U Breście za ŭdzieł u pratestach asudzili viadomaha lohkaatleta
U sudzie Leninskaha rajona Bresta 12 sakavika pavodle «narodnaha» artykuła 342 KK (hrupavoje parušeńnie hramadskaha paradku) sudzili 37-hadovaha Siarhieja Barysaviča Čabieraka. Žurnalisty BGmedia vykazali zdahadku, što heta davoli viadomy ŭ Biełarusi lohkaatlet, majstar sportu mižnarodnaha kłasa Siarhiej Čabierak. Ciapier inicyjatyva Belpol paćvierdziła vydańniu, što sudzili sapraŭdy jaho.
Što viadoma pra Siarhieja Čabieraka
Siarhiej Čabierak — trenier-vykładčyk pa sporcie vyšejšaj katehoryi. Majstar sportu mižnarodnaha kłasa Respubliki Biełaruś.
Jon vice-čempijon Jeŭropy pa krosie na dystancyi 6 km, 26-razovy pieramožca čempijanataŭ i pieršynstvaŭ Biełarusi pa lohkaj atletycy. Nieadnarazovy ŭdzielnik čempijanataŭ śvietu pa krosie, kubkaŭ i čempijanataŭ Jeŭropy pa lohkaj atletycy. Finalist čempijanatu Jeŭropy pa lohkaj atletycy ŭ pamiaškańni na dystancyi 3000 mietraŭ, moładzievaha čempijanatu Jeŭropy pa lohkaj atletycy na dystancyi 5000 mietraŭ.
U 2006 hodzie jon atrymaŭ zvańnie «Spartsmien hoda». U 2011 hodzie pakazaŭ najlepšy vynik za ŭsiu historyju suvierennaj Biełarusi na dystancyi 3000 i 5000 mietraŭ.
U červieni 2019 hoda Siarhiej Čabierak u intervju BGmedia raskazaŭ, što ŭ sporcie z 5-ha kłasa. Jon pačynaŭ sa školnaj siekcyi lohkaj atletyki, zatym u jaho źjaviŭsia prafiesijny trenier, paźniej pierajšoŭ u prafiesijnuju lihu i zajmaŭsia ŭ škole vyšejšaha spartyŭnaha majsterstva.
Siarhiej Čabierak vioŭ aktyŭnaje žyćcio ŭ Breście, udzielničaŭ u spartyŭnych mierapryjemstvach. Naprykład, u štohadovych dabračynnych zabiehach «Biahom ad depresii», jakija arhanizoŭvali ŭ padtrymku «Bresckaha kłubnaha doma» — sacyjalnaj słužby dla ludziej ź psichičnymi razładami. U 2021 hodzie ŭ mierapryjemstvie paŭdzielničała rekordnaja kolkaść čałaviek.
Žurnalisty BGmedia znajšli sacsietki Siarhieja Čabieraka. Jahonaja staronka ŭ instahramie nie abnaŭlajecca z kanca listapada 2024 hoda. Jak miarkujecca, tady jaho i zatrymali.
8 listapada mužčyna jeździŭ u Jeŭropu adznačać svoj 37-y dzień naradžeńnia, jaki byŭ 7 listapada. U sacsietkach Siarhieja Čabiaraka paznačana, što jon pracuje trenieram u škole biehu I-RUN.
Taksama žurnalisty BGmedia znajšli staronku ŭ instahramie Iryny Bachanoŭskaj, jakaja taksama pracuje trenierkaj u škole biehu I-RUN. Miarkujučy pa jaje pastach, jany ź Siarhiejem Čabierakam razam vychoŭvajuć 10-hadovaha syna Maksima.
Sud nad Siarhiejem Čabierakam pačaŭsia ŭ sieradu, 12 sakavika, u sudzie Leninskaha rajona Bieraścia. Jaho i Dźmitryja Jurjeviča Lamina abvinavačvali pavodle č. 1 art. 342 KK (hrupavoje parušeńnie hramadskaha paradku). Sudździoj byŭ Dźmitryj Šuryn. Takija źviestki vynikajuć z raskładu suda, pisała «Bieraściejskaja viasna».
Iryna Bachanoŭskaja 15 sakavika apublikavała ŭ instahramie videa, na jakim Siarhiej Čabierak ščaślivy vychodzić z Doma pravasudździa ŭ Bieraści, a jaho sustrakajuć siamja i siabry. Jana napisała ŭ dopisie, što heta zdaryłasia 13 sakavika.
Možna mierkavać, što Siarhieju Čabieraku za ŭdzieł u pratestach prysudzili «chatniuju chimiju» abo «chimiju», raz jaho adpuścili na volu paśla vyniasieńnia prysudu.
Staŭ viadomy prysud mytniku Skubiłavu, abvinavačanamu ŭ «zdradzie dziaržavie»
U Mahilovie piaciarych čałaviek asudzili za padpał kijoska ŭ žniŭni 2020 hoda
Homielskaja žurnalistka, jakaja pracavała ŭ Biełarusi da apošniaha, źjechała ź Biełarusi praz razmovu ŭ KDB
Budaŭnika, jaki doŭhi čas žyŭ u Rasii, asudzili ŭ Viciebsku za palityku. A ciapier abviaścili «terarystam»
Ciapier čytajuć
Na mitynhu ŭ Vilni zatrymali pravakatara. A Cichanoŭski zajaviŭ pra namier dabivacca sustrečy ź Zialenskim31
Kamientary