Były ŭkrainska-biełaruski futbalist Arciom Mileŭski špitalizavany, jaho stan ciažki
Eks-hulec zbornaj Ukrainy Alaksandr Alijeŭ raspavioŭ pra stan svajho siabra i byłoha biełaruskaha futbalista Arcioma Mileŭskaha.
«Dziakuj bohu, jaho ŭdałosia pakłaści ŭ balnicu. Jon užo na praciahu piaci dzion tam. Stan, viadoma, vielmi ciažki, ale ničoha, daktary zmahajucca», — skazaŭ jon.
Alijeŭ vykazaŭ padziaku kijeŭskamu «Dynama» i prezidentu kłuba Iharu Surkisu, jakija ŭziali ŭsie vydatki na siabie.
Što mienavita zdaryłasia ź Mileŭskim, dakładna nieviadoma. Apošnim časam jaho prychilniki adznačali, što 38-hadovy Mileŭski vyhladaje nie najlepšym čynam.
Na jaho stan nieadnarazova źviartali ŭvahu. U pačatku hetaha hoda ŭkrainski žurnalist Siarhiej Bałotnikaŭ raskazvaŭ: «Ja tak razumieju, što Mileŭskaha vielmi psichałahična prybiła vajna. Jon ničoha nie choča. Mnie padajecca, što ŭ jaho prafiesijnaja depresija. Jon nie moža siabie realizavać u ciapierašnich umovach».
U tym ža klučy vykazvaŭsia spartyŭny kamientatar Raman Biebiech: «Ja ź Mileŭskim razmaŭlaŭ — na jaho mocna paŭpłyvała vajna, kali jon ubačyŭ, jak bambiać, jak pamirajuć ludzi. Jon nie choča zdymać kantent, ličyć, što [ciapier] heta nie važna. Jon tolki adychodziŭ ad zaviaršeńnia karjery, pačałasia vajna — i heta jašče bolš jaho zaciahnuła ŭ depresiŭny stan. Na jaho ŭpłyvaje ŭsio: što prylataje ź jahonaj rodnaj krainy, što baćki nie razumiejuć».
Zdajecca, što situacyju Arciom topić u ałkaholi — u nie samym pryvabnym vyhladzie jon užo traplaŭ u niekalki łakalnych kanfliktaŭ.
Arciom Mileŭski naradziŭsia ŭ Minsku, ale ŭ junackim uzroście pierajechaŭ u Kijeŭ i zajaviŭ ab žadańni hulać za Ukrainu. Heta vyklikała vialiki skandał i nieadnaznačnuju reakcyju ŭ futbolnych kołach. Čatyrochrazovy čempijon Ukrainy, udzielnik čempijanatu śvietu pa futbole. U kancy karjery viarnuŭsia ŭ Biełaruś, dzie ŭ składzie bresckaha «Dynama» vyjhraŭ čempijanat i kubak krainy.
Ličyłasia, što futbalist mieŭ vialiki talent, jaki nie zmoh realizavać. Jon staŭ udzielnikam šmatlikich skandałaŭ.
Čytajcie taksama:
Jak ciapier vyhladaje były ŭkrainska-biełaruski futbalist Arciom Mileŭski. Zaŭziatary bjuć tryvohu
Ciapier čytajuć
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia8080
Kamientary