4 sakavika paśla ciažkaje i praciahłaje chvaroby pajšoŭ z žyćcia Ryhor Viačorka. Jon byŭ z tych ludziej, pra jakich kažuć, što žyćcio adbyłosia, kali čałaviek pabudavaŭ dom i naradziŭ syna.
Ryhor Viačorka naradziŭsia 27 lutaha 1934 hodu ŭ vioscy Miarlin na Stolinščynie. Paśla Pinskaha finansavaha technikumu j ekanamičnaha fakultetu Maskoŭskaha dziaržuniversytetu pracavaŭ pa specyjalnaści na roznych uradavych pasadach.
Znany paet i hramadzki dziejač Hienadź Buraŭkin zapomniŭ jaho jak ekanamičnaha daradcu pieršaha sakratara CK KPB Piatra Mašerava. Sam Buraŭkin byŭ tady staršyniom Dziaržteleradyjo.
«Heta byŭ vielmi spakojny, uraŭnavažany, intelihientny razumny čałaviek. Jon nikoli nie naviazvaŭ svajoj dumki. Kali my troški bližej paznajomilisia, ja ŭbačyŭ, što heta čałaviek uśmiešlivy, z dobrym adčuvańniem humaru.
Nu a paźniej, kali ŭžo vakoł jahonaha syna Vincuka pačalisia ŭsialakija spravy, to znoŭ ža mnie było pryjemna, što tut nie było takoj baćkoŭskaj biezahladnaj lubovi biazdumnaj, i ŭ toj ža čas była vialikaja pavaha da taho, što syn maje ŭ niejkich pazycyjach — nu, vidać, nia toj pohlad, jaki mieŭ Ryhor Mikałajevič.
Tamu ŭ maim siońniašnim ujaŭleńni jon paŭstaje čałaviekam vielmi hodnym — i ŭ toj ža čas tym, što, moža być, u žyćci jon i nie paśpieŭ usiaho vykazać», — apavioŭ Hienadź Buraŭkin.
Blizkija i rodnyja Ryhora Viačorki ličać, što mienavita pohlady j spravy jahonaha syna lidera Partyi BNF Vincuka Viačorki spryčynilisia da taho, što jahony vysoki prafesijanalizm u apošnija hady nia byŭ zapatrabavany. Ale svajaki i ŭdziačnyja jamu za pryncypovaść. Havoryć unuk Franak:
«Moj dzied byŭ, napeŭna, samy ščyry, samy sumlenny, samy adkazny čałaviek, jakoha ja viedaŭ, jaki ŭvohule kali‑niebudź moh isnavać. Jon nikoli‑nikoli ni pierad kim nie prynižaŭsia, nikoli nie vykonvaŭ tupych zahadaŭ, a ŭvieś čas rabiŭ tak, jak padkazvała sumleńnie. Ja hanarusia svaim dziedam, hanarusia tym, što jon vychavaŭ majho baćku, a baćka vychavaŭ mianie. Ale, kali ščyra, dzied mianie vychavaŭ».
Ryhor Viačorka budzie pachavany 6 sakavika na Ŭschodnich mohiłkach Miensku. U jaho zastalisia dvoje dziaciej, čaćviora ŭnukaŭ i adzin praŭnuk.
Jak biełarusy ŭ Vilni adznačyli Dzień Voli ŠMAT FOTA4
Jak biełarusy ŭ Vilni adznačyli Dzień Voli ŠMAT FOTA
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1111
Kamientary