajny padajuć heta jak prykmieta hanieńniaŭ na carkvu, pišuć, što Łaŭru «zachapili jeretyki» i da taho padobnaje. Hetym razam kaladnaje nabaženstva ŭ Kijeva-Piačerskaj łaŭry ŭpieršyniu prajšło nie pad ehidaj Maskoŭskaha patryjarchatu.
Akramia hetaha, u siońniašniaj zvodcy analityki ISW znoŭ źviartajuć uvahu na toje, što rasijski arsienał dalnabojnych balistyčnych i kryłatych rakiet praciahvaje skaračacca. Niahledziačy na heta, pišuć ekśpierty, Rasija, pa ŭsioj bačnaści, pakul praciahnie pahražać ukrainskaj infrastruktury i mirnamu nasielnictvu.
Kamientary