16-hadovy syn kiraŭnika Čačni Adam Kadyraŭ atrymaŭ najvyšejšuju ŭznaharodu respubliki — orden imia Kadyrava
Heta dziasiataja ŭznaharoda, prysvojenaja jamu paśla źbićcia letaś u SIZA Hroznaha abvinavačanaha ŭ spaleńni Karana Mikity Žuraŭla.
Ab uručeńni Adamu Kadyravu najvyšejšaj uznaharody rehijonu paviedamiŭ ministr druku i infarmacyi Čačni Achmied Dudajeŭ. Jon nazvaŭ heta «zasłužanym pryznańniem vysokich maralnych jakaściaŭ i addanaści spravie». Padletak zajmaje pasadu načalnika adździeła biaśpieki svajho baćki, kiraŭnika respubliki Ramzana Kadyrava, piša Rasijskaja słužba Radyjo Svaboda.
Pierad hetym, 21 žniŭnia, Kadyraŭ-małodšy apublikavaŭ u svaim Instagram dva fota z prezidentam Rasii Uładzimiram Pucinym. Na adnym zdymku junak staić z prezidentam Rasii la trapa samalota.
15 žniŭnia 2023 hoda ŭ SIZA Hroznaha Adam Kadyraŭ źbiŭ abvinavačanaha ŭ spaleńni Karana Mikitu Žuraŭla. Palicyja admoviłasia raspačynać spravu, bo na toj momant u syna kiraŭnika Čačni jašče nie nastupiŭ uzrost pryciahnieńnia da kryminalnaj adkaznaści — jamu było 15 hadoŭ.
Paśla hetaha jon atrymaŭ zvańnie «hieroja Čačni», pasadu načalnika adździeła biaśpieki kiraŭnika respubliki, vyšejšyja Ordeny za zasłuhi pierad Tatarstanam, Karačajeva-Čarkiesijaj, Kabardzina-Bałkaryjaj, čačenski orden «Dajmiechkan Sij» («Honar nacyi») i relihijnyja Ordeny «Za zasłuhi pierad Umaj» i «Za słužeńnie relihii Isłam» I stupieni, miedal «Pracoŭnaja dobleść Rasii» i «Za ŭkład u raźvićcio Rasijskaha ŭniviersiteta śpiecnaza» I stupieni. Niekatoryja ź pieraličanych vyšej uznaharod jon nie moh atrymać u siłu ŭzrostu.
Kiraŭnictva Čačni nieadnarazova i publična ŭchvalała dziejańni Adama Kadyrava. Ramzan Kadyraŭ zajaŭlaŭ, što «było b dobra», kali b jaho syn zabiŭ Žuraŭla. Na niekatorych fotazdymkach z suda na tvary Žuraŭla bačnyja siniaki.
U lutym sud u Hroznym prysudziŭ Mikitu Žuraŭla da troch z pałovaj hadoŭ kałonii ahulnaha režymu — jaho pryznali vinavatym u abrazie pačućciaŭ viernikaŭ i chulihanstvie pa matyvach «relihijnaj nianaviści». Na pasiadžeńniach suda Žuraviel vybačyŭsia pierad musulmanami.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii11
Kamientary