Trubač Cim Suładze pachudzieŭ na 40 kh — voś što dla hetaha spatrebiłasia

Suładze raskazvaje, što maje prablemy z vahoj z 18 hadoŭ. Tady jany byli niekrytyčnyja: jon važyŭ 98 kh, a chaciełasia 90 kh. Jon pajšoŭ u trenažorku, kab pryvieści siabie ŭ formu, i atrymaŭ traŭmu, paśla hetaha jamu dazvolili tolki zajmacca płavańniem u basiejnie.

Vaha pajšła ŭvierch, i Cim pačaŭ šukać sposaby jaje skinuć:

«Vielmi šmat sprabavaŭ schudnieć, ja navat try razy lažaŭ u klinicy charčavańnia, kali jašče ŭ minułym žyćci žyŭ u Maskvie. Tady skidvaŭ vielmi šmat, ale potym usio viartałasia, bo skidvaŭ niapravilna.

Mnie raniej zdavałasia, što ja lahu ŭ tuju kliniku charčavańnia, mianie tam vylečać, ja skinu vahu, a potym viarnusia dachaty i budu jeści ŭsio toje ž, što i raniej. Viadoma, heta nie spracoŭvała».

Suładze kaža, što jaho najvialikšaja vaha za žyćcio — 173 kh, pry hetym rost mužčyny — 190 sm. Takuju vahu jon mieŭ dvojčy za žyćcio, u tym liku i viasnoj 2025-ha, kali vyrašyŭ znoŭ pasprabavać schudnieć.

Pavialičyć

Pačaŭ ź miedahladaŭ:

«Treba zrazumieć, što lišniaja vaha — heta chvaroba, takaja ž, jak i inšyja. Jana patrabuje miedykamientoznaha lačeńnia. Ja zdaŭ analizy i prajšoŭsia pa lekarach, mama mnie mocna dapamahła znajści patrebnych śpiecyjalistaŭ.

U maim vypadku vaha była źviazanaja z endakrynałohijaj. Ja schadziŭ na kansultacyju da adnaho z najlepšych endakrynołahaŭ u Litvie, i mienavita paśla hetaha ŭ mianie ŭsio pačało atrymlivacca. Ja trymajusia ŭžo amal hod, apietyt nie viartajecca».

Tady, u mai 2025-ha, doktarka pryznačyła Suładze leki, jakija ŭžo spryjajuć pachudzieńniu. U dadatak mužčyna pačaŭ zajmacca skandynaŭskaj chadźboj i naviedvać basiejn, ale pryznajecca, što robić heta nierehularna, bo nie chapaje času — šmat času sychodzić na vučobu ŭ Litoŭskaj akademii muzyki i teatra.

Ale isnuje adzin łajfchak, jaki dapamahaje ruchacca bolš. U Cima jość sabaki, i praz toje, što ich treba vyhulvać, jon maje dadatkova 2000 krokaŭ na dzień.

Suładze ŭpeŭnieny, što ŭ jaho vypadku fizičnaja aktyŭnaść — druhasnaje. Jak ličyć mužčyna, jaho lišniaja vaha pierš za ŭsio źviazanaja z charčavańniem. Kab skidvać vahu, daviałosia źvieści da minimumu pachody pa fastfud i šakaładki dy bułački:

«Raniej ja moh schadzić u «Burhier Kinh», praz 15 chvilin u «Makdonalds», a potym jašče i picaj zajeści, ja jeŭ usio zapar. A ciapier nie, ciapier mama — moj hałoŭny dyjetołah, jana mnie rychtuje porcyi ježy. Z saboj biaru termičnuju sumku, ja jaje sa Šviejcaryi pryvioz. Tam u mianie i abied, i viačera, a kali čahości nie chapaje, ja heta nabyvaju ŭ stałoŭcy akademii. 

