«Milicyjanty pryjechali pa jaje, viarnuli telefon i pieradali rabotnikam BT». Jak plamieńnica abhavaryła ciotku ŭ prapahandysckaj pieradačy
Aktyvistka z Pastaŭščyny Hanna Fiedaronak raskazała, jak jaje svajačku zatrymali za łajk pad jaje fota, a paśla pad ciskam zapisvali dla BT. Pa takoj schiemie mohuć zapisvać i inšych udzielnikaŭ prapahandysckich pieradač.
«Jana kazała pra mianie niapraŭdu, i ja ŭpeŭniena, što jaje zmusili»
Hanna Fiedaronak — kiraŭnica šełtara dla biełaruskich palituciekačoŭ Varšavie. Niekalki hadoŭ vymušana žyvie ŭ Polščy i daŭno nie hladzić biełaruskaje dziaržaŭnaje telebačańnie. Tamu pra videasiužet prapahandystki BT Kaciaryny Cichamiravaj z udziełam svajoj plamieńnicy daviedałasia bolš jak praz tydzień paśla vychadu prahramy ŭ efir.
«Volzie 26 hadoŭ, jana vyjšła zamuž adrazu paśla škoły, u jaje troje dziaciej, i ničym, akramia siamji, jana nikoli nie cikaviłasia, raspaviadaje Hanna pra svajačku. — U našaj radni niama bolš apalityčnaha čałavieka, čym jana. Jana nikoli nie ŭdzielničała ni ŭ jakich akcyjach i ni pra jaki płan «Pieramoha», moža, i nie čuła! U jaje svaja «škarłupinka» — dom i dzieci. Tak žyvie šmat chto ŭ Biełarusi. Pra palityku ja ź joj nikoli nie razmaŭlała navat — nie toje, kab prasić jaje kudyści tam ustupać. Ja ŭpeŭniena, što jaje zmusili mianie abhavaryć».
Sioleta Volha vypadkova trapiła pad «chapun»: u Varapajevie zatrymali 9 žančyn, jakija pastavili łajki pad fotazdymkami Hanny Fiedaronak u «Adnakłaśnikach». Na toj čas staronki aktyvistki ŭ sacyjalnych sietkach byli pryznanyja «ekstremisckimi».
Za łajki pad fota plamieńnicu Hanny razam z astatnimi žančynami pratrymali za kratami 72 hadziny, a potym aštrafavali. U pastarunku z Volhaj siłaviki zapisali videa — pra toje, nibyta ciotka zmušała jaje chadzić na pratesnyja akcyi. Z hetaha i pačaŭsia cisk na maładuju žančynu.
Na videazapis dla telebačańnia zabrali padmanam
Padčas pieršaha zatrymańnia Volha pryznałasia, što Hanna Fiedaronak — jaje svajačka. I praź niekalki miesiacaŭ, u žniŭni, da jaje dadomu znoŭku pryjechali milicyjanty. Zrabili pieratrus, ničoha nie znajšli i pavieźli zapisvać videa — ciapier pra płan «Pieramoha» i pra toje, što Hanna Fiedaronak zmušała jaje tudy ŭstupać. Videazapis rabili ŭ milicyi, dziaŭčyna padčas jaho płakała. A milicyjanty, padobna, adčuli, što na jaje možna cisnuć biaskonca, miarkuje Hanna:
«Sankcyi na pieratrus nie było, paniatych nie było, a potym Volhu zavieźli ŭ milicyju i trymali tam da viečara. Zapałochvali, kazali, što zabiaruć dziaciej. Adabrali mabilny telefon — maŭlaŭ, buduć u im šukać padpiski. A ŭžo ŭ vieraśni patelefanavali, što ničoha nie znajšli i što telefon treba zabrać. I zabrać jaho možna tolki asabista ŭ milicyi — pryvieźci ŭ Varapajeva ci niejak pieradać nibyta nielha. Volha admaŭlałasia: da rajcentra dalekavata, i dziaciej pakinuć niama na kaho.
Ale milicyjanty skazali, što i adviazuć jaje, i pryviazuć nazad. Pa jaje pryjechali, viarnuli telefon i pieradali rabotnikam BT, bo zapis, jaki pakazali pa telebačańni, zrobleny ŭžo nie ŭ pastarunku, a ŭ haradskim parku ŭ Pastavach».
Hanna na plamieńnicu nie kryŭduje:
«Heta vajna suprać mianie, ja ŭsio razumieju. Tamu ŭsim svajakam daŭno skazała, što stasunki sa mnoj padtrymlivać niebiaśpiečna. I jany sa mnoj nie kantaktujuć. Volha paciarpieła tolki za toje, što my svajaki».
