Idealny kandydat (Jakim vy bačycie kandydata ad demakratyčnych siłaŭ na budučych prezydenckich vybarach?)

 Idealny kandydat

Jakim vy bačycie kandydata ad demakratyčnych siłaŭ na budučych prezydenckich vybarach?

Z takim pytańniem źviarnulisia my da palitykaŭ i palitolahaŭ.

Uładzimier Čarnoŭ, palitolah:

Možna vykłaści svajo bačańnie idealnaha kandydata ci z svajho subjektyŭnaha punktu hledžańnia, ci z punktu hledžańnia taho, što patrebna dla Biełarusi. Ale taki kandydat moža nie akazacca prachadnym, bo toje, što, na našu dumku, patrebna dla krainy, toj vobraz kandydata, jaki my sabie ŭjaŭlajem, na žal, karennym čynam adroźnivajecca ad taho, jaki avałodaŭ masavaj śviadomaściu našych ludziej. Idealny dla narodu kandydat pavinien być prosty ŭ stasunkach ź ludźmi, mieć vobraz čałavieka z narodu, blizkaha da ludziej, być spraviadlivym, ščyrym, u mieru intelihientnym, ale nie pavinien zdavacca zanadta razumnym. Vidavočna, heta musić być mužčyna, a nie žančyna, nie maładziejšy za 40 i nie starejšy za 65 hod. Jon musić mieć elementy charyzmy, umieć vałodać aŭdytoryjaj. Prafesijnyja jakaści ŭ dadzienym vypadku hrajuć druhasnuju rolu. Uvohule ja vyłučaju try katehoryi acenki mahčymych kandydataŭ: maralna-psychalahičnyja jakaści, arhanizacyjna-dziejnyja mahčymaści i palityčnuju aryjentacyju. Možna, viadoma, hety idealny vobraz zahadzia zmadelavać, zychodziačy z hetych kryteraŭ, ale, na moj pohlad, kanstrujavać jaho lepš, zychodziačy sa źviestak sacyjalahičnych apytańniaŭ. Ciapier my jakraz takoje apytańnie pravodzim, paśla budziem analizavać jahonyja vyniki. Što tyčycca statusnych charaktarystyk, to hety čałaviek pavinien zajmać dosyć vidnaje stanovišča ŭ našym hramadztvie — naprykład, heta moža być bujny haspadarnik albo pramysłoviec. Moža, jon navat budzie razmaŭlać na trasiancy. Jon nie pavinien być rusafobam, nie pavinien vykazvać surjoznaj krytyki na adras Rasiei, jak heta rabiŭ Paźniak, bo hetym jon adšturchnie ad siabie značnuju častku elektaratu.

Adkrytaja krytyka na adras taho ci inšaha kandydata zaraz była b niepažadanaj. Ale kali ŭžo zakranać maralna-psychalahičnyja jakaści hetych ludziej i stavicca da ich z punktu hledžańnia eksperta, to Domaš — nie aptymalny varyjant. Choć jon i haspadarnik, choć u jaho i jość dośvied kiravańnia i jaho moža padtrymać namenklatura, ale jon zachodnik, i ŭschodniaja Biełaruś za jaho moža nie prahałasavać. Pa-druhoje, jon čałaviek z rehijonu, i heta značyć, što Miensk moža da jaho pastavicca ź niedavieram. Pa-treciaje, na jaho jość kampramat (heta źviazana ź jaho domam), jaki ŭłady pakul prychoŭvajuć, ale ŭ nieabchodny momant abaviazkova vykarystajuć.

