Літаратар і выдавец з Жодзіна Ўладзімер Сіўчыкаў даслаў адкрыты ліст у рэдакцыю газэты "Народная Воля" па факце публікацыі "Гарсавет састарыў Жодзіна на трыста гадоў". Ён лічыць, што аргументы прыведзеныя ў матэрыяле абсалютна беспадстаўныя
"З'яўляюся даўнім прыхільнікам, чытачом і аўтарам "Народнай Волі", якую Вы цягавіта, мужна і таленавіта рэдагуеце" – такімі словамі пачынаецца адкрыты ліст да Іосіфа Сярэдзіча. "Аднак нататка "Горсовет состарил Жодино на триста лет", зьмешчаная ў №№181-182 за подпісам Валерыі Рубінай са спасылкай на матэрыяле сайту bulletinonline.org зьбянтэжыла і расчаравала."
Мяркуйце самі – гаворыцца далей, – памылкі і хібы пачынаюцца ўжо з загалоўка, бо ўзаконеная рашэньнем Жодзінскага гарсавета дата нараджэньня горада робіць яго старэйшым не на трыста, а на трыста дваццаць гадоў. Дэпутаты, як сцьвярджае аўтарка, прынялі гістарычнае (гэта слова ўзята ёю ў з'едлівыя двухкосьсі) на вельмі і вельмі фармальных падставах. Дазвольце адказаць ёй і на гэтую агрэсіўную непісьменнасьць. Згодна гістарычнай традыцыі датай нараджэньня горада лічыцца першая пісьмовая згадка пра яго. А першая такая згадка пра Жодзіна ўтрымліваецца ў "Смялявіцкім інвентары" за 1643 год. Уласнаручна трымаў, чытаў і фатаграфаваў гэты дакумент з ласкавага дазволу супрацоўнікаў Цэнтральнага гістарычнага архіва, што на сталічнае вуліцы Крапоткіна. Адрасую туды спадарыню Рубіну, якая лічыць, што хтосьці замовіў падтасаваць факты, каб дзеля саліднасьці кіраваць сталым, а не "маладым гарадзішкам". Не хацелася б мне, каб спадарыня Рубіна сутыкнулася на вузкай сьцяжынцы са 120-тонным самазвалам, які вырабляюць у "гарадзішку" са 60-тысячным насельніцтвам! Ці можа аўтарка абразьлівай для жодзінцаў нататкі пачуваецца Гуліверам у краіне ліліпутаў і "БелАЗ" ёй што мурашка?
Сіўчыкаў даводзіць, што інтанацыя нататкі нядоброзычлівая і саркастычная, што абсалютна беспадстаўна. Бо ўжо доўгі час вядзецца культурна – асьветніцкая праца па ўшанаваньні сапраўднай гісторыі Жодзіна, якую ажыцяўляюць як уладныя так і грамадзкія структуры. А зьмест нататкі папросту абражае гістарычнае мінулае Жодзіна і гонар яго жыхароў. "Працуйма ж на пазітыў і хай адкаснуцца зласьлівыя недабразычліўцы і зайздросьнікі!" – піша Сіўчыкаў напрыканцы адкрытага ліста.
Цяпер чытаюць
«У майго 21 сантыметр — дзесяць базавых далі». Беларусы ў тыктоку жартуюць з новых правілаў ад чыноўнікаў7
Каментары