JUNESKA vyłučyła hrant dla restaŭracyi pałacu Tyzienhaŭzaŭ ŭ Pastavach
Ale dla zaviaršeńnia restaŭracyi patrebnajasuma ŭ 40 razoŭ bolšaja
U Pastavach na Viciebščynie, dzie mieścicca hety pomnik epochi klasycyzmu kanca 18 stahodździa, adnaŭlenčyja pracy tryvajuć užo siomy hod.
Kulturnaja spadčyna Biełarusi vialikaja i bahataja, i pra heta viedajuć va ŭsim śviecie. Ale biez starońniaj dapamohi va ŭmovach siońniašniaj ekanamičnaj sytuacyi ŭ Biełarusi zachavać hetuju spadčynu było b vielmi ciažka. I tady na dapamohu prychodziać mižnarodnyja struktury. Hetak, hrant JUNESKA vyłučany dla restaŭracyi pałacava-parkavaha ansamblu hrafaŭ Tyzienhaŭzaŭ, jaki pa svajoj histaryčnaj značnaści staić poruč ź Mirskim i Niaśviskim pomnikami.
Ciapier u pałacy raźmieščanaja Pastaŭskaja centralnaja rajonnaja bolnica.
Ź ciaham času budynak pałacu pryjšoŭ u niezajzdrosny stan. Kab pryvieści da ładu balničnyja karpusy i adnačasova zachavać pomnik architektury, hałoŭny doktar bolnicy Uładzimier Čakavy vystupiŭ inicyjataram restaŭracyi pałacava-parkavaha ansamblu. Hetaja ideja napačatku nie znajšła finansavaj padtrymki na respublikanskim uzroŭni. Restaŭracyja išła za košt rajonnaha biudžetu, potym pastupova pačali pryciahvacca srodki abłasnoha biudžetu i, dziakujučy rupnaści spadara Ŭładzimiera, byŭ atrymany hrant JUNESKA.
«My ŭ respublicy čaćviortyja, chto atrymaŭ hrant JUNESKA, ale jon nievialiki – 50 miljonaŭ rubloŭ, a my ŭkłali ŭžo kala miljarda. Ale jon jak vudačka, z dapamohaj jakoj možna łavić rybu – hrošy. Hrant dapamahaje adčyniać dźviery čynoŭnikaŭ», – ličyć U. Čakavy. I sapraŭdy, sioleta Ministerstva kultury vyłučyła 60 miljonaŭ rubloŭ. Dla zaviaršeńnia restaŭracyi, jakaja raźličanaja da 2015 hodu, pavodle padlikaŭ hałoŭnaha doktara, spatrebicca jašče nia mienš za 2 miljardy rubloŭ. Siońnia pieršy etap rabot zavieršany: adrestaŭravanyja sklepy, i ŭ adnym ź ich užo pracuje retra-kaviarnia, pryviedzieny da ładu liŭniovy kalektar. A pierad pałacam, u balničnym dvoryku, ustalavany bronzavy pomnik arnitolahu Kanstancinu Tyzienhaŭzienu.
Ale treba jašče niamała ŭznavić: interjery i fasady, lapninu i bareljefy na pilastrach, kaminny pakoj, haspadarčyja karpusy, kanał, jaki koliś złučaŭ pałac z centram horadu. Jość ideja dobraŭparadkavać i park u styli 18 stahodździa. A naleta pobač z pomnikam Kanstancinu Tyzienhaŭzienu maje paŭstać jašče adzin – jahonamu svajaku, refarmataru i aśvietniku Antoniju Tyzienhaŭzienu.
❏
Fota K. Šastoŭski, Radzima.org.
Fotahalereja Pałacava-parkavy kompleks Tyzienhaŭzaŭ.
Jak biełarusy ŭ Vilni adznačyli Dzień Voli ŠMAT FOTA4
Jak biełarusy ŭ Vilni adznačyli Dzień Voli ŠMAT FOTA
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1111
Kamientary