Adabranuju ŭ miecenata siadzibu ŭ Padarosku vystavili na aŭkcyjon za 710 tysiač dalaraŭ
Były majontak Bochvicaŭ u Padarosku Vaŭkavyskaha rajona płoščaj amal u 2 tysiačy kvadratnych mietraŭ płanujuć pradać na aŭkcyjonie «BUTB-majomaść» 14 listapada. Raniej jaho adabrali ŭ miecenata Paŭła Padkarytava, jaki ŭkłaŭ u adnaŭleńnie zaniadbanaj siadziby kala miljona dalaraŭ ułasnych hrošaj, ale paśla 2020 hoda nie ŭpisaŭsia ŭ novuju ideałahičnuju palityku, bo zaŭsiody padtrymlivaŭ u Biełarusi demakratyčny ruch i nacyjanalnuju ideju.
Siadziba ŭ Padarosku, što ŭ Vaŭkavyskim rajonie, u daŭniejšyja časy naležała rodu Čačotaŭ i Bochvicaŭ.
Zaniadbany falvarak u 2013 hodzie vykupiŭ za 118 tysiač dalaraŭ rasijski inviestar ź biełaruskimi karaniami Pavieł Padkarytaŭ.
Pakul nie pačalisia prablemy, u adnaŭleńnie historyka-kulturnaj kaštoŭnaści było ŭkładziena bolš za 1 miljon dalaraŭ. Byŭ uparadkavany park, budynki, zroblena brama, daroha. Uviedzienaja sistema kanalizacyi i filtracyi.
Płanavałasia, što ŭ siadzibie budzie stvorany muziej biełaruskaj šlachty. Tam była razhornutaja časovaja ekspazicyja. Było adkryta 14 pakojaŭ. Prachodziła šmat ekskursij.
Prablemy ŭ turystyčnaha pradpryjemstva «Padarosk» źjavilisia ŭ 2022 hodzie, kali zatrymali jaho kiraŭnika Juryja Mielaškieviča.
Pad kryminalny pieraśled trapili taksama finansavy dyrektar Źmicier Karabač i buchhałtarka Volha Bałtrukievič. Im vystavili abvinavačańnie ŭ niaspłacie padatkaŭ i strachavych unioskaŭ z zarobkaŭ rabotnikaŭ amal na 400 000 rubloŭ. Juryj Mielaškievič pravioŭ pad vartaj paŭhoda i ŭ krasaviku 2023 hoda byŭ vyzvaleny pad paruku. Nieŭzabavie vyjšli na volu i inšyja fihuranty hetaj spravy, a kryminalnuju spravu ŭrešcie spynili.
U Paŭła Padkarytava majontak, adnak, zabrali. Pretenzii vystaviŭ Vaŭkavyski rajvykankam. Arhumientavali ich tym, što ŭsie budynki treba było ŭvieści ŭ ekspłuatacyju ciaham dvuch hadoŭ, to-bok da 2015-ha. Heta značyć — pravieści ŭsie inžyniernyja daśledavańni budynkaŭ, zrabić architekturna-budaŭničy prajekt, pravieści jaho ekśpiertyzu i vykanać usie budaŭniča-restaŭracyjnyja raboty pavodle prajekta.
Pry hetym da padziej 2020‑ha «Majontak Padarosk» pracavaŭ dobra, adnosiny z uładami byli narmalnyja, pretenzij, u tym liku ekanamičnych, nie ŭźnikała.
Ciapier siadzibu płoščaj kala 2 tysiač kvadratnych mietraŭ vystavili na aŭkcyjon «BUTB-Imuŝiestvo», jaki adbudziecca 14 listapada. Pačatkovaja cana — 2 160 490 rubloŭ (kala $711 tysiač).
Pradprymalnik Pavieł Padkarytaŭ nabyŭ u Hiermanii karcinu Stanisłava Žukoŭskaha. U joj jość zahadka
«Krepkachaziajstviennaja ruka daciahnułasia da spravy». Jak ciapier vyhladaje majontak Padarosk, adcisnuty va ŭładalnika FOTAFAKT
«Miljon dla mianie nie kišennyja hrošy». Biznesmien Pavieł Padkarytaŭ raskazaŭ pra adabrany majontak Padarosk i svajo miecenactva
Apisali majomaść majontka «Padarosk». U jaho adnaŭleńnie ŭkładalisia pryvatnyja inviestycyi
«Novy 1939-y, tolki da haspadara siadziby jany nie mohuć daciahnucca». Z uładalnikam «Majontka Padarosk» razarvali damovy i zabirajuć majomaść
Kamientary