Siabry i kalehi pamierłaha žurnalista Aleha Anufryjenki: Śladoŭ atručeńnia ekśpiertyza nie vyjaviła

35‑hadovy Aleh Anufryjenka pracavaŭ pradziusaram televizijnych vypuskaŭ navin i šef-redaktaram infarmacyjnych prahram kanała «Nastojaŝieje vriemia» ŭ Prazie. Pa słovach znajomych, jon byŭ absalutna zdarovym, rehularna praviaraŭ zdaroŭje i ničym nie złoŭžyvaŭ. Tamu situacyja, kali žurnalistu na pustym miescy stała drenna, šmat u kaho heta vyklikała pytańni.

«Bojazi [nakont nienaturalnaj pryčyny śmierci] byli ŭ asnoŭnym ŭ rasijskaj častki i «Radyjo Svaboda», i «Nastojaŝieho vriemieni». Tam paśla pačatku vajny sabrałasia šmat rasijskich zorak, jakija całkam surjozna bajalisia za siabie. Heta my, biełarusy, pryzvyčailisia ličyć «boža moj, kamu my nafih patrebnyja»? U krajnim vypadku daduć pa hałavie. A ŭ ich nastroi byli inšyja», — raskazała «Našaj Nivie» siabroŭka Aleha.

Mienavita pa inicyjatyvie kaleh z Rasii, akramia zvyčajnaj ekśpiertyzy i analizaŭ na ŭsie mahčymyja chvaroby, pravodziłasia i chimičnaja ekśpiertyza.

Faryda Kurbanhalejeva raspaviała, što ŭ jaje miežach na «Radyjo Svaboda» prychodzili śpiecyjalisty ŭ kaściumach chimičnaj abarony, jakija brali analizy z pracoŭnaha miesca Aleha, mazki, abśledavali jaho kampjutar i stoł, za jakim jon siadzieŭ.

Śladoŭ atručvańnia ekśpiertyza nie vyjaviła. Nakont hetaj viersii śmierci ŭ tym liku kansultavalisia sa śpiecyjalistami niamieckaj kliniki «Šaryte» (mienavita tam paśla atručvańnia lačyli rasijskaha apazicyjaniera Alaksieja Navalnaha).

«Aficyjny dyjahnaz u Aleha — aŭtaimunny mieninhaencefalit. Aŭtaimunnyja chvaroby sapraŭdy časam praciakajuć nie vielmi typova. Simptamatyki chvaroby ŭ Aleha raniej nibyta nie było, usio zdaryłasia raptoŭna, tamu, kaniečnie, usim było składana pavieryć u toje, što heta zdaryłasia naturalnym čynam. Što spravakavała taki start, kali faktyčna paśla pieršaha simptomu čałaviek upadaje ŭ komu? Jon straciŭ prytomnaść i bolš užo ŭ jaje nie pryjšoŭ. Tamu lehiendy i mify pra atručeńnie, viadoma, jość, i jany nikudy nie dziavajucca», — dzielicca surazmoŭca.

Aŭtaimunny encefalit raźvivajecca ŭ vypadku, kali imunitet čałavieka pamyłkova prymaje rečyvy hałaŭnoha mozhu za pahrozu

«Plus u Aleha była sapraŭdy dobraja pasada, ale nie publičnaja ŭsio ž. Na kanale byli bolš zornyja kalehi, bolšyja «vorahi».

Aleh Anufryjenka ŭ kancy 2010 hoda byŭ adličany z fakulteta žurnalistyki BDU za toje, što źniaŭsia ŭ ahitacyjnym roliku «Schavaj babulin pašpart». Na toj momant jon pracavaŭ na Biełteleradyjokampanii na kanale «ŁAD». Paśla pracavaŭ na Tut.by. Ź ciaham času pierajechaŭ u Čechiju, pracavaŭ na kanale «Nastojaŝieje vriemia».

• 1
• 0
• 0
• 1
• 0
• 4
• 0
• 0