Va Ukrainie zahinuŭ kamandzir Pskoŭskaj dyvizii, pryznačany Pucinym mienš čym dva miesiacy tamu
Škoły Dahiestana ŭ paniadziełak pačali paviedamlać pra hibiel kamandzira 76-j hvardziejskaj desantna-šturmavoj dyvizii VDV (viadomaj taksama jak Pskoŭskaja) pałkoŭnika Abdułaziza Šychabidava.
Uładzimir Pucin pryznačyŭ jaho na hetuju pasadu tolki ŭ siaredzinie sakavika, piša «Ahientstvo».
Pavodle danych Z-pablikaŭ, Šychabidaŭ užo pachavany na Trajekuraŭskich mohiłkach u Maskvie.
U licei №13 Kaśpijska adkryli pamiatny kutok, pryśviečany Šychabidavu. Tut raźmiaścili jaho fatahrafii i materyjały pra bajavy šlach vajskoŭca. A ŭ Bujnakskaj siaredniaj škole-internacie №3 prajšli pazakłasnyja mierapryjemstvy dla vučniaŭ 7—9 kłasaŭ. Padletki ŭpryhožyli kabiniet fatahrafijami vajskoŭca i hieorhijeŭskaj stužkaj, praviali chvilinu maŭčańnia i zapalili «śviečki pamiaci». Paśla publikacyi fotarepartaž z akaŭnta Bujnakskaj škoły byŭ vydaleny, ale zachavaŭsia ŭ veb-archivie.
Pra śmierć Šychabidava paviedamili i praŭładnyja z-pabliki. U supołcy «Za Radzimu i VDV» napisali, što raźvitańnie z kamandziram adbyłosia na Trajakuraŭskich mohiłkach u Maskvie ŭ paniadziełak.
76-ja hvardziejskaja desantna-šturmavaja dyvizija VDV udzielničaje ŭ kanflikcie z Ukrainaj z 2014 hoda. Jaje bajcy brali ŭdzieł u zachopie Kryma, a taksama ŭ bajavych dziejańniach u Danieckaj vobłaści, pra što stała viadoma paśla masavych pachavańniaŭ desantnikaŭ.
Paśla poŭnamaštabnaha ŭvarvańnia va Ukrainu ŭ lutym 2022 hoda, mienavita Pskoŭskaja dyvizija stajała ŭ Bučy. Rasśledavańnie ahienctva Reuters paćviardžała suviaź vajskoŭcaŭ złučeńnia z aktami hvałtu suprać mirnych žycharoŭ.
10 sakavika Pucin pavysiŭ byłoha kamandzira dyvizii hienierał-majora Siarhieja Čubarykina da pasady kamandujučaha VDV, a na jaho miesca pryznačyŭ Šychabidava. Praź miesiac Pucin pachvaliŭ 76-ju dyviziju, zajaviŭšy, što «praktyčna kožny dzień» čuje pra jaje pośpiechi na froncie.
Paśla hetaha ŭ Dahiestanie, adkul rodam Šychabidaŭ, pačali raźmiaščać biłbordy ź jaho vyjavaj, a ŭ škołach — zmušali dziaciej malavać jaho partrety.
Da Ukrainy Šychabidaŭ udzielničaŭ u bajavych dziejańniach u Paŭdniovaj Asiecii i Siryi. Uznaharodžany tryma ordenami Mužnaści i Suvorava, a taksama miedalami «Za advahu» i «Za zasłuhi pierad Ajčynaj» I i II stupieni.
Ciapier čytajuć
Miortvym znojdzieny ŭ Varšavie Źmicier Kaśpiarovič — 43-hadovy były palitviazień, zavierbavany KDB10
Kamientary