Z-za niedachopu rabotnikaŭ na Biełaruskaj čyhuncy zdarajucca zryvy hrafiku hruzavych ciahnikoŭ.
Supolnaść čyhunačnikaŭ Biełarusi adznačaje, što čyhunka adčuvaje kadravy hoład, asabliva ŭ słužbach pieravozak i zabieśpiačeńnia biaśpieki ruchu. Da takoha stanovišča pryviało palavańnie na viedźmaŭ paśla 2020 hoda i palityka aptymizacyi, nakiravanaja na palapšeńnie finansavaha stanovišča va ŭmovach skaračeńnia pieravozak.
Zhodna z unutranymi dakumientami, na čyhuncy raście kolkaść vypadkaŭ zryvu hrafiku hruzavych ciahnikoŭ z-za nieŭkamplektavanaści łakamatyŭnych bryhad.
Na pačatak lipienia 2024 hoda ŭ łakamatyŭnaj haspadarcy štat pa prafiesii mašynistaŭ łakamatyva byŭ ukamplektavany na 90,7% (306 vakansij), pamočnikaŭ mašynista łakamatyva — 82,7% (393 vakansii).
A kab vykanać ciapierašni abjem raboty, patrebna navat bolej dadatkovych rabotnikaŭ, čym adkryta vakansij — 724.
Niedachop kadraŭ imknucca kampiensavać dadatkovymi źmienami. Za šeść miescaŭ hetaha hoda abjom zvyšuročnaj raboty łakamatyŭnych bryhad pavialičyŭsia na tracinu (31,2%) u paraŭnańni z anałahičnym pieryjadam minułaha hoda.
Dla rašeńnia situacyi ź niedachopam kadraŭ kiraŭnictva Biełaruskaj čyhunki prapanuje skaracić terminy padrychtoŭki ci pierapadrychtoŭki pa prafiesijach ślesara pa ramoncie ruchomaha sastavu, mašynistaŭ i ich pamočnikaŭ, skaracić nieabchodny staž dla pieravodu na inšuju rabotu, pašyryć maštaby absłuhoŭvańnia ciahnikoŭ mašynistami biez pamočnikaŭ.
A taksama prapanujuć pryciahnuć žančyn da raboty ŭ łakamatyŭnych depo ŭ jakaści pamočnikaŭ mašynistaŭ i mašynistaŭ.
Supolnaść čyhunačnikaŭ adznačaje, što z Pravił techničnaj ekspłuatacyi jašče raniej była prybrana zabarona na dopusk žančyn da navučańnia i nastupnaj raboty ŭ jakaści člena łakamatyŭnaj bryhady. Ale na praktycy dla hetaha pakul nie stvorany vytvorčyja i bytavyja ŭmovy.
Ciapier čytajuć
Ofis pra skandał ź Cichanoŭskim: Brytanskaja viza była apłačanaja, ale jon tak i nie padaŭsia na zdaču adbitkaŭ palcaŭ10
Kamientary