Pra što plamieńnica skazała praŭdu
Plamieńnica Hanny Fiedaronak kaža ŭ videasiužecie i pra toje, što jejnaj ciotcy daviałosia «ŭ Polščy prybirać i myć padłohu», i što tolki potym jaje «zaŭvažyli Łatuška i Cichanoŭskaja». Badaj, što tolki hetyja słovy ŭ svoj adras aktyvistka ličyć pa-sapraŭdnamu kryŭdnymi:
«Prybirać — heta chiba haniebna? Kali biełarusy bieź viedańnia movy pryjazdžajuć u Polšču, ja adrazu kažu, što niekvalifikavanaj pracy jość šmat, a dla inšaj — treba chutčej vučyć polskuju. Siońnia ludzi z vyšejšaj adukacyjaj u Varšavie zajmajucca pryborkaj u hatelach i atrymlivajuć pa tysiačy jeŭra. Spytajcie ŭ biełaruskaj prybiralščycy, kolki atrymlivaje jana i ci chacieła b rabić takuju samuju pracu, ale tut i za jeŭrapiejski zarobak?
Ja pracavała 7 miesiacaŭ pamočnicaj pa bycie ŭ Paŭła Łatuški, zabiaśpiečvała paradak u ofisie, dapamahała padčas mierapryjemstvaŭ. Ja i prybirała hety ofis — kali treba, brała anuču i myła padłohu. I karona ź mianie nie zvaliłasia! Byvała, i abiedy pryvoziła, i piečyva dla ŭsich piakła. I mianie nie ličyli prysłuhaj. A kali ludzi zaŭvažyli maje arhanizacyjnyja zdolnaści, mianie zaprasili kiravać šełtaram. Ni chviliny mnie nie soramna za heta».
Pamknieńnie prynizić čałavieka ŭžo adnym aznačeńniem «biehły» — heta charakterny styl sučasnych dziaržaŭnych miedyjaŭ, kaža Hanna. Tych, chto vieryć ichniaj prapahandzie, zastajecca tolki paškadavać. Ci ź ich paśmiajacca.
Na BT pakazali i kadry z TikTok pra «babu Halu»
Nie supraca z apazicyjnymi strukturami najbolš złuje ŭłady, miarkuje Fiedaronak:
«Volha ŭ tym siužecie ŭvieś čas paŭtaraje, što ja chacieła być «zorkaj». U svoj čas ja vučyłasia ŭ Biełaruskim instytucie kultury na režysiora narodnaha teatra, i ŭsio žyćcio, kolki siabie pamiataju, ja vystupaju na scenie. Tolki raniej heta byŭ kłub, a zaraz TikTok, dzie ŭ mianie jość kanał @baba_gala_rulit. Tam amal 20 tysiač padpisčykaŭ.
Hety kanał užo taksama zapisali ŭ «ekstremisckija materyjały», i ja razumieju čamu: baba Hala, Ninka i dzied Hryška — heta piersanažy-viaskoŭcy, jakija pierakazvajuć adno adnamu biełaruskija aficyjnyja naviny pavodle ŭłasnaha razumieńnia. Jany hladziać tolki dziaržaŭnaje telebačańnie, u baby Hali na ścianie visić čyrvona-zialony ściah i partret Łukašenki. Heta takaja satyra, kab jabaćki pahladzieli, jak jany vyhladajuć zboku. I kali ŭ šełtar pryjazdžajuć biełarusy, jany mianie paznajuć. Našy videa hladziać, śmiajucca ź jabaciek i dziaržaŭnych prapahandystaŭ. A heta ŭładam jak kostka ŭ horle».
Skrynšoty ź videa i cełyja frahmienty, dzie Hanna vystupaje ŭ roli baby Hali, taksama pakazali na BT. Vybirali takija, kab stvaryć pra vykanaŭcu nie najlepšaje ŭražańnie — prykładam, dzie hierainia Hanny Fiedaronak niaŭkludna tančyć u baletnaj pačcy. Nasamreč u TikTok heta siužet pra toje, jak viaskoŭcy čakajuć «Lebiadzinaje voziera» pa ŭsich biełaruskich telekanałach.
Na dumku Hanny, voś u takoj humarystyčnaj formie i prostaj viaskovaj movaj vielmi lohka danosić da ludziej praŭdu. Kudy bolš składana pierakanać hledačoŭ supracoŭnikam BT, jakim davodzicca schilać ludziej dla ŭdziełu ŭ svaich prahramach padmanam i z dapamohaj milicyi.
Ciapier čytajuć
Zatrymali adnaho z udzielnikaŭ juvielirnaha brenda Belaruskicry Jahora Bužyłava. Prapahandysty pakazali jaho5
Kamientary
da jakoj jašče stupieni marazmu zdolna dajści heta sistema? bo i tak daŭno ŭžo zdajecca zalimitavaja
i ci jość dzie ŭ śviecie anałahi hetamu marazmu? zdajecca, anałohovniet