«Biełaja amfara» – śviata nierealnych fantazij

Nazvy biełaruskich pradpryjemstvaŭ, jakija ŭziali ŭdzieł u konkursie «Biełaja amfara», možna pračytać na etykietkach tavaru ŭ luboj kramie hatovaha adzieńnia. Heta mienskaja «Miłavica», viciebskija «Kamintern» i «Biełl Bimba», žodzinski «Śvitanak» dy inšyja, jak ciapier modna kazać, brendy. Ale toje, što možna kupić u kramie, adroźnivajecca ad pakazanaha na konkursie ŭ kulturna-dziełavym centry «Viciebsk» jak sučasny elektračajnik ad babulinaha samavara.

Natalla Mizonova, vykładčyca dyzajnu adzieńnia z Rasii, naviedaŭšy pamiž pakazami konkursnych madelaŭ viciebski ŭniviermah, vyjšła adtul u poŭnym ździŭleńni.

– Toje, što pradajecca ŭ vašych kramach, možna było nasić chiba 20 hadoŭ tamu! – biez usiakich revieransaŭ u bok biełaruskaj lohkaj pramysłovaści skazała N.Mizonava žurnałstam, jakija zadali joj tradycyjnaje pytańnie pra ŭražańni ad Viciebsku.

Tym časam na «Biełaj amfary» byli pakazanyja bolš za 100 novych kalekcyj adzieńnia: častku ź ich pradstavili dyzajnierskija adździeły pradpryjemstvaŭ, druhuju – budučyja madeljery, jakija tolki vučacca ŭ adpaviednych navučalnych ustanovach.

I hledačy, i žury vysoka acanili, dy prykładu, novuju kalekcyju ad «Miłavicy». Ale navat u firmovych kramach jana źjavicca nie chutka: pryhožaja, ale darahaja bializna časta zaležvajecca na palicach pa dva i try siezony, tamu samyja novyja ŭzory pradukcyi vyvoziać pieravažna za miežy Biełarusi – tudy, dzie pakupniki hatovyja płacić za ich hrošy.

Toje samaje možna skazać i pra vyraby inšych pradprajemstvaŭ – ich viazuć u zamiežža, bo pieravažnaja kolkaść biełarusaŭ kuplaje adzieńnie na kiramašach, nia duža ŭhladajučysia ŭ firmovyja znaki i cetliki. Samy važny faktar dla našych suajčyńnikaŭ – heta košt, a nie proźvišča dyzajniera dy nazva kampanii.

Adnak biełaruskija studenty, niahledziačy ni na što, marać pra słavu suśvietna viadomych kuciurje i ździŭlajuć hledačoŭ konkursa kreatyŭnymi znachodkami. Pakul na ich hladziać z zachapleńniem, ale praz kolki hadoŭ vypuskinikam VNU daviadziecca pakinuć alma mater i zaniać miesca ŭ pracoŭnych šerahach.

Tak, dyzajnier Maryna Davydava, jakaja trojčy była ŭładalnicaj Hran-pry «Biełaj amfary», siońnia pracuje na viciebskim pradpryjemstvie «KIM» – jašče nie stratnym, ale j nie takim bahatym, kab zakupić novyja technałahičnyja linii dla vytvorčaści sučasnych vyrabaŭ, pra jakija niekali maryła ŭdzielnica konkursu.

Zrešty, žychary Viciebsku ŭžo zrazumieli, što «Biełaja amfara» – heta prosta śviata nierealnych fantazij, i nie sprabujuć znajści ŭ handlovaj sietcy toje, što ŭraziła ich na podyjumie. Ci nie tamu najbolšaj papularnaściu ŭ hledačoŭ karystajucca pakazy «Fasion Dog» – modnaha adzieńnia dla sabak: šyjecca jano dziela «čystaha mastactva» i ŭłasnaha zadavalnieńnia dyzajnieraŭ, bo naŭrad ci niechta zachoča nabyć dla prahułak svajmu hadavancu kapialušyk «ad kuciur», majučy va ŭłasnym harderobie nibyta «Adidas» abo «Dolce & Gabbana» ŭkrainskaj padpolnaj vytvorčaści.

❏

Fota Sieržuka Sierabro, Narodnyja naviny Viciebsku.

Hladzi jašče:

Fotarepartažy ad «Narodnych navinaŭ Viciebsku»:

Biełaja amfara - 2006. Zaklučny hałakancert

Biełaja amfara - 2006. Druhi konkursny dzień

Biełaja amfara - 2006. Pieršy konkursny dzień

• 0
• 0
• 0
• 0
• 0
• 0
• 0
• 0