Samaja papularnaja pieśnia ŭ śviecie aficyjna pryznanaja nie płahijatam. Praces doŭžyŭsia šeść hadoŭ
Viarchoŭny sud Paŭdniovaj Karei pryznaŭ, što pieśnia Baby Shark nie ŭtrymlivaje płahijatu. Šeść hadoŭ tamu amierykanski kampazitar abvinavaciŭ u hetym karejskich pradziusaraŭ, paviedamlaje Bi-bi-si.
Aryhinalnaje videa karejskaj kampanii na YouTube sabrała bolš za 16,1 miljarda prahladaŭ i 45 młn łajkaŭ. U listapadzie 2020 hoda dziciačaja piesieńka Baby Shark stała samym papularnym videa na YouTube za ŭvieś čas, sabraŭšy 7 miljardaŭ prahladaŭ i abahnaŭšy Despacito. Krychu bolš za hod praź jana stała pieršym videa na YouTube, jakija nabrali 10 miljardaŭ prahladaŭ.
U 2019 hodzie kampazitar ź Ńju-Jorka Džonatan Rajt padaŭ pazoŭ u sud u Sieule. Jon śćviardžaŭ, što pieśnia Baby Shark, vypuščanaja paŭdniovakarejskaj studyjaj the Pinkfong Company, skapiravała jaho pieśniu 2011 hoda. Rajt zajaviŭ, što jamu naležać aŭtarskija pravy na interpretacyju narodnaj pieśni, ale Pinkfong byli pierakananyja, što ich viersija źjaŭlajecca aranžyroŭkaj toj ža pieśni — Jana źjaŭlajecca hramadskim zdabytkam.
Choć kampazitar i viedaŭ, što pravy na pieśniu nie achoŭvajucca, jon źviarnuŭ uvahu jašče na toje, što karejskaja kampanija pahražała sudom adnoj z palityčnych partyj (ciapierašniaja apazicyjnaja Partyja narodnaj ułady). Palityki vykarystoŭvali pieśniu ŭ prahramie kampanii.
«U majoj hałavie detali pačali składvacca… Chiba heta nie aznačaje, što maja viersija taksama abaroniena aŭtarskim pravam?»,— skazaŭ Rajt u intervju kanadskaj radyjoviaščalnaj karparacyi ŭ 2019 hodzie, raspaviadaje Bi-bi-si.
Sud pastanaviŭ, što viersija Rajta «nie dasiahnuła ŭzroŭniu istotnych źmien» u paraŭnańni z aryhinalnaj narodnaj pieśniaj, kab ličycca asobnym tvoram. Tamu jana nie achoŭvajecca jak asobnaja praca ŭ adpaviednaści z Zakonam ab aŭtarskim pravie.
Akruhovy i apielacyjny sudy Paŭdniovaj Karei adchilili pazoŭ Rajta i Viarchoŭny sud uchvaliŭ hetyja rašeńni.
Dakładna nichto nie viedaje, kali źjaviŭsia aryhinał pieśni pra siamju akuł. Ličycca, što Baby Shark źjaviłasia ŭ ZŠA ŭ 1970-ch hadach i stała papularnaj u dziciačych letnich łahierach. Pa adnoj ź viersij, pieśnia źjaviłasia ŭ 1975 hodzie, kali film «Skivicy» Styviena Śpiłbierha staŭ suśvietnym chitom.
U inšych viersijach ab stvareńni pieśni havorycca, što ŭ niekalkich interpretacyjach pieśni siužet byŭ nie takim aptymistyčnym: u adnoj viersii sierfieru adkusvaje ruku akuła, a ŭ druhoj — hałoŭny hieroj hinie.
Kamientary