Šmatdzietnaha baćku zatrymali za tatuiroŭku z «Pahoniaj» na nazie pa danosie susieda
Sudździa suda Połackaha rajona i h. Połacka Uładzimir Biasiecki 16 žniŭnia za raspaŭsiud «ekstremisckich» materyjałaŭ i nibyta pikietavańnie aryštavaŭ na 25 sutak žychara ahraharadka Harany, baćku traich niepaŭnaletnich dziaciej Vadzima Bierdnikava, piša «Viciebskaja Viasna».
Bierdnikaŭ pracuje budaŭnikom u maskoŭskaj kampanii. A jaho zatrymańnie adbyłosia paśla taho, jak jahony susied D. (pravaabaroncy nazyvajuć jaho imia i proźvišča) danios u milicyju, što na nazie ŭ Bierdnikava jość tatuiroŭka ŭ vyhladzie hierba «Pahonia».
Pry zatrymańni Bierdnikava było ŭstanoŭlena, što ŭ jaho sapraŭdy na łytcy pravaj nahi jość tatuiroŭka z vyjavaj «Pahoni».
Sud paličyŭ, što mužčyna parušyŭ Zakon «Ab masavych mierapryjemstvach u Respublicy Biełaruś», bo «jon u hramadskim miescy, u prysutnaści hramadzian demanstravaŭ tatuiroŭku ŭ vyhladzie hierba «Pahonia», čym biez dazvołu ŭładaŭ vykazvaŭ svaje hramadska-palityčnyja pohlady», pišuć pravaabaroncy.
Pry razhladzie spravy ŭ sudzie taksama było ŭstanoŭlena, što Bierdnikaŭ u sacyjalnaj sietcy «UKantakcie» na svajoj staroncy 10 śniežnia 2020 hoda raźmiaściŭ i zachoŭvaŭ infarmacyju, jakaja źmiaščaje łahatyp «TUT.BY», jaki ŭłady ŭklučyli ŭ respublikanski śpis ekstremisckich materyjałaŭ.
Hetyja dva fakty dali padstavy śćviardžać sudździ Biasieckamu, što ŭ dziejańniach Bierdnikava ŭtrymlivajecca skład administracyjnych pravaparušeńniaŭ, praduhledžanych č. 1 art. 24.23 i č. 2 art. 19.11 KaAP RB. Sud vyrašyŭ pakarać mužčynu aryštam: za pikietavańnie — na 15 sutak, a za raspaŭsiud «ekstremizmu» — na 10 sutak.
U vynikovaj pastanovie, šlacham składańnia, sud pryznačyŭ Bierdnikavu spahnańnie ŭ vyhladzie aryštu terminam na 25 sutak.
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary