Baćki vučniaŭ 4 A klasy mienskaj himnazii № 23, dzie navučajecca starejšaja dačka Alaksieja Michaleviča, atrymali adkaz na chadajnictva, u jakim jany prasili źmianić mieru strymańnia dla byłoha kandydata ŭ prezydenty.
18 studzienia na baćkoŭskim schodzie ŭ 4 A klasie 23 himnazii Miensku 16 baćkoŭ pastavili svaje podpisy pad chadajnictvam pra źmienu miery strymańnia dla Alaksieja Michaleviča, a taksama vykazali namier stać jahonymi asabistymi daručnikami. Staršynia baćkoŭskaha kamitetu 4 A klasy Siarhiej Leščanka raspavioŭ, jak adreahavali ŭłady na chadajnictva baćkoŭ:
«Jak staršynia baćkoŭskaha kamtetu 4 „A“ klasy ja nakiravaŭ chadajnictva pa dvuch adrasach: u prakuraturu i ŭ HUUS Mienharvykankamu».
Paśla hetaha atrymaŭ adkaz, što našaja prośba była nakiravanaja ŭ KDB Respubliki Biełaruś. Z KDB adkaz pryjšoŭ, čamuści, na jurydyčny adras 23 himnazii.
Z hetym adkazam ja byŭ tolki aznajomleny. Źmiest prykładna nastupny: baćkoŭski kamitet ci baćkoŭski schod nie źjaŭlajecca hramadzkaj arhanizacyjaj, jakaja moža mieć dačynieńnie da hetaj spravy, tamu my nia možam chadajničać i miera strymańnia Alesiu Michaleviču nia budzie zaraz źmienienaja".
Pravaabaronca Taciana Hacura, jakaja taksama źjaŭlajecca siabram baćkoŭskaha kamitetu klasy, u jakoj navučajecca starejšaja dačka Alaksieja Michaleviča, ličyć atrymany adkaz nieadpaviednym zakanadaŭstvu:
«Zhodna z kryminalna-pracesualnym kodeksam daručnikami mohuć źjaŭlacca asoby, jakija zasłuhoŭvajuć davier i jakija dajuć piśmovaje abaviazalnictva pra toje, što padazravany albo abvinavačany, kali budzie znachodzicca na voli, nia budzie chavacca ad orhanaŭ kryminalnaha pieraśledu i sudu. Mnie padajecca, što baćki jakraz tyja ludzi, jakija zasłuhoŭvajuć davieru. Dumaju, što ŭ hetym adkazie ŭvohule nie razhladałasia pytańnie, zasłuhoŭvajem my davieru ci nie zasłuhoŭvajem, a prosta adkazali, što ŭ pryncypie nie majem prava, chacia heta nie pa zakonie».
Alaksiej Michalevič u liku 37 abvinavačanych pa kryminalnaj spravie ab masavych biesparadkach i z 20 śniežnia 2010 hodu znachodzicca pad vartaj u SIZA KDB.
Kamientary