Navapołackija milicyjanty składajuć pratakoły za vinšavańni z Dniom Voli šmathadovaj daŭniny
Žychara Navapołacka asudzili na 13 sutak za vinšavańnie z Dniom Voli ŭ fejsbuku troch— i čatyrochhadovaj daŭniny, paviedamlaje «Viciebskaja viasna».
Pavodle sudovaj pastanovy, apublikavanaj u ahulnarespulikanskaj bazie danych, hramadzianin 25 sakavika 2019 hoda «źmiaściŭ post z fotavyjavaj hierba «Pahonia» i podpisam «Siabry, vinšuju z Dniom Voli!». U 2020 hodzie vinšavańnie vyhladała jak «fotavyjava hierba «Pahonia» na fonie BČB-simvoliki z podpisam: «Sa śviatam, siabry! Z Dniom Voli!». Sud kvalifikavaŭ heta jak niesankcyjanavanaje pikietavańnie.
U 2019 hodzie heta vinšavańnie, pa infarmacyi siłavikoŭ, prahledzieli 19 čałaviek, u 2020-m — 32 čałavieki. Aprača hetaha, u atrybuty «niesankcyjanavanaha pikietavańnia» sud zaličyŭ fotazdymak «z prymacavanaj vyjavaj BČB-simvoliki», jaki ŭbačyli 56 karystalnikaŭ, i fotazdymak, «da jakoha prymacavanaja vyjava ściaha Ukrainy», jaho ŭbačyli 103 karystalniki.
Kali składańnie administracyjnych pratakołaŭ za fotazdymki profilu ŭ fejsbuku, azdoblenyja roznymi malunkami-«ramkami», užo nie źjaŭlajecca navinoj, to ŭvaha milicyjantaŭ da vinšavalnych paštovak z 25 sakavika, dy jašče za takija daŭnija hady, u Navapołacku prajaviłasia ŭpieršyniu. Miž tym vyjava «Pahoni» nie źjaŭlajecca zabaronienym simvałam, jana jość, da prykładu, na aficyjnym hierbie i ściahu Viciebskaj vobłaści i na haradskim hierbie Lepiela.
Publičnaje vinšavańnie z histaryčnym śviatam nie ŭtrymlivaje namieraŭ aŭtara abo zaklikaŭ da niejkich dziejańniaŭ. Ale sud vyrašyŭ, što va ŭsich vypadkach mieła miesca «vyražeńnie hramadska-palityčnych, asabistych i inšych intaresaŭ», vykazanych u publičnaj prastory.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary