Papiaredžańnie vyniesła Hienieralnaja prakuratura.
Pradstaŭnik arhkamiteta pa stvareńni partyi «Biełaruski ruch» Viktar Ivaškievič papiaredžany pra niedapuščalnaść dziejańniaŭ, jakija mohuć być nakiravany na «padryŭ dziaržaŭnaha suvierenitetu». Papiaredžańnie apazicyjnamu palityku było vyniesiena ŭ Hienieralnaj prakuratury Respubliki Biełaruś, kudy jaho vyklikali 27 sakavika.
«Siońnia ŭ 15.00 mnie prapanavali jašče raz padyści ŭ prakuraturu, dzie budzie vydadziena piśmovaje papiaredžańnie», — paviedamiŭ Ivaškievič žurnalistam.
Pavodle słovaŭ palityka, papiaredžańnie źviazana ź jaho vykazvańniami pra nieabchodnaść uviadzieńnia sankcyj suprać biełaruskaha režymu. «Ja siabie nie liču vinavatym u padryvie dziaržaŭnaha suvierenitetu. Naadvarot, dziejańni biełaruskich uładaŭ, ich represii pravakujuć i padšturchoŭvajuć da ŭviadzieńnia suprać krainy sankcyj.
Nie ad vykazvańniaŭ Ivaškieviča zaležyć ŭviadzieńnie sankcyj, a ad pavodzinaŭ uładaŭ», — padkreśliŭ Ivaškievič.
Jon taksama paviedamiŭ, što razhladaje mahčymaść zvarotu ŭ prakuraturu z prośbaj acanić dziejańni biełaruskich uładaŭ na pradmiet padryvu dziaržaŭnaha suvierenitetu. «Ja spytaŭ u prakuratury, ci buduć jany razhladać mahčymyja dziejańni na padryŭ dziaržsuvierenitetu, kali jany buduć zychodzić z boku ŭładaŭ, čynoŭnikaŭ. Mnie adkazali, što pravierku mohuć pravodzić u dačynieńni da luboha hramadzianina», — raspavioŭ palityk.
Nahadajem, 14 sakavika Viktar Ivaškievič źviarnuŭsia da ŭradaŭ jeŭrapiejskich krain z zaklikam nieadkładna ŭvieści embarha na kuplu i transparciroŭku biełaruskich naftapraduktaŭ da vyzvaleńnia asudžanaha apazicyjaniera Siarhieja Kavalenki, jaki trymaje praciahłuju haładoŭku i straciŭ bolš za 30 kh vahi.
«Naturalna, dyktatar pa dobraj voli nikoha nie adpuścić. Značyć, jaho treba prymusić heta zrabić. Prymusić Łukašenku vypuścić z turmy ŭsich palitviaźniaŭ, a ŭ pieršuju čarhu Siarhieja Kavalenku, mohuć tolki realnyja ekanamičnyja sankcyi, takija jak zabarona uradami krain Jeŭrapiejskaha sajuza kuplać i transpartavać biełaruskija naftapradukty na ich terytoryi. Ale dla taho, kab takija sankcyi byli ŭviedzienyja, biełaruskim palitykam, hramadskim dziejačam, usim biełarusam, kaho sapraŭdy chvaluje los Siarhieja Kavalenki, nieabchodna terminova, jasna i publična zapatrabavać ad jeŭrapiejskich krain hetyja sankcyi ŭvieści. Tamu ja, Ivaškievič Viktar Antonavič, sustaršynia Rady pradstaŭnikoŭ Narodnych schodaŭ, adkryta i publična źviartajusia da ŭradaŭ jeŭrapiejskich krain z patrabavańniem nieadkładnaha zabarony kuplać i transpartavać biełaruskija naftapradukty na ich terytoryi, inakš śmierć Siarhieja Kavalenki laža i na vaša sumleńnie», — havaryłasia ŭ zvarocie palityka.
Kamientary