Таксіста з Мінска асудзілі на 10 сутак за транспарант «Свабоду палітвязню Рубцову»
Таксіст з Мінска Леанід Кулакоў, затрыманы 19 чэрвеня, пакараны 10 суткамі адміністрацыйнага арышту. Такое рашэнне прыняў 23 чэрвеня суд Мінскага раёна.
Нагадаем, мінчукі Максім Вінярскі, Сяргей Мацкойць і Леанід Кулакоў былі затрыманыя вечарам 19 чэрвеня каля супермаркета «Гіпа» на Лагойскім тракце за спробу вывесіць транспарант з надпісам «Свабоду Рубцову» (гомельскі апазіцыянер Юрый Рубцоў 28 мая быў асуджаны на два гады пазбаўлення волі, «Міжнародная амністыя» прызнала яго вязнем сумлення). Двое сутак затрыманыя правялі ў ізалятары часовага ўтрымання Мінскага раёна. 22 чэрвеня іх даставілі ў суд. Вінярскага і Мацкойця ў той жа дзень асудзілі на 10 і 5 сутак адміністрацыйнага арышту адпаведна. Кулакова адпусцілі дамоў, але абавязалі прыйсці на пасяджэнне суда 23 чэрвеня.
Леанід Кулакоў прызнаны вінаватым на падставе ч. 3 арт. 23.34 Кодэкса аб адміністрацыйных правапарушэннях (парушэнне парадку арганізацыі і правядзення масавых мерапрыемстваў). Як паведаміў Кулакоў, яго, у прыватнасці, абвінавацілі «ў ажыццяўленні пікетавання шляхам фатаграфавання».
Пасля вынясення рашэння асуджанага пад арышт не ўзялі. Кулакову заявілі, што ўсе яго дакументы перададзеныя ва УУС Першамайскага раёна Мінска, якое і будзе выконваць судовае рашэнне.
Леанід Кулакоў мае намер абскардзіць рашэнне суд Мінскага раёна.
Каментары