Na ŭručeńni Ivaškieviču papiaredžańnia Hienprakuratury prysutničała zdymačnaja hruppa BT
Na ŭručeńni pradstaŭniku arhkamiteta pa stvareńni partyi «Biełaruski ruch» Viktaru Ivaškieviču papiaredžańnia Hienieralnaj prakuratury Biełarusi 27 sakavika prysutničała zdymačnaja hrupa biełaruskaha telebačańnia, paviedamiŭ palityk.
Videaapieratara BiełaPAN u budynak Hienprakuratury nie puścili.
«Namieśnik hienprakurora vydaŭ mnie aficyjnaje papiaredžańnie ab niedapuščalnaści parušeńnia zakonu. Padčas uručeńnia hetaha papiaredžańnia prysutničała zdymačnaja hrupa biełaruskaha dziaržaŭnaha telebačańnia», — skazaŭ Ivaškievič.
Pavodle jaho słoŭ, paśla začytvańnia papiaredžańnia ŭ palityka spytali, ci zrazumieły jamu sens taho, što jon adčuŭ, na što Ivaškievič adkazaŭ, što jamu ŭsio zrazumieła. «Ja źviarnuŭsia da prakuratury i da dziaržaŭnaha telebačańnia i skazaŭ, što najbolšuju škodu Biełarusi nanosić biełaruskaje kiraŭnictva, jakoje svaimi dziejańniami — i ŭ pieršuju čarhu najaŭnaściu palitviaźniaŭ — pravakuje ekanamičnyja sankcyi, i lepš by prakuratura źviarnułasia da dziaržaŭnych słužbovych asobaŭ, dziakujučy dziejańniam jakich vynosiacca hetyja sankcyi. Tamu što ich upłyŭ na padziei ŭ tysiaču raz bolš važny, čym vykazvańni takoj ścipłaj asoby, jak hramadzianin Viktar Ivaškievič», — zajaviŭ palityk.
Jon miarkuje, što papiaredžańnie Hienprakuratury nie źviazana ź mitynham 25 sakavika, na Dzień Voli. «Aficyjna mnie skazali, što heta źviazana z maimi publičnymi zajavami i zaklikami ŭvieści sankcyi. Ja paćvierdziŭ, što takija zakliki ŭśviadomlena rabiŭ, maja meta była paspryjać vyzvaleńniu palitviaźniaŭ», — rastłumačyŭ Ivaškievič.
Niahledziačy na papiaredžańnie Hienprakuratury, jon nie płanuje spyniać svaju dziejnaść. «Usie toje, što rabiŭ, budu dalej rabić. Rabi, što možaš, i budź, što budzie. Pakul što ja nie aryštavany. Tak što ŭsio nie tak strašna», — skazaŭ palityk.
Jak biełarusy ŭ Vilni adznačyli Dzień Voli ŠMAT FOTA4
Jak biełarusy ŭ Vilni adznačyli Dzień Voli ŠMAT FOTA
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1111
Kamientary