Ukrainski dypłamat: Terarysty nie kalinoŭcy, a tyja, z-za kaho sotni tysiač biełarusaŭ vymušanyja byli pakinuć radzimu
Były pasoł Ukrainy ŭ Minsku, a siońnia pasoł pa asablivych daručeńniach Ihar Kizim prakamientavaŭ u svaim fejsbuku pryznańnie Viarchoŭnym sudom Biełarusi Pałka Kastusia Kalinoŭskaha «terarystyčnaj arhanizacyjaj».
Ihar Kizim zaznačyŭ, što jamu dziŭna nazirać za tym, jak palityčny režym krainy, jaki padtrymlivaje inšuju terarystyčnuju dziaržavu, abvinavačvaje svaich hramadzian, jakija zmahajucca suprać hetaj terarystyčnaj dziaržavy, u teraryźmie.
«Vidać, nieŭzabavie zhadka samoha imia Kastusia Kalinoŭskaha, fihuraj jakoha pavinien hanarycca biełaruski narod, budzie karacca łukašenkaŭskim režymam.
Padčas pracy ŭ Biełarusi asabista bačyŭ, jak heta adbyvajecca, kali chtości publična ŭspaminaŭ (abo demanstravaŭ) biełaruskuju histaryčnuju simvoliku abo, u znak padtrymki Ukrainy, zaviazvaŭ sinie-žoŭtuju stužku na ruce, kazaŭ «Nie vajnie» abo prosta hladzieŭ inšyja naviny, čym tyja, jakija viaščajuć dziaržaŭnyja ŚMI abo pabliki», — napisaŭ dypłamat.
Dypłamat napisaŭ, što, «ciapier moža pravilniej było b kazać pra inšyja biełaruskija «terarystyčnyja» arhanizacyi, dziejańni jakich stali pryčynaj masavaha adjezdu z krainy sotniaŭ tysiač biełarusaŭ i jakija siońnia «ŭtrymlivajuć za kratami tysiačy ludziej tolki za toje, što jany majuć inšaje, čym łukašenkaŭskaje, bačańnie budučyni svajoj Radzimy».
«Budučynia Biełarusi ŭ rukach samich biełarusaŭ, ale my ščyra ŭdziačnyja tym biełarusam, chto siońnia ŭ šerahach USU razam z ukraincami abaraniaje našy supolnyja kaštoŭnaści, našu supolnuju jeŭrapiejskuju budučyniu, našu supolnuju svabodu i nabližaje našu supolnuju pieramohu nad rasijskim ahresaram», — padsumoŭvaje pasoł Kizim.
Ciapier čytajuć
Były vykładčyk Iniaza pierajšoŭ na biełaruskuju ŭ emihracyi. Jon razvažaje pra los univiersiteta, biełarusaŭ za miažoj i adroźnieńnie nas ad palakaŭ77
Kamientary