Biełaruś pamiž barbaraŭ i hvałtaŭnikoŭ

«Biełarusy i rasiejcy źjaŭlajucca praktyčna adnym narodam. Heta asnova našaj palityki»... «Rasieja zaciahnuła viaroŭku vakoł šyi i a zatym kaža: davajcie razmaŭlać»... «Biez usiakich na toje padstaŭ RF užo zapisała siabie ŭ viadučyja centry siły ŭ śviecie. Źjavilisia niejkija impierskija zamaški»... «Nam samaje kryŭdnaje, što takija dziejańni raspačała naša sajuźnica...»

Alaksandar Łukašenka ŭ interviju ahienctvu «Reuters» zajaviŭ, što Biełaruś budzie šukać svoj ułasny šlach, admaŭlajučysia jak ad demakratyi eŭrapiejskaha ŭzoru, hetak i ad hłybiejšaj intehracyi z Rasiejaj. Jon taksama adkinuŭ prapanovy narmalizacyi adnosinaŭ z Eŭraźviazam i zajaviŭ, što hatovy admovicca ad usialakich pretenzijaŭ da Rasiei ŭ vypadku, kali Rasieja adnović ekanamičnuju padtrymku Biełarusi ŭ raniejšych pamieraŭ.

Alaksandar Łukašenka skazaŭ, što nia moža być navat razmovy pra toje, kab Biełaruś pahadziłasia na «nievykanalnyja patrabavańni» Eŭraźviazu nakont svabody ŚMI, svabodnych vybaraŭ i viaršynstva zakonu, jakija letaś byli vyłučanyja Eŭrakamisijaj dziela palapšeńnia adnosin EZ i Biełarusi.

Spadar Łukašenka pry hetym zaznačyŭ, što Biełaruś zastajecca adkrytaj Zachadu i blizkaj Rasiei. Adnak jon nazvaŭ ciapierašniuju palityku Rasiei ŭ adnosinach da Biełarusi niepaśladoŭnaj i šavinistyčnaj.

Barbarskaja akcyja Rasiei

Padvyšeńnie koštaŭ na naftu i haz spadar Łukašenka nazvaŭ barbarskaj akcyjaj Rasiei, jakaja budzie kaštavać Biełarusi 5 miljardaŭ dalaraŭ, što składaje da 10 adsotkaŭ VUP.

Łukašenka: «Vielmi baluča, što takija dziejańni pradprymaje naš sajuźnik, dziaržava, jakaja źjaŭlajecca samaj blizkaj dla nas. Rasieja pavinna admovicca ad vialikadziaržaŭnickaha padychodu i maniery hladzieć na nas, jak na małodšaha brata»

Spadar Łukašenka zajaviŭ, što Biełaruś budzie imknucca kampensavać hetyja straty, pieravioŭšy na rynkavyja košty apłatu Rasiejaj arendy vajskovych abjektaŭ u Biełarusi, tranzytu tavaraŭ i abaronu miežaŭ. Ale spadar Łukašenka nastojvaje, što Biełaruś žadaje dobrych dačynieńniaŭ z Rasiejaj, svaim hałoŭnym handlovym partneram.

Łukašenka: «Biełaruskaje kiraŭnictva nie zrabiła istotnych źmienaŭ svajoj palitycy. Biełarusy i rasiejcy źjaŭlajucca praktyčna adnym narodam. Heta asnova našaj palityki. Ale my nia budziem ciarpieć ani cisk ani padman u našych dačynieńniach z Rasiejaj».

Pavodle spadara Łukašenki, prajektu stvareńnia sajuzu z Rasiejaj zaminaje «imperskaje žadańnie Rasiei prahłynuć Biełaruś», a nie ŭstalavać suviazi na bazie suverennaj roŭnaści dźviuch dziaržaŭ.

«Nas niemahčyma złamić»

Spadar Łukašenka skazaŭ, što navat kali Rasieja całkam spynić pastaŭki svajoj nafty ŭ Biełaruś, Miensk zmoža zahruzić svaje NPZ i svaju ekanomiku, pryciahnuŭšy zamiežnych investaraŭ.

«Nas vielmi ciažka złamić, nas faktyčna niemahčyma złamić, i nichto nas nie pastavić na kaleni»,‑‑ zajaviŭ A. Łukašenka ŭ interviju ahienctvu Reuters.

Havoračy pra cisk Eŭraźviazu i ZŠA na biełaruskaje kiraŭnictva, jakija ŭviali suprać jaho i jahonaha najbližejšaha atačeńnia vizavyja abmiežavańni i pahražajuć zamarožvańniem bankaŭskich rachunkaŭ, A. Łukašenka skazaŭ:

«My zaŭsiody chočam siadzieć ź imi za adnym stałom. Jak možna zamacavać adnosiny ŭ takoj atmasfery. Heta padobna na palityku, jakaja pravodzicca Rasiejaj, što zaciahnuła viaroŭku vakoł šyi i a zatym kaža: davajcie razmaŭlać».

