Niaklajeŭ prezientavaŭ hramadzianskuju kampaniju «Havary praŭdu»

25 lutaha byŭ dadzieny start hramadzianskaj kampanii «Havary praŭdu».

Prezientacyja hramadzianskaj kampanii prajšła ŭ minskim hateli «Kraun Płaza». Jašče pierad pačatkam imprezy Niaklajeŭ i Buraŭkin padpisvali ŭsim achvočym svaje tamy ź sieryi «Biełaruski knihazbor». Vydańnie vybranych tvoraŭ Niaklajeva vyjšła z drukarni jakraz u hetym dzień.

«Kali b nie było hetaj prezientacyi, to dzień by skłaŭsia ŭ mianie zusim pa‑inšamu», — žartaŭliva zaznačyŭ piśmieńnik.

Pres‑sakratar kampanii Julija Rymašeŭskaja zaznačyła, što na mierapryjemstva zaprašalisia nie tolki niedziaržaŭnyja žurnalisty, ale i aficyjnyja. Adnak źjavilisia tolki pieršyja. «Spadziajusia, što z časam hetym zacikaviacca abodva baki», — zajaviła Ju.Rymašeŭskaja.

Pierš napierš Niaklajeŭ začytaŭ zvarot inicyjatyŭnaj hrupy. «Uśviedamlajučy manu, jak niebiaśpieku dla isnavańnia nacyi, my pačynajem ahulnanacyjanalnuju kampaniju «Havary praŭdu!». Kab pa praŭdzie žyć, treba praŭdu kazać. Heta ciažka, ale davajcie pasprabujem».

«Raspačataja nami kampanija nie źjaŭlajecca palityčnaj. Heta maralnaja akcyja, — kaža U.Niaklajeŭ. — Ja nieadnojčy sprabavaŭ stvaryć padobny ruch, arhanizacyju, jakaja b mieła na mecie nie palityku, a kulturu».

Jon uzhadaŭ niaŭdałyja sproby arhanizacyi fondu «Razam», a taksama «Biełaruskaha doma». Ale tady, kaža Niaklajeŭ, jon sutykaŭsia z supracivam nie tolki ŭładaŭ, ale i apazicyi. «Bo jany paličyli, što my topčymsia na ichniaj dzialancy», — kaža paet. «Havary praŭdu» stvoranaje ŭ abychod lubych palityčnych arhanizacyj.

Pa jahonych słovach, metaj kampanii jość daniasieńnie da biełaruskaha hramadstva realnaha stanovišča ŭ krainie. Siarod pieršych inicyjatyvaŭ hramadzianskaj kampanii — heta daniasieńnie praŭdzivaj situacyi, jakaja skłałasia ź biespracoŭjem.

Taksama vypuščana 200 tysiač paštovak, jakija možna nakiroŭvać u Administracyju prezidenta, napisaŭšy «praŭdu pra važnuju prablemu, kab jaje možna było pačać vyrašać».

Hienadź Hrušavy zaznačyŭ, što hetaj kampanijaj jany praciahvajuć tuju spravu, jakuju bolš za 20 hadoŭ tamu pačynali Aleś Adamovič, Vasil Bykaŭ, Vasil Nieściarenka.

Pacikavilisia ŭ Niaklajeva, ci źbirajecca jon vyłučacca ŭ prezidenty. Nie, adkazaŭ lider kampanii. Jon raskazaŭ, što da jaho sapraŭdy źviartalisia

«niabiednyja ludzi, kab jon vyłučaŭsia kandydatam», adnak piśmieńnik admoviŭsia. Što heta za ludzi? Heta biełarusy, jakija vymušanyja byli źjechać z krainy, i žyvuć pieravažna ŭ Rasii.

«Potym ja padumaŭ, što hetyja ludzi buduć šukać inšaha čałavieka, i ŭsio adno znojduć. Ja źviarnuŭsia da ich z padobnaj niepalityčnaj inicyjatyvaj. Spačatku jany admaŭlalisia, kazali, što heta dysidenctva. Adnak, ja stukaŭ i ŭsio ž dastukaŭsia da ich», — skazaŭ U.Niaklajeŭ.

Tym nie mienš, było zaznačany, «kali kampanija pojdzie paśpiachova, to jana budzie ŭpłyvać na vybarčuju kampaniju».

Pieršyja vyniki kampanii zasnavalniki abiacajuć padvieści ŭžo praź miesiac. Jany śćviardžajuć, što na bližejšy hod u ich jość kankretny płan dziejańniaŭ.

Pra toje, što sa srodkami ŭ kampanii ŭsio ŭ paradku, moža śviedčyć i toj fakt, što na furšecie paśla prezientacyi častavali darahimi hatunkami syra, a taksama čyrvonaj ikroj.

• 0
• 0
• 0
• 0
• 0
• 0
• 0
• 0