Rasijskija vajenkary pišuć pra «krach abarony» rasijska-siryjskich siłaŭ pad Alepa. Asad śpiešna vylecieŭ u Maskvu
Siryjskija paŭstanckija siły viaduć paśpiachovaje nastupleńnie na ŭradavyja vojski ŭ zachodniaj častcy pravincyi Alepa, paviedamlajuć mižnarodnyja ŚMI i niezaležnyja siryjskija kanały. Rasijskija Z-kanały zajaŭlajuć pra abrynańnie abarony vojskaŭ kaalicyi Rasii i Siryi. Što viadoma?
U nastupleńni ŭdzielničaje isłamisckaja hrupoŭka «Chajat Tachryr aš-Šam» (CHTŠ) i «Svabodnaja siryjskaja armija» (SSA). Hetaja apošniaja raniej karystałasia dapamohaj ZŠA i Turcyi.
Rasijski telehram-kanał «Rybaŕ» piša, što ŭ dobra skaardynavanym nastupie ŭdzielničajuć taksama ŭjhurskija padraździaleńni z «Isłamskaj partyi Turkiestana», uźbiekskija farmiravańni dy inšyja hrupy.
Pavodle zajavaŭ paŭstancaŭ i niekatorych krynic, ciaham 27 listapada:
- Byli zachoplenyja 13 nasielenych punktaŭ, uklučajučy harady Urm-as-Suhra, Urm-el-Kubra i Andžara.
- Uziataja bujnaja vajskovaja baza siryjskaj armii — Baza 46.
- Pad kantrol paŭstancaŭ pierajšli stratehična važnyja rajony, u tym liku jany padyšli da trasy M5, jakaja złučaje Alepa z Damaskam.
Inšy rasijski Z-kanał, Alex Parker Returns, blizki da Uzbrojenych sił Rasii, zajaviŭ, što ŭ Alepa abrynułasia abarona vojskaŭ kaalicyi Rasii i Siryi. «Apałčeńnie viadzie paśpiachovaje nastupleńnie i ŭžo znachodzicca za 7 km ad horada».
Pa słovach «Rybaria», paŭstancy ŭžyvajuć taktyku «nabiehu», prasoŭvajučysia ŭzdoŭž asnoŭnych daroh biez sprob zamacavacca na novych pazicyjach. Heta dazvalaje zachoplivać značnyja resursy, u tym liku ŭzbrajeńnie i techniku, pakinutyja pry adstupleńni ŭradavymi vojskami.
Inšy Z-kanał «Hłobalistika» sprabuje razabracca z pryčynami takoha pośpiechu paŭstancaŭ. Siarod ich nazyvaje:
- niedaacenku pahrozy («zakaścianiełaść myśleńnia») z boku siryjskaha kamandavańnia i rasijskaha kiraŭnictva.
- słabaść abaronnych pazicyj paśla doŭhaha adnosnaha zacišša.
- mahčymy ŭpłyŭ na stratehiju pryznačeńnia kamandziraŭ z zony «SVA», čyj dośvied akazaŭsia nieprydatnym u siryjskich umovach.
Dalej «Hłobalistika» razvažaje pra mahčymyja nastupstvy. Kali nastup nie ŭdasca spynić, bajeviki mohuć akružyć zachodnija ŭskrainy Alepa i adrezać zabieśpiačeńnie horada — miarkuje kanał. Heta stanie surjoznym udaram dla siryjskaj armii, a taksama asłabić rasijski ŭpłyŭ u rehijonie.
Niamiecki analityk Julijan Repkie na kanale BILD ličyć, što hałoŭnaj pryčynaj nastupleńnia paŭstancaŭ stała pierakidvańnie rasijskich vojskaŭ, uklučajučy avijacyju, va Ukrainu. Heta pazbaviła siły Bašara Asada mahčymaści kantralavać pavietranuju prastoru nad Alepa i Idlibam, što raniej dazvoliła im razhramić paŭstancaŭ u 2016—2020 hadach.
Siarod inšych pryčyn Repkie nazyvaje razvał PVK «Vahnier» paśla zabojstva Jaŭhiena Pryhožyna i pierakidvańnie bolšaści najmitaŭ u Afryku, dzie Maskva maje ambitnyja płany na Mali i Nihier, a taksama asłableńnie «Chiezbały», jakaja raniej padtrymlivała siryjski ŭrad, u vyniku izrailskaj pejdžarnaj ataki i dalejšaha nastupu, hibiel kamandzira KVIR (Korpusa vartavych isłamskaj revalucyi) u Alepa, jaki kaardynavaŭ abaronu horada, a taksama vykarystańnie paŭstancami taktyki, jakuju raspracavali ŭkraincy ŭ čas kontrnastupu 2022 hoda.
28 listapada stała viadoma, što prezident Siryi Bašar Asad śpiešna vylecieŭ u Maskvu dla sustrečy z Uładzimiram Pucinym, jakaja moža adbycca siońnia ŭviečary ci ŭnačy.
Ciapier čytajuć
«Adny vierać, što viernucca, inšyja — nie». Jak pracuje biełaruskaja škoła ŭ Polščy1
Kamientary