Bob Dyłan raptoŭna ździviŭ i napałochaŭ słuchačoŭ novym klipam.
«Heta videa bolej nahadvaje film pra hvałt, čym klip» — čytačy The Guardian učora pryjšli ŭ lohki šok ad novaha videa patryjarcha muzyki XX stahodździa Boba Dyłana.
29 žniŭnia źjaviŭsia klip na pieśniu Duquesne Whistle z novaha alboma. U płanie muzyki tam ničoha nie źmianiłasia — Dyłan, jak my jaho ŭjaŭlajem apošnija 15 hod: bluzavyja harmonii, akardyjon (bieź jaho maestra ciapier nijak nie moža) i chrypły vakał Dyłana. A voś klip…
Pačynajecca videa dastatkova miła — chłopiec upadabaŭ na vulicy dziaŭčynu, i pačaŭ aktyŭna vydurniacca, imitujučy Čarli Čaplina. Adnak praz skradzienuju dla dziaŭčyny kvietku, piersanažu davodzicca paznajomicca spačatku ź ślezaciečnym hazam (ad samoj dziaŭčyny), paśla z pastarunkam i, ŭ rešcie rešt, z bandyckaha typu chłopcami, jakija źbivajuć hieroja biejsbolnymi bitami. Paśla čaho vykidvajuć jaho na vulicu, dzie praź jaho pierastupaje flehmatyčny Dyłan.
Klip vyklikaŭ šok u čytačoŭ The Guardian i časopisa Rolling Stone — ad mirnaha cichaha Dyłana takoha nie čakali. Ciapier rekłama albomu zabiaśpiečanaja, pry hetym klip, što nazyvajecca, «pracuje»: zamiest pieśni ź videašeraham, jon vyhladaje jak sapraŭdnaje kino.
11 vieraśnia Dyłan vypuskaje novy albom Tempest, jaki adnačasova nazyvaje bluzavym, chryścijanskim, pryśviečanym «Tytaniku» — karaciej, pra toje, što kružełka budzie ŭjaŭlać ź siabie ŭ vyniku spračajucca praz adnaho ŭsie muzyčnyja krytyki ZŠA.
Ciapier čytajuć
Z YouTube vydalili kanały BiełTA, STB i ANT. Ułady pahražajuć kontrmierami35
Kamientary