Łatvijski baskietbalist Cima skončyŭ žyćcio samahubstvam u centry Maskvy — na dzień naradžeńnia byłoj žonki, śpiavački Siedakovaj
Hanna Siedakova niekali była žonkaj adnaho z najlepšych futbalistaŭ Biełarusi Valancina Bialkieviča, jaki pamior u 2014-m.
U noč na 17 śniežnia źjaviłasia trahičnaja navina: 32-hadovy łatvijski baskietbalist Janis Cima byŭ znojdzieny miortvym u centry Maskvy. Pieršapačatkovaja viersija — samahubstva. Chutka pačali ŭspłyvać detali: pobač ź ciełam spartsmiena lažaŭ telefon, na ekranie jakoha było vidać paviedamleńnie ad jaho eks-žonki, viadomaj śpiavački Hanny Siedakovaj z «Vijahry», z prośbaj pieratelefanavać, piša Championat.com.
Usiaho za tydzień da hetaha, 9 śniežnia, stała viadoma pra razvod Hanny i Janisa.
Pa słovach Siedakovaj, ich adnosiny byli burnymi: svarki, rasstańni, prymireńni. Cima ciažka pieražyvaŭ razryŭ i nie chavaŭ svaich emocyj. U sacyjalnych sietkach źjaŭlalisia pasty i tranślacyi, u jakich jon kazaŭ pra svoj bol i navat zhadvaŭ suicydalnyja dumki. Jon abvinavačvaŭ Siedakovu ŭ tym, što jana addała pieravahu hrošam, a nie ich kachańniu.
Napiaredadni trahiedyi, 16 śniežnia, Hanna śviatkavała svoj 42-i dzień naradžeńnia. Janis pavinšavaŭ jaje — usio ž taki jany byli razam čatyry hady. Mahčyma, heta i pryviało da trahičnych nastupstvaŭ. Pakul zastajecca šmat pytańniaŭ, i rasśledavańnie pavinna pralić śviatło na abstaviny zdareńnia.
Šlub z Hannaj zrabiŭ Cimu šyroka viadomym navat siarod tych, chto daloki ad baskietboła. Ale Janis byŭ talenavitym hulcom.
Jašče ŭ 2010 hodzie jon zavajavaŭ bronzu na junackim čempijanacie Jeŭropy razam sa zbornaj Łatvii. Pačaŭšy karjeru na radzimie, jon vystupaŭ za «Lijepajas Łaŭvas», «Vientśpiłs» i VEF. U 2013 hodzie jaho vybrali na drafcie NBA pad 60-m numaram — «Memfis Hryźliz». Adnak, jak heta časta byvaje ź jeŭrapiejskimi hulcami, šancu pahulać u NBA jon tak i nie atrymaŭ. Tym nie mienš Cima prajaviŭ siabie ŭ Jeŭropie. U 2015 hodzie jon dałučyŭsia da pieciarburhskaha «Zienita», dzie pravioŭ dva paśpiachovyja siezony i staŭ ulubioncam zaŭziataraŭ. U 2017 hodzie jon dasiahnuŭ piku svajoj karjery i pierajšoŭ u Jeŭralihu, dzie vystupaŭ za takija kłuby, jak «Baskonija» i «Alimpijakas».
Z 2022 hoda jaho karjera pajšła na spad. Sproby zamacavacca ŭ čempijanatach Puerta-Ryka, Ispanii i Turcyi byli niaŭdałymi. U hety pieryjad jon znachodziŭsia ŭ składanych adnosinach z Hannaj, i, miarkujučy pa ŭsim, emacyjnyja pieražyvańni nie lepšym čynam adbivalisia na jaho hulni. U hetym hodzie Janis pryniaŭ prapanovu vystupać u rasijskaj miedyjabaskietbolnaj lizie 3x3.
Kamientary