Adam Hlobus
Kišennaja historyja kultury
nakidy
Klimt
Arystakratki na karcinach Hustava Klimta napisanyja zołatam, srebram i biaskroŭnymi farbami.
Šyle
Abrysy aholenych leśbijanak Johan Šyle malavaŭ tonkim kalučym drotam.
Nolde
Kab ja nia viedaŭ, što Emil Nolde ličyŭ siabie aryjcam i ŭstupiŭ u nacyjanał-sacyjalistyčnuju rabočuju partyju raniej za Hitlera, dyk ni na chvilinu nie sumniavaŭsia b — pałotny, padpisanyja Nolde, malavaŭ čarnaskury afrykaniec.
Mocart
Tvory Johana Mocarta ŭ Vienie hučać paŭsiul: u aŭtobusach, u kaviarniach, u muzejach, hučać cicha j kranalna.
Frojd
Prastavataja vienka skazała nastupnaje: «Raniej u Aŭstryi było stolki chvorych na hałavu, što Zyhmund Frojd zmoh stvaryć nia tolki teoryju, a j dobry kapitał». Takoje narodnaje razumieńnie spadčyny henijalnaha doktara — ciešyć.
Šubert
Pieśni Johana Šuberta ŭ vykanańni ansambla narodnych instrumentaŭ hučać jak ukrainskija narodnyja pieśni.
Brejhiel
Pabudova imperyi — heta budavańnie babilonskaj viežy. Asabliva dobra toje ŭśviadamlajecca, kali stać u centry Vieny, na druhim paviersie pałaca Habsburhaŭ, nasuprać pałatna Pitera Brejhiela (Mužyckaha) «Babilonskaja vieža».
Nicše
Spačuvańnie dosyć niebiaśpiečnaja reč, jano zdatnaje pieratvaryć filozafa ŭ varjata. Frydrych Nicše abniaŭ za šyju zmučanaha kania j straciŭ rozum, ad spačuvańnia, nia jnakš.
Platon
Dyjaloh — pryncypova biespryncypnaja forma ŭ litaratury. Vydatny prykład možna prasačyć u «Bankiecie» Platona, dzie ŭsio skazanaje asprečvajecca, a śćvierdžanaje abviarhajecca j stavicca pad sumnieŭ.
Kusto
Hienijalnaść vynachodnika Iva Kusto ŭ tym, što jon pieratvaraje telivizar u akvaryjum, a akvaryjum u akijan.
Makluen
Jość rečy, jakija adčuvaješ intuityŭna i svaje pavodziny suadnosiš z hetymi rečami. Ź dziacinstva ja zdahadvaŭsia, što sučasny tvorca, u jakoj by dziejnaści jon ni pracavaŭ, abaviazany choć kryšku być mastakom. Paćvierdžańnie maim zdahadkam znajšłosia ŭ razvahach kanadzkaha myślara — Hierberta Maršała Makluena. Jon zapeŭnivaŭ: kožny ŭ eklektyčnuju eru pavinny stacca mastakom. Nie ludźmi zvacca, a mastakom stacca.
Malevič
Pry ŭsioj adnaznačnaści prahramny tvor Kazimira Maleviča «Čorny kvadrat» nie adnaznačny; u padtekście kožnaha kvadrata lažyć kruh, a ŭ dadzienym varyjancie — zialony kruh na pamarančykavym tle, pra jaki ŭsio žyćcio maryŭ Malevič.
Basio
Macua Basio vynajšaŭ viečny ruchavik. Čytajem: «Stary staŭ. /Skoknuła žabka/. Usplosk vady». Kožnaha razu, jak niechta čytaje hetyja radki, Basio padychodzić da staroha staŭka, i spałochanaja žabka skača ŭ vadu.
Puškin
Tvory Alaksandra Puškina podobnyja da pustych kryštalnych kielichaŭ, u jakija lohka nalivajecca sučasnaść.
Vazareli
Viktor Vazareli stvaraŭ karciny, zdatnyja viartać hledaču jahony pahlad. Hladziš na kalarovych šašački, i tvoj pahlad adbivajecca j viartajecca ŭ śviadomaść.
Mazarel
Na hraviurach belhijca Fransa Mazarela ŭsie šyby ŭ damach pavybivanyja, a ŭsie karabli tonuć.
Bekman
Kali niamiecki ekspresijanist Maks Bekman pačynaje malavać Chrysta j Piłata, u jaho atrymlivajucca naviedniki publičnaha domu na padpitku.
Van Hoh
Asnoŭny kampazycyjny pryjom Vincenta Van Hoha — zavichreńnie.
Parmidžanina
Žyvapis Parmidžanina padobny da adlustravańniaŭ u irtutnaj kropli. Jon nastolki začaroŭvaje, što advieści vočy amal niemahčyma.
Hirłandaja
Kali j jość na śviecie etalon u malavańni žanočaha profila, dyk biassprečna jon naležyć Dameniku Hirłandaja. Džovana Tarnabuoni na karcinie Hirłandaja nastolki pryhožaja, što ŭźnikaje niepieraadolnaje žadańnie jaje pacałavać.
Manteńja
Tvor Manteńi «Miortvy Chrystos» taki pierakanaŭčy, što, hledziačy na jaho, ciažka pavieryć u Chrystova ŭvaskrašeńnie, lahčej pahadzicca z dumkaju pra bahoŭ, što ŭsie da adzinaha pamirajuć u Eŭropie.
Mahryt
Bolšaja pałova pałotnaŭ Rene Mahryta namalovana Fantamasam, hierojem ź pierałamanaj śviadomaściu j zhublenym sumleńniem.
Nicše
Chto spračajecca, Nicše — vydatny litaratar, ale čamu, načytaŭšysia jahonych staronak, tak mocna chočacca zrabić hadaść niekamu z blizkich i darahich ludziej.
Hoja
Robiačy aforty ŭ «Kapryčos» Fransiska Hoja napisaŭ, što, jak tolki raźvidnieje, usie viedźmaki, damaviki, pačvarniki paźnikajuć. Pahadžajusia j dadaju... Jak tolki ściamnieje...
Jak biełarusy ŭ Vilni adznačyli Dzień Voli ŠMAT FOTA4
Jak biełarusy ŭ Vilni adznačyli Dzień Voli ŠMAT FOTA
Časam niečakanaja historyja biełaruskich himnaŭ: «My vyjdziem ščylnymi radami», «Pahonia», «Žyvie Biełaruś», «Radzima maja darahaja», «Mahutny Boža» (ź VIDEA)1111
Kamientary