Kandydata ŭ deputaty pazbavili statusa indyvidualnaha pradprymalnika
Kandydata ŭ deputaty pa Minskaj sielskaj vybarčaj akruzie Ilju Dabratvora pazbavili statusu indyvidualnaha pradprymalnika.
Dabratvor paviedamiŭ, što jon źbiraŭsia ŭnieści ŭ svaje vybarčyja materyjały i biuleteń dla hałasavańnia źmianieńni z nahody svajho pracoŭnaha statusu. «Ja ličusia indyvidualnym pradprymalnikam. U suviazi z hetym ja padaŭ zajavu ŭ akruhovuju kamisiju z prośbaj pakazać heta ŭ ahitacyjnych materyjałach i biuleteni dla hałasavańnia zamiest raniejšaha statusu „biespracoŭny“. Akruhovaja kamisija mnie ŭ hetym admoviła, niahledziačy na toje, što ja prynios im paśviedčańnie ab rehistracyi IP i kvitancyju ab vypłacie padatku za vierasień», — skazaŭ Dabratvor.
Pa daviedku ab tym, što jon źjaŭlajecca IP, Dabratvor pajšoŭ u vykankam Minskaha rajona.«Adnak tam mnie zajavili, što 31 žniŭnia padatkovaja inśpiekcyja padała dakumienty na likvidacyju statusu IP, i vykankam jaho likvidavaŭ z matyvacyjaj, što ja nie vioŭ nijakaj dziejnaści», — skazaŭ Dabratvor.
«Dziŭna toje, što 13 žniŭnia padatkovaja pryniała padatak, uziała ŭ mianie dekłaracyju — ni pra jakuju likvidacyju havorki nie było.U rajvykankamie i padatkovaj havorać, što pasyłali mnie niejki list ab tym, što praviedziena revizija majoj dziejnaści, i ab likvidacyi IP, ale hetaha lista ja nie bačyŭ. Taksama mnie rastłumačyli, što ŭ padatkovaj vialikaja ciakučaść kadraŭ, i supracoŭnik, jaki pryniaŭ rašeńnie ab likvidacyi majho statusu IP, adrazu ž zvolniŭsia. Mnie navat pretenzii pradjavić niama kamu», — zajaviŭ Dabratvor.
Jon adznačyŭ, što, jak praviła, navat tyja ludzi, jakija chočuć likvidavać IP pa ŭłasnym žadańni, majuć prablemy ź likvidacyjaj i zdačaj spravazdačnaści. U vypadku ź im jaho status likvidavali «bieź biurakratyčnaj ciahaniny i navat nie prainfarmavali ab hetym».
«Ja liču, što heta zroblena śpiecyjalna i metanakiravana, kab nie ŭnosić źmianieńni ŭ biuleteń, kab u biuleteni ja fihuravaŭ jak biespracoŭny», — zajaviŭ Dabratvor.
Kamientary