Галоўнае: дажджу не абяцаюць.
Сёмы традыцыйны фестываль «Камяніца» пройдзе пад Мінскам 5 верасня. «Наша Ніва» сабрала некалькі карысных фактаў для тых, хто збіраецца на фэст альбо яшчэ думае, ці купіць квіткі.
Як дабрацца
Ехаць трэба да Музею народнай архітэктуры ў Строчыцах, што ў 4 км ад МКАДа. Для аўтамабілістаў ёсць бясплатная паркоўка каля ўваходу ў музей. Побач з другой сцэнай будзе велапаркоўка.
З 11:30 да 23:00 ад метро «Малінаўка» ў абодва бакі раз на 15 хвілін будзе хадзіць бясплатны аўтобус. Будзьце ўважлівыя: па завяршэнні фэсту з’ехаць захоча адначасова значна больш людзей, чым вы сустрэнеце па дарозе туды!
Акрамя таго, дабрацца ад аўтастанцыі «Паўднёва-Заходняя» (таксама каля метро «Малінаўка») можна на прыгарадным аўтобусе 203э. Квіток каштуе 9200 рублёў. Расклад можна спытаць па нумары 114 альбо на сайце ticketbus.by, абраўшы ў якасці канцавога пункту «МУЗЕЙ НАР.АРХ.БЫТА».
Якое надвор’е абяцаюць
Хутчэй за ўсё, дажджу не будзе, але парасон на ўсялякі выпадак захапіць варта. Удзень будзе пахмурна, да +18..+20. Абысціся можна і кашуляй, але на вечар (калі можа быць і +13) лепей захапіць цёплую байку ці куртку.
Ці прапусцяць з тэрмасам з гарбатай, невядома: на тэрыторыю забараняецца праносіць любое харчаванне акрамя дзіцячага і ваду ў шкляных бутэльках. Ці злічаць тэрмас за адно з гэтага, залежыць ад міліцыі, якая будзе даглядаць наведнікаў на ўваходзе.
Хто і калі выступіць
Фестываль у 12:00 адкрыюць дзіцячыя калектывы «FолкRада» ды «Мілавіца». Пасля іх на галоўную сцэну выйдуць Altanka ды «Стары Ольса». Цягам дня на вялікай сцэне выступяць «Дримба да Дзига» (Украіна), Trad Attack! (Эстонія), Dzikie Jablka (Польшча) і беларускія гурты Vuraj і «Ягорава гара». На другой сцэне зграюць «Варган», «Гарынь», «Мярэжа», «Страла», «Этна-суполка» ды іншыя.
Дакладны расклад выступаў невядомы, яго абяцаюць абвясціць раніцай у дзень фэсту праз суполкі ў Facebook і VK. Выступы завершацца а 10-й вечара.
Што будзе акрамя музыкі
Лідар «Троіцы» Іван Кірчук у царкве каля карчмы прэзентуе этнаграфічную містэрыю — монаспектакль «Споведзь пад стрэхамі». Прэзентуе тройчы: а 13, 15 і 16 гадзінах. «Я пакажу тое, што калісьці адбывалася ў дамах, якія стаяць на тэрыторыі музею народнай архітэктуры і побыту. У іх стагоддзямі жылі людзі. Без тэлебачання, газет і радыё, без электрычнасці, — абяцае Кірчук. — Гэта было цяжкае жыццё, сяляне вельмі шмат працавалі, але яны таксама мелі свае радасці і забавы, пра якія большасць з нас зараз нічога не ведае».
На традыцыйным кірмашы свае работы прадставяць паўсотні рамеснікаў. У іх ліку ганчары і кавалі, вытворцы лялек, упрыгожванняў з натуральных матэрыялаў і народнай адзежы — ад традыцыйных вырабаў да сучасных вышымаек.
Абяцаюць і іншыя забавы: народныя танцы і гульні, рыцары і арбалетнае стрэльбішча, дзіцячая пляцоўка з маляваннем і пляценнем. Можна будзе паскакаць на кані, палятаць на аўтажыры ці проста паваляцца ў сене.
Як прайсці бясплатна
Нацыянальны строй — у ім у музей прапусцяць задарма. Але простая вышымайка не пройдзе: трэба мець поўны строй, ад абутку да галаўнога ўбору. Калі што, ёсць спіс крам, дзе можна купіць вышыванку. Альбо можна быць дзіцём да 12 год — іх таксама прапусцяць бясплатна.
У іншых выпадках давядзецца заплаціць 100 тысяч за дарослы квіток і 50 за дзіцячы. Іх будуць прадаваць як у касах музею, таксама квіткі ўжо можна набыць на bycard.by (не забудзьце іх раздрукаваць).
Комментарии