Siabroŭka Viery Palakovaj-Makiej sprabuje pradać elitny sałon pryhažości bolš čym za miljon dalaraŭ
Niekalki hadoŭ zapar Natalla Łazarčyk sprabavała vyratavać elitny sałon pryhažości «Ledzi Hadziva». Ale ciapier apuściła ruki i sprabuje pradać sałon — ci chacia b zdać u arendu.
Natalla Łazarčyk paznačana jak mastačka pa kaściumach u šmatlikich śpiektaklach Teatra junaha hledača. Razam ź jaho dyrektarkaj Vieraj Palakovaj-Makiej Natalla latała ŭ Navasibirsk, dzie biełarusy pakazvali śpiektakl «Majstar i Marharyta». Mienavita mastačka raspaviała, što jana razam z udavoj ministra Uładzimira Makieja trapili ŭ žudasnuju avaryju pa darozie ŭ aeraport.
Ciapier Natalla padzialiłasia ŭ instahramie, što pradaje svoj elitny sałon pryhažości «z 20-hadovaj reputacyjaj». «Ledzi Hadziva» znachodzicca ŭ centry Minsku — na vulicy Niamiha, 38. Na sajcie realt.by paznačana, što ŭładalnica choča atrymać za svaju majomaść kala 4 miljonaŭ rubloŭ — ci prykładna 1,27 miljona dalaraŭ. U košt uvachodzić pamiaškańnie płoščaj 306 kvadrataŭ, a taksama ŭsio abstalavańnie sałona pryhažości. Ale da torhu Natalla hatovaja.
Miarkujučy pa nadta emacyjnym storys, rašeńnie raźvitacca z sałonam «Ledzi Hadziva» dałosia žančynie nie vielmi prosta. Ale prablemy z hetym biznesam byli ŭžo nie pieršy hod. Jašče ŭ 2022 hodzie Natalla skardziłasia, što ad jaje syšło 85% klijentaŭ.
Pryčyna tamu banalnaja — majstry, jakija pracavali ŭ «Ledzi Hadziva», źmianili miesca pracy. Kahości pieravabili kankurenty, chtości sam vyrašyŭ arandavać sabie pracoŭnaje miesca dzieści jašče, a chtości staŭ i doma pracavać.
Kaniečnie, dobry majstar zaŭsiody zabiare z saboj klijenturu. Natalla była ŭ šalenstvie i plavałasia atrutaj u bok nie vielmi dobrasumlennych kankurentaŭ.
— Sałony, jakija dajuć majstru 50%, heta ŭtopija pracy. Kožny, chto ŭmieje ličyć, razumieje: arenda, kamunałka, vydatki, padatki. U astatku nul u lepšym vypadku, kali nie minus. Pieršamu majstru, jaki syšoŭ, dali vysoki pracent u raźliku na maich klijentaŭ i mieli racyju. A čaho joj praz hod nie paprasić 60% ci 70%? Budziecie płacić? A nie toje i vašych klijentaŭ adviadzie, ludzi ž pryvykajuć.
Žančyna była vielmi pakryŭdžana na majstroŭ, jakija zvolnilisia (kožny ź jakich abvinavaciŭ jaje ŭ biaździejnaści). Maŭlaŭ, napracavali ŭ jaje klijenckuju bazu, a ciapier buduć kłaści sabie ŭ kišeniu 100% prybytku — «tolki ciapier niezrazumieła na jakoj kaśmietycy i dziŭnych umovach».
Dastałasia i nie vielmi ŭdziačnym klijentam: «Narod farbuje vałasy doma, myje hałavu ŭ vannaj i navat nie zadaje pytańnie, čym. Za 350 rubloŭ».
A bolš za ŭsio jaje aburali majstry, jaki pracujuć u pryvatnych kabinietach ci doma.
— Usie pravierki i padatki tolki dla nas, ułaśnikaŭ, a ŭ damach i kabiniecikach adbyvajecca svajo cichaje i mirnaje, a hałoŭnaje sytaje i biaśpiečnaje žyćcio.
Uładalnicu sałona aburała toje, što cyrulnikam i inšym supracoŭnikam bjuci-śfiery aficyjna dazvolili być samazaniatymi. Bo raniej majstram było strašna zhubić pracu ŭ sałonie, a paśla źjaŭleńnia mahčymaści pracavać samastojna ludzi zrazumieli, što niama vialikaha sensu trymacca za miesca.
— Naŭrad ci biudžet atrymlivaje hetyja hrošy, a isnavańnie vialikich sałonaŭ, z atmaśfieraj, ducham i historyjaj zahublena.
Taksama skardziłasia Natalla na dziaržavu — śćviardžała, što jaje zadziaŭbli pravierkami roznyja dziaržaŭnyja orhany. Kazała, što ŭžyvajucca tolki karnyja miery, jakija daviali jaje da sivych vałasoŭ.
Natalla sprabavała zmahacca za toje, kab abaranić svoj biznes, zaklikała inšych biznesoŭcaŭ bjuci-śfiery abjadnacca. Navat prapanoŭvała stvaryć antykryzisny kłub dyrektaraŭ i naniać jurystaŭ, kab nie zahinuć pa adnym. Ale ž nichto nie adhuknuŭsia.
U tym ža 2022 hodzie Natalla ŭdzielničała ŭ mierapryjemstvie Ministerstva ekanomiki, dzie jakraz abmiarkoŭvali prablemy zabieśpiačeńnia sałonaŭ pryhažości kadrami, uličvajučy mahčymaść fizičnych asob akazvać pasłuhi ŭ bjuci-śfiery.
Zdajecca, sustreča z namieśnikam ministra ekanomiki Natallu natchniła:
— Nam skazali: z 2023 hoda ŭ Biełarusi ŭviaduć padatak na prafiesijny dachod, a taksama paabiacali źviazacca z Centram hihijeny i epidemijałohii i ŭrehulavać pytańni ažyćciaŭleńnia bieskantrolnaj (ź ich boku) dziejnaści subjektaŭ.
Ale ž u vyniku vyratavać svoj ułasny «Tytanik», jaki imkliva apuskaŭsia pad vadu, Natalli nie ŭdałosia. Jana ciapier u adčai i ŭ svaim instahramie sprabuje znajści pakupnika ci arandatara dla «Ledzi Hadzivy».
— 20 hadoŭ ja była tut ščaślivaj. Moža, ciapier vaš čas? Usio možna abmiarkoŭvać, lublu idejnych!
Natalla litaralna prosić zabrać toj sałon, kab u jaje źjaviłasia mahčymaść pastavić kropku ŭ hetaj historyi i pačać niešta novaje.
«Byccam haračyja prasy pastavili na vočy». Biełaruskaja viadučaja ščyra raskazała, na što pajšła dziela pryhažości
«Stali ratunkam, a potym i spravaj žyćcia». Žycharka Baranavič uciakła z bjuciśfiery i pieratvaryła chobi ŭ biznes
Belita vypuściła hiel dla duša, jaki «ŭpłyvaje na emocyi». Navukoviec: «Heta infamachlarstva»
«Vajłdbieryz» prapanoŭvaje biełaruskam kapsuły dla «adnaŭleńnia cnatlivaści»
Kamientary