Maršrutčyka, jaki padmanuŭ harotnych žančyn na 68 tysiač rubloŭ, asudzili na čatyry hady
Jon pradstaŭlaŭsia pasažyrkam śviatarom, u jakoha ŭ aŭtakatastrofie zahinuła ŭsia siamja.
Historyja pačałasia jašče ŭ 2016 hodzie. 48-hadovy žychar Maładziečanskaha rajona pracavaŭ kiroŭcam maršrutnaha taksi pa maršrucie Minsk — Niaśviž — Kleck — Siniaŭka.
U pracesie pracy jon znajomiŭsia z žančynami-pasažyrkami, pradstaŭlajučysia byłym śviatarom, raspaviadaŭ pra trahičnuju hibiel svajoj siamji ŭ aŭtakatastrofie i svaju «pašyranuju misiju» — dabračynnuju dziejnaść u dziciačym chośpisie ŭ Baraŭlanach.
Paśla znajomstva jon praciahvaŭ kantakty ŭ virtualnaj prastory, pryznavaŭsia ŭ kachańni i prasiŭ hrošy na «pachavańnie dziciaci z chośpisa», «apieracyju baćki ŭ Hiermanii» abo «reabilitacyju ŭ Maskvie».
Adna z achviar, žančyna z mužam-invalidam i dvuma niepaŭnaletnimi dziećmi, straciła bolš za 16 tysiač dalaraŭ. Inšaja addała ŭsie svaje źbieražeńni — 7500 dalaraŭ — na «ramont aŭtamabila».
Treciaja žančyna aformiła na svajo imia kredytnuju kartu «Chałva» i pieradała jaje złamyśniku. Jon karystaŭsia hrašyma, abiacaŭ papoŭnić rachunak, ale nie rabiŭ hetaha. Achviary byli vymušany ŭziać novyja kredyty, kab raźličycca z bankam.
Mužčyna taksama vykarystaŭ davier adnoj z žančyn, viedajučy jaje byłoha sužyciela, i vydumaŭ historyju pra jaho nibyta ciažkaje finansavaje stanovišča. Jon pierakanaŭ žančynu sabrać i pieradać jamu vialikuju sumu hrošaj, jakuju jon vykarystaŭ nie dla dapamohi, a jak zadatak za dom, jaki źbiraŭsia nabyć u hetaha sužyciela.
Jašče adna žančyna ŭziała kredyt na 5800 rubloŭ, kab jon adkryŭ svoj maršrut i nabyŭ mikraaŭtobus. Pieršapačatkova jon płaciŭ pracenty, ale potym źnik.
U vyniku piać žančyn źviarnulisia ŭ milicyju, a maršrutčyk uciok. Adnak u śniežni 2024 hoda jaho zatrymali supracoŭniki DAI padčas pravierki dakumientaŭ.
U ahulnym jon atrymaŭ ad achviar bolš za 68 tysiač rubloŭ. Hrošy byli vydatkavany na arendu kamfartabielnaha žylla, kuplu darahich hadžetaŭ, absłuhoŭvańnie prestyžnaha aŭtamabila i biaźbiednaje isnavańnie.
U dačynieńni da jaho zaviedziena kryminalnaja sprava pa č. 4 art. 209 UK (machlarstva ŭ asabliva bujnym pamiery). U sudzie jon całkam pryznaŭ vinu i raskajaŭsia.
Sud pryznačyŭ jamu pakarańnie — čatyry hady kałonii.
Ciapier čytajuć
Słova «Unavatuna» značyć «raj». Dzie na Šry-Łancy adpačyvała Mielnikava13
Kamientary