Pryhožyn: YouTube budzie zakryty

Jaŭhien Pryhožyn raniej źviartaŭsia ŭ Hienprakuraturu RF z prośbaj pravieści pravierku dziejnaści YouTube i zabłakavać jaho na terytoryi RF. Adnak płatforma ŭ Rasii pa-raniejšamu pracuje. Žurnalisty zapytalisia ŭ Pryhožyna, čamu, na jaho dumku, YouTube nie błakujuć.

Pryhožyn nazvaŭ YouTube «infarmacyjnaj čumoj našaha času» i adkazaŭ, što jość dźvie pryčyny, čamu jon pracuje ŭ Rasii.

Hałoŭnaja pryčyna, pavodle jaho, toje, što ŭ Administracyi prezidenta RF — «vielizarnaja kolkaść ludziej, jakija dumajuć tolki ab adnym — chutčej by Rasija prajhrała vajnu, chutčej by amierykancy pryjšli i adrehulavali nas».

«Ale takoha nikoli nie budzie. Jany [amierykancy] vas da siabie nie voźmuć. I tady vy pryjdziecie da nas, dzie vas užo budzie čakać kuvałda «Vahniera», — rysuje pierśpiektyvy Pryhožyn.

Jon nazyvaje tych, chto suprać zakryćcia YouTube, «zdradnikami svajho naroda i svajoj krainy».

«Jany žyvuć za miažoj, adpačyvajuć za miažoj, vychoŭvajuć dziaciej za miažoj, abviaščajuć vysokija kaštoŭnaści, ale, tym nie mienš, usialak padtrymlivajuć Zachad i siłkujucca im. Pa hetaj pryčynie jany i supraćstajać tamu, kab YouTube adklučyli, tamu što im vielmi važna słuchać raspoviedy takich ukrainskich lidaraŭ, jak Fiejhin, Hardon i h. d., i tamu YouTube jany ŭsialak sprabujuć zachavać».

Pryhožyn śćviardžaje, što «prosty ruski narod» — suprać YouTube. Ludzi, jakija «znachodziacca ŭ Tambovie, u Bracku, pracujuć na zavodach, na HES», pavodle jaho, vystupajuć «za toje, kab ruskija hladzieli ruskaje i prarasijskaje», ale jany nie prymajuć rašeńni.

Druhaja ž pryčyna, čamu nie błakujuć YouTube ŭ Rasii, pavodle Pryhožyna, — techničnaja, nibyta «bolš niama kudy vykładvać videa i niama dzie jaho zachoŭvać».

Pryhožyn piša, što heta nie tak. «Dla hetaha ŭ nas vielizarnaja kolkaść mahčymaściaŭ»: jość resursy «VKontaktie» i «Adnakłaśniki», RuTube, sacyjalnaja sietka JaRUS «z unikalnymi mahčymaściami» i inš.

Pavodle Pryhožyna, «sa 100 adsotkaŭ rolikaŭ na YouTube pryblizna 40% palityzavanyja i nakiravanyja suprać Rasii».

Pryhožyn śćviardžaje, što najbližejšym časam YouTube budzie zakryty. «A tyja, chto aktyŭna karystajecca YouTube, u svaju čarhu, buduć vyjaŭlenyja i paniasuć zasłužanaje pakarańnie paśla taho, jak jon budzie zabaronieny».

Miž tym, niadaŭna navat biełaruskija prapahandysty raskrytykavali rasijan za toje, što jany nie zmahli zrabić videachostynh, «nie zmahli zrušyć ź miortvaha punkta najpraściejšyja rečy, jakija realizavanyja ŭ śviecie».

Rutube kiraŭnik ANT Marat Markaŭ nazvaŭ miortvanarodžanym dziciom, «jakoje dahetul nie mohuć raźvić, choć abiacali».

• 3
• 0
• 39
• 7
• 2
• 0
• 12
• 0