Što tyčycca Dabravolskaha, to heta małady i vielmi perspektyŭny palityk eŭrapiejskaha typu, i ŭ luboj inšaj krainie jon mieŭ by vielmi vialikija šancy. Kali zychodzić z tych pakaźnikaŭ, jakija ja nazyvaŭ vyšej, u Biełarusi jon naŭrad ci moža pieramahčy. Chacia jon vielmi kamunikabelny, umieje razmaŭlać z prostymi ludźmi i nievypadkova zaŭsiody pieramahaŭ u Sierabrancy, dzie bliskuča vyjhraŭ dźvie vybarčyja kampanii — u apošni Viarchoŭny Saviet SSSR i ŭ Viarchoŭny Saviet Biełarusi CHIII sklikańnia. Ale na voka prostaha čałavieka — jon jašče małady. Viadoma, asabista mnie hetaja kandydatura bolš impanuje, ale ja bajusia, što dla našaha elektaratu heta taksama nia lepšy varyjant. Treba šukać, apazycyi treba vyjści na jak maha šyrejšyja słai hramadzkaści i šukać tam hetaha kandydata, vieści pieramovy, vyśviatlać, chto moža być kandydatam siarod prafsajuźnikaŭ, siarod ahrarnikaŭ i h.d. Hety kandydat pavinien razhladacca jak čałaviek ad šyrokich słajoŭ nasielnictva, a nie ad apazycyi, tady budzie šaniec pieramahčy.

Mikoła Statkievič, staršynia Narodnaj Hramady:

Idealny kandydat — toj, jaki maje najlepšyja šancy pieramahčy. Heta čałaviek, jaki moža adnačasova zdabyć padtrymku ŭsich ci pieravažnaje bolšaści apazycyjnych partyjaŭ, jak demakratyčnych, tak i tych, jakija my nia ličym demakratyčnymi, rehijanalnych elitaŭ — pramysłovych i kiraŭničych, prafsajuzaŭ — jak svabodnych, tak i dziaržaŭnych, i zdabyć padtrymku jak Rasiei, tak i Zachadu.

Kandydat ad Kaardynacyjnaj rady demakratyčnych siłaŭ, ad demakratyčnych partyjaŭ, hetaksama jak i kandydat ad luboj inšaj partyi, maje vielmi mała šancaŭ na pośpiech. Zhodna z sacyjalahičnymi apytańniami, mahčymaści partyjnych kandydataŭ, padtrymanych apazycyjaj, nievysokija. Heta datyčyć i Domaša, i Dabravolskaha. Choć pra ich možna skazać tolki stanoŭčaje, ale ŭ hramadztvie isnuje ŭstojlivy stereatyp, i šancy na pieramohu maje tolki toj kandydat, jakoha hramadztva paličyć niezaležnym. Ja liču, što taki kandydat moža być vyłučany jak KRDS, tak i partyjami, jakija ŭ jaje nie ŭvachodziać, a taksama prafsajuzami. Treba pravieści pieramovy i vybrać takoha kandydata, jakoha ŭsie mahli b padtrymać. Dla mianie vidavočna, što takim kandydatam nia moža być partyjny čałaviek. Chutčej za ŭsio, najbolšyja šancy ŭ taho kandydata, jakoha padtrymaje Federacyja prafsajuzaŭ. Taki kandydat budzie ŭsprymacca jak niezaležny. Kali Kaardynacyjnaja rada zaraz uhołas padtrymaje takoha kandydata — heta budzie “miadźviedžaja pasłuha”: ciapier da partyjaŭ vielmi mała davieru.

Lavon Barščeŭski, były vykanaŭca abaviazkaŭ staršyni BNF:

Heta čałaviek, jaki budzie padtrymany ŭsimi — i elitaj, i narodam. Hałoŭnaja jaho charaktarystyka — jon pavinien sfarmavać dziejazdolnuju kamandu, jakaja vyciahnie krainu z hetaha žachlivaha kryzysu. Jon usiaho tolki pavinien być dobrym arhanizataram, sam ža jon moža być kim zaŭhodna.

I Domaš, i Dabravolski mahli b stać cudoŭnymi prezydentami. Jany majuć dla hetaha ŭsie nieabchodnyja jakaści. Adzinaje, što im nieabchodna, — kab ich padtrymaŭ narod.

Apytvaŭ Andruś Biełavoki