Ahienctva «Rojterz» nahadvaje, što A. Łukašenku abvinavačvajuć u falšavańni vybaraŭ, aryštach apazycyi, zakryćci niezaležnych hazet, i vykazvaje mierkavańnie, što jość mała šancaŭ na toje, kab jon pamianiaŭ svoj bieskampramisny styl kiravańnia.

Na pytańnie Reuters, ci chacieli Vy b naładzić dobryja stasunki z Zachadam, Alaksandar Łukašenka adkazaŭ, što «zaŭsiody b chacieli, My daŭno prapanavali eŭrapiejcam tyja sfery supracoŭnictva, i tyja šlachi supracoŭnictva, jakija b vyvieli nas na ŭzrovień dobrych susiedziaŭ. Ale eŭrapiejcy nia tolki ciapier, ale i zaŭsiody stavili dla nas nieprymalnyja ŭmovy. Nas vielmi ciažka złamać, nas uvohulle niemahčyma złamać, i na kaleni nas nichto nie pastavić. Pahladzicie na mapu – my znachodzimsia ŭ centry cyvilizavanaha śvietu, tamu nas składana abyjści i abjechać. Vy pavinny razumieć, kali vy nia chočacie ŭ svaim domie, ŭ centry hetaha domu mieć napružanaść, stvaryć terytoryju, jakaja była b padobnaja da Čačni dy jašče jakoj‑niebudź častki śvietu; a ja ŭpeŭnieny, što i eŭrapiejcam, i rasiejcam heta nia treba, to vy vymušanyja budziecie supracoŭničać z nami. Jak cyvilizavanyja ludzi vymušanyja budziecie pryznać, što ŭ hetych samych biełarusaŭ jość takija ž samyja nacyjanalnyja intaresy, jak i ŭ niemcaŭ, brytancaŭ ci francuzaŭ, čechaŭ, palakaŭ i ŭkraincaŭ.

«My abaviazkova vyjdziem, vyrulim na cyvilizavanyja rejki»

Prezydent Biełarusi zajaviŭ, što «Eŭropa pavinna razumieć, što my ‑‑ samaja stabilnaja častka Eŭropy. My ad vas šmat nia prosim, my havorym: davajcie razmaŭlać davajcie budziem damaŭlacca, i vy ŭbačyli b, što biełaruskaje kiraŭnictva, naša kraina – heta taki partner, jakoha i žadać bolš nia treba.

My abaviazkova vyjdziem, vyrulim na tyja cyvilizavanyja rejki, jakija ŭłaścivyja ŭsiamu śvietu, ale patrebien čas. My z razruchi vypaŭzajem, my ź jamy vychodzim…»

«Zapatrabujem ad Rasiei zapłacić za ŭsie pasłuhi, jakija Biełaruś akazvała joj biaspłatna»

Łukašenka: «Nam bolš za ŭsio kryŭdna toje, što takija barbarskija dziejańni pradpryniała kraina, naša chaŭruśnica, samaja blizkaja nam kraina, dzie žyvie samy blizki nam narod. A prezydent Rasiei havoryć: «My chočam rynačnych stasunkaŭ». Dyk voś zychodziačy z hetaha pryncypu, z rynačnych umovaŭ my taksama zapatrabujem ad Rasiei zapłacić za ŭsie pasłuhi, jakija Biełaruś akazvała joj biaspłatna. Naprykład, kab stvaryć Rasiei ŭzbrojenyja siły tut, na zachodnim kirunku, kab jany vykonvali funkcyju, jakuju ciapier vykonvajuć biełaruskija ŭzbrojenyja siły, Rasiei ŭ ciapierašnich cenach spatrebiłasia b 25 miljardaŭ dalaraŭ».

«My hatovyja admovicca ad usialakich pretenzij da Rasiei»

Łukašenka: «Ja ŭpeŭnieny, što ŭ Rasiei i ŭ biznesie, i ŭ palitycy (pakolki heta rašeńnie nie biznesmenaŭ, a rašeńnie palitykaŭ), ja ŭpeŭnieny, što zdarovy sens pieramoža, i Rasieja vierniecca ŭ Biełaruś da tych pryncypaŭ supracoŭnictva, na jakich jano budavałasia. I my hatovyja da hetaha suprauoŭnictva ŭ luby dzień,

My 10 hadoŭ z papiarednim kiraŭnictvam Rasiei cehła da cehły vybudoŭvali našyja stasunki. I my nia schilnyja być inicyjatarami razbureńnia našych stasunkaŭ… Apošniaja zajava prezydenta Pucina dy i nšych uradoŭcaŭ Rasiei havorać pra toje, što jany chacieli b praciahnuć sajuźnickija dačynieńni z našaj krainaj. My da hetaha hatovyja, ale dla hetaha patrebnyja kankretnyja praktyčnyja kroki. Z svajho boku my hatovyja ich zrabić nieadkładna, i admovicca ad usialakich pretenzij, pra jakija ja tolki što havaryŭ ‑‑ finansavych, ekanamičnych da Rasiejskaj Federacyi, kali Rasieja zrobić analahična z svajho boku».

• 0
• 0
• 0
• 0
• 0
• 0
• 0
• 0