Siońnia, naprykład, abied u mianie byŭ z doma, a na viačeru ja nabyŭ hulaš z rysam i bolš ničoha, nijakich šakaładak, śnikiersaŭ ci bułačak. Nie kažu, što ŭvohule pierastaŭ jeści tyja prysmaki, ale imknusia źvieści heta da minimumu».

Zamiest škodnaj ježy Cim pačaŭ jeści bolš sadaviny i harodniny. A ci jość łomka pa fastfudzie? Kaža, što nie — napeŭna, dapamahajuć leki.

Ciapier muzyka važyć 134 kh i imkniecca schudnieć da 90 kh, ale ŭžo ciapier jamu žyviecca našmat lahčej. Cim adznačaje, što maje bolš sił i na toje, kab ruchacca, i prosta na žyćcio.

«Kali ja vučyŭsia ŭ vilenskaj kalehii, ja pračynaŭsia rankam, vyhulvaŭ sabaku, pryjazdžaŭ na zaniatki da pieršaj pary, i mnie ŭžo było błaha. Kali pačaŭ vučycca tut, piedahoh pa śpiecyjalnaści chacieŭ pryznačyć zaniatki a 9-j, dyk ja jamu tłumačyŭ, što fizična nie zmahu: navat kali i dajedu, budu sonny jak zombi. Prasiŭ jaho taksama, kab my zajmalisia siedziačy, a ciapier ja mahu biez prablem uvieś zaniatak adyhrać stojačy i pryjechać na jaho a 9-j. Tym bolš što tut treba pryjazdžać za hadzinu da pačatku zaniatku pa śpiecyjalnaści, kab razyhracca.

Mnie stała praściej pierasoŭvacca pa spravach. Ja mahu ŭ akademii, dzie vučusia, niekalki razoŭ padniacca ź pieršaha paviercha na čaćviorty, a raniej heta było prablemaj», — radujecca mužčyna.

Dniami Suładze zaŭvažyŭ jašče adzin plus ad pachudzieńnia. Ciapier jon moža nabyvać adzieńnie ŭ zvyčajnaj kramie, a nie na kirmašy ci ŭ śpiecyjalnych kramach dla ludziej ź niestandartnymi pamierami:

«Heta kruta, možna šopicca, bolšy vybar rečaŭ. Kali ja raniej kuplaŭ džynsy, jany za niekalki miesiacaŭ ściralisia pamiž noh i ja nabyvaŭ nastupnyja. A ciapier ja pieršy raz nie viedaju za jaki čas nabyŭ adnačasova dźvie pary džynsaŭ, to-bok u mianie ciapier jość dźvie novyja pary dobrych džynsaŭ. Raniej u hetym nie było sensu, bo jany praciralisia vielmi chutka».

Ale skinuć vahu — tolki pałova spravy, bo treba jašče i zachavać novuju vahu na dalejšaje žyćcio. U Cima pakul niama dakładnaha płana, jak jon źbirajecca tuju vahu padtrymlivać. Ale mužčyna razumieje, što jamu treba budzie bolš ruchacca i mieć paŭnavartasnaje charčavańnie, tym bolš što z pachudzieńniem jamu budzie dastupna bolš varyjantaŭ ruchalnych aktyŭnaściaŭ.

Matyvacyi ŭ mužčyny chapaje:

«Jak čałaviek tvorčy, ja chaču jašče mnoha čaho zrabić u svajoj halinie, i mnie na heta spatrebicca šmat hadoŭ. Prosta kab žyć i być u dobrym stanie, kab być pazityŭnym i kab inšyja ludzi da ciabie imknulisia.

Jość prykłady, kali muzyki vystupali na scenie da sta hadoŭ. Niechta, moža, i bolš vystupaŭ. Pakolki pieršuju pałovu žyćcia ja trochi heta ŭsio prafakapiŭ, ciapier chaču nahnać».

• 12
• 1
• 0
• 0
• 0
• 0
• 0